காவேரியில் இருந்து தமிழகத்திற்கு நீர்வரத்து மீண்டும் அதிகரிப்பு.! தொடரும் பரிசல் போக்குவரத்து தடை.!

[File Image]

தமிழகத்திற்கு காவேரி மேலாண்மை வாரிய உத்தரவின் படி ஜூன், ஜூலை மாதத்தில் திறந்துவிடபட வேண்டிய தண்ணீரின் அளவில் மிக குறைந்த அளவில் மட்டுமே தண்ணீர் திறந்துவிடப்பட்டதால், உரிய அளவில் கர்நாடக அரசு தண்ணீர் திறக்க வேண்டும் என தமிழக அரசு தொடர்ந்து கோரிக்கை வைத்து வைத்துவருகிறது .

இந்நிலையில் காவேரியில் இருந்து குறிப்பிட்ட அளவு தண்ணீர் திறக்க கர்நாடக அரசு உத்தரவிட்டு இருந்தது. தற்போது காவேரி நீர்ப்பிடிப்பு பகுதிகளில் மழையின் அளவு அதிகரித்ததன் காரணமாக கர்நாடகாவில் கபினி, கிருஷ்ணராஜ சாகர் அணைகளுக்கு நீரின் வரத்து அதிகமாகியுள்ளது.

இதன் காரணமாக, கபினி அணையில் இருந்து 5 ஆயிரம் கனஅடி அளவு தண்ணீரும், கிருஷ்ணராஜசாகர் அணையில் இருந்து 15ஆயிரம் கனஅடி அளவு தண்ணீரும் தமிழகத்திற்கு திறந்துவிடப்படுகிறது. இதனால் காவேரியின் தமிழக எல்லையான பிலிகுண்டுலுவுக்கு நீர் வரத்து அதிகரித்து உள்ளது.

நேற்றுவரை 14,000 கனஅடி நீர் வந்துகொண்டிருந்த நிலையில், இன்று நீர் வரத்து 15,000 கன அடியாக உயர்ந்துள்ளது. காவேரியில் நீர் வரத்து அதிகமான காரணத்தால் ஒகேனக்கல் பகுதியில் சுற்றுலா பயணிகளுக்கு பரிசல் போக்குவரத்து 4வது நாளாக தடை விதிக்கப்பட்டுள்ளது.