நீட் முறைகேடு.! தவறு செய்தவர்கள் கண்டறியாவிட்டால்..? உச்சநீதிமன்றம் புதிய உத்தரவு.!

Supreme court of India [File Image]

டெல்லி: நீட் முறைகேடுகள் குறித்து சிபிஐ, மத்திய அரசு, தேசிய தேர்வு முகமை ஆகியவை பதில் அளிக்க வேண்டும் என உச்சநீதிமன்றம் உத்தரவிட்டுள்ளது.

நாடு முழுவதும் கடந்த மே மாதம் நடைபெற்ற நீட் நுழைவுத்தேர்வில் பல்வேறு முறைகேடுகள் நடைபெற்றதாக உச்சநீதிமன்றத்தில் பல்வேறு வழக்குகள் பதியப்பட்டுள்ளன. இந்த வழக்குகள் அனைத்தும் ஒன்றாக தலைமை நீதிபதி சந்திரசூட் தலைமையிலான அமர்வு முன் விசாரணை நடைபெற்று வருகிறது.

இன்று நடைபெற்ற விசாரணையில், நீதிபதி சந்திரசூட் அமர்வு பல்வேறு கருத்துக்களை கூறினர். அதில், கடந்த முறை நடைபெற்று முடிந்த நீட் தேர்வில் முறைகேடுகள் நடைபெற்றுள்ளது என்பது விசாரணையில் தெளிவாகிறது. இதில் தவறு செய்தவர்கள் தண்டிக்கப்பட வேண்டும். அவ்வாறு அவர்கள் கண்டறிப்படாவிட்டால் நீட் மறுதேர்வு பற்றி ஆலோசிக்க வேண்டி வரும். கண்டுபிடித்துவிட்டால் அவர்களுக்கு மட்டும் நீட் மறுதேர்வு நடத்தப்படும்.

இந்த நீட் தேர்வு முறைகேட்டில் முக்கிய 3 அம்சங்களை, அதாவது எவ்வாறு முறைகேடு நடைபெற்றது என்பது பற்றி தேசிய தேர்வு முகமை ஓர் அறிக்கை தாக்கல் செய்ய வேண்டும். அதே போல, நீட் முறைகேடு தொடர்பாக இதுவரை என்னென்ன நடவடிக்கை எடுத்துள்ளீர்கள் என்பது பற்றி விசாரணை அறிக்கையை சிபிஐ தாக்கல் செய்ய வேண்டும். நீட் முறைகேடுகளை தடுக்க அரசு என்னென்ன நடவடிக்கை எடுத்துள்ளது என்பது பற்றி மத்திய அரசு அறிக்கை தாக்கல் செய்ய வேண்டும் என்றும் குறிப்பிட்டு உச்சநீதிமன்றம் உத்தரவிட்டுள்ளது.

மேலும், வழக்கை தொடர்ந்த மாணவர்கள் குழுவினரும் தங்கள் தரப்பு கோரிக்கைகள் குறித்து 10 பக்கங்களுக்கு மிகாமல் அறிக்கை ஒன்றை நீதிமன்றத்தில் சமர்ப்பிக்க வேண்டும் என்று உத்தரவிட்டு வழக்கை வரும் ஜூலை 11ஆம் தேதிக்கு ஒத்திவைத்து உச்சநீதிமன்ற நீதிபதி சந்திரசூட் தலைமையிலான அமர்வு உத்தரவிட்டுள்ளனர்.