டெல்லி : ராயல் என்ஃபீல்டு நிறுவனம் கடந்த ஆகஸ்ட் 2026 மாதத்தில் ஒட்டுமொத்தமாக 1,26,479 மோட்டார் சைக்கிள்களை விற்பனை செய்து மிகச் சிறந்த வளர்ச்சியைப் பதிவு செய்துள்ளது. இது கடந்த 2025ஆம் ஆண்டு ஆகஸ்ட் மாத விற்பனையான 1,14,002 வாகனங்களுடன் ஒப்பிடும் போது 10.94% ஆண்டு வளர்ச்சியை (YoY) காட்டியுள்ளது. அதேபோல, கடந்த ஜூலை 2026 மாத விற்பனையான 1,18,232 வாகனங்களுடன் ஒப்பிடும் போது, இந்த ஆகஸ்ட் மாதத்தில் விற்பனை 6.98% மாத வளர்ச்சியைக் (MoM) கண்டுள்ளது என்பது குறிப்பிடத்தக்கது.
ஏற்றுமதி விற்பனை விவரங்கள்
கடந்த ஆகஸ்ட் மாதத்தில் ராயல் என்ஃபீல்டு நிறுவனத்தின் ஒட்டுமொத்த விற்பனையில் உள்நாட்டுச் சந்தை தான் மிக முக்கியப் பங்கு வகித்துள்ளது. நிறுவனத்தின் ஒட்டுமொத்த விற்பனை அளவில் 90.29% பங்களிப்பை உள்நாட்டு வர்த்தகம் பெற்றுள்ளது. வெளிநாட்டு ஏற்றுமதியைப் பொறுத்தவரை, ஆகஸ்ட் மாதத்தில் 12,275 மோட்டார் சைக்கிள்கள் வெளிநாடுகளுக்கு அனுப்பப்பட்டுள்ளன. இது கடந்த ஆண்டு ஆகஸ்ட் மாத ஏற்றுமதியுடன் ஒப்பிடும் போது 10.33% ஆண்டு வளர்ச்சியைப் பெற்றுள்ளது. இருப்பினும், கடந்த ஜூலை மாத ஏற்றுமதியான 12,915 வாகனங்களுடன் ஒப்பிடும் போது இது 4.96% சரிவைக் கண்டுள்ளது.
ராயல் என்ஃபீல்டு நிறுவனம் முடிவு
இந்த ஆகஸ்ட் மாத விற்பனை அறிக்கையில் ராயல் என்ஃபீல்டு நிறுவனம் ஒரு முக்கிய மாற்றத்தைச் செய்துள்ளது. இனிமேல் தங்களின் சிறிய ரக மோட்டார் சைக்கிள் பிரிவை 350சிசி வரை உள்ள மாடல்கள் மற்றும் எலக்ட்ரிக் மாடல்கள் என்று நிறுவனம் வகைப்படுத்தியுள்ளது. இதன் மூலம் நிறுவனத்தின் புதிய பிளையிங் ஃப்ளீ (Flying Flea) எலக்ட்ரிக் பைக் விற்பனையும் இந்த பிரிவின் கீழ் இணைக்கப்பட்டுள்ளது.
இந்த 350சிசி மற்றும் எலக்ட்ரிக் பிரிவு மட்டும் ஆகஸ்ட் மாதத்தில் 1,13,143 வாகனங்கள் விற்பனையாகி 14.71% ஆண்டு வளர்ச்சியைப் பெற்றுள்ளதுடன், நிறுவனத்தின் மொத்த விற்பனையில் 89.46% பங்கைக் கொண்டுள்ளது. ஆனால், இரண்டு விற்பனையும் ஒன்றாகக் கலக்கப்பட்டுள்ளதால் எலக்ட்ரிக் பைக்குகள் மட்டும் தனியாக எவ்வளவு விற்றன என்ற விவரம் தெரியவில்லை. இதற்கு நேர்மாறாக, 350சிசி-க்கு மேல் உள்ள பெரிய பைக்குகளின் விற்பனை கடந்த ஆண்டுடன் ஒப்பிடும் போது 13.24% சரிந்து 13,336 வாகனங்களாகக் குறைந்துள்ளது.
ஐந்து மாத ஒட்டுமொத்த சாதனை
இந்த 2026 ஏப்ரல் முதல் ஆகஸ்ட் வரையிலான நடப்பு நிதியாண்டின் முதல் ஐந்து மாதங்களில் ராயல் என்ஃபீல்டு நிறுவனம் ஒட்டுமொத்தமாக 5,75,138 மோட்டார் சைக்கிள்களை விற்பனை செய்து சாதனை படைத்துள்ளது. இது கடந்த ஆண்டின் இதே காலகட்ட விற்பனையான 4,67,575 வாகனங்களை விட 23% மிக அதிக வளர்ச்சி ஆகும்.
இதில் உள்நாட்டு விற்பனை மட்டும் 27.65% உயர்ந்து 5,20,695 வாகனங்களாக அதிகரித்துள்ளது. இந்த ஐந்து மாதங்களில் 350சிசி மற்றும் எலக்ட்ரிக் பிரிவு பைக்குகள் 27.52% வளர்ச்சியுடன் 5,12,817 வாகனங்கள் விற்றுள்ளன. ஆனால், 350சிசி-க்கு மேல் உள்ள பெரிய பைக்குகளின் விற்பனை 4.77% சரிவைச் சந்தித்துள்ளதுடன், ஒட்டுமொத்த ஐந்து மாத ஏற்றுமதியும் 8.75% குறைந்து 54,443 வாகனங்களாக சரிவடைந்துள்ளது.
இமாலயன் 440 பைக் அறிமுகம்
சமீபத்தில் கிளாசிக் 350 கோர்கா எடிஷன் பைக்கை அறிமுகப்படுத்திய ராயல் என்ஃபீல்டு நிறுவனம், தற்போது தனது அடுத்த அதிரடியாக புதிய இமாலயன் 440 (Himalayan 440) பைக்கை வரும் செப்டம்பர் 4 அன்று அதிகாரப்பூர்வமாக அறிமுகம் செய்யத் தயாராகி வருகிறது. இந்த புதிய மாடல் பைக்குகள் ஏற்கனவே ஷோரூம்களுக்கு வரத் தொடங்கிவிட்டதால், அறிமுகம் ஆன உடனே டெலிவரி தொடங்கும் என்று எதிர்பார்க்கப்படுகிறது. தற்போதைய இமாலயன் 450 பைக்கிற்கு சற்றே கீழே அமையவுள்ள இந்த புதிய இமாலயன் 440 மாடல், அட்வென்ச்சர் பைக் பிரியர்களுக்கு மிகவும் மலிவான விலையில் ஒரு சிறந்த தேர்வாக அமையும் என்று கணிக்கப்பட்டுள்ளது.