ஐபிஎல் 2023ல் எந்தெந்த முக்கிய சாதனைகள் முறியடிக்கப்பட்டன? இதோ உங்களுக்காக..

ஐபிஎல் 2023 தொடரில் எந்தெந்த முக்கிய சாதனைகள் முறியடிக்கப்பட்டன என்பது குறித்து பார்க்கலாம்.

நடப்பாண்டு 16-ஆவது சீசன் ஐபிஎல் தொடர் கிட்டத்தட்ட இரண்டு மாதங்களாக விறுவிறுப்பாக நடைபெற்று நேற்றுடன் நிறைவு பெற்றது. இந்த இரண்டு மாதம் கிரிக்கெட் ரசிகர்களுக்கு போட்டிகளின் சுவாரஸ்யங்கள், எதிர்பார்த்தது, எதிர்பார்க்காதது என பல்வேறு விதமான நிகழ்வுகள் நடந்துள்ளது. குறிப்பாக இந்த வருடம் ஐபிஎல் தொடரில் மிக கடுமையான போட்டி நிலவியது.

எந்த வருடமும் இல்லாத அளவிற்கு, இந்தாண்டு புள்ளி பட்டியலில் 10 அணிகளுக்கு இடையே கடும் போட்டி நிலவியது. இதுவே, ஒரு பெரும் சுவாரஸ்யமாக அமைந்தது. ஏனென்றால் எந்த அணி தகுதி பெறும், எந்த இறுதிப்போட்டிக்கு முன்னேறும் என இறுதி வரை ரசிகர்களை நுனி சீட்டில் அமர வைத்தது. இந்த சமயத்தில் நேற்று குஜராத் எதிரான இறுதி போட்டியில் வெற்றி பெற்று, 5வது முறையாக தோனி தலைமையிலான சென்னை சூப்பர் கிங்ஸ் கோப்பையை கைப்பற்றியது.

இந்த நிலையில், ஐபிஎல் 2023 தொடரில் எந்தெந்த முக்கிய சாதனைகள் முறியடிக்கப்பட்டன என்பது குறித்து பார்க்கலாம். நடப்பாண்டு ஐபிஎல் தொடரில் கடந்த ஆண்டுகளின் சாதனைகள் முறியடிக்கப்பட்டுள்ளது. அதிக எண்ணிக்கையிலான சதங்கள், அரைசதங்கள் அல்லது அதிக எண்ணிக்கையிலான 200+ ரன் சேஸ்கள் என எதுவாக இருந்தாலும், 2023-ஆம் ஆண்டு ஐபிஎல் தொடரில் பல்வேறு சாதனைகளை முறியடித்துள்ளது.

அதில், ஐபிஎல் 2023-இல் 37 முறை 200க்கும் மேற்பட்ட ரன்கள் பதிவு செய்யப்பட்டுள்ளது. இது ஒரு ஐபிஎல் சீசனில் அதிக எண்ணிக்கையில் அடித்த 200க்கும் மேற்பட்ட ரன்களாகும். ஒரு ஐபிஎல் சீசனில் அதிக சிக்ஸர்கள் அடித்த சாதனையும் ஐபிஎல் 2023ல் முறியடிக்கப்பட்டது. அதன்படி, நடப்பாண்டு அதிகபட்சமாக 1,124 சிக்ஸர்கள் அடித்து அசத்தியுள்ளனர்.

ஐபிஎல் 2023-இல் 153 அரைசதங்கள் மற்றும் 12 சதங்களை வீரர்கள் அடித்துள்ளனர். இது ஒரு ஐபிஎல் சீசனில் அதிகபட்சமாகும். இந்தியன் பிரீமியர் லீக்கின் 16வது சீசன் ரோலர்கோஸ்டர் பயணத்திற்கு சற்றும் குறையாதது, ஏனெனில், இது ரின்கு சிங் போன்ற உயர்ந்த உச்சங்களையும், ப்ரித்வி ஷா அல்லது ரியான் பராக் போன்ற மிகக் குறைந்த அளவுகளையும் கண்டுள்ளது.

ஐபிஎல் சீசனில் அதிகபட்ச சராசரி முதல் இன்னிங்ஸ்:

• 2023 – 183
• 2018 – 172
• 2022 – 171

ஐபிஎல் சீசனில் அதிக 200+ ஸ்கோர்:

• 2023 – 37
• 2022 – 18
• 2018 – 15

200 அல்லது அதற்கு மேற்பட்ட வெற்றிகரமான சேஸ்கள்:

• 8 – 2023
• 3 – 2014
• 2 – 2010, 2018, 2022
• 1 – 2008, 2012, 2017, 2019, 2020, 2021

அதிக சதம்:

• 2023 – 12
• 2022 – 8
• 2016 – 7

ஐபிஎல் சீசனில் அதிக ரன்-ரேட்:

• 2023 – 8.99
• 2018 – 8.65
• 2022 – 8.54

ஐபிஎல் சீசனில் அதிக சிக்ஸர்கள்:

• 2023 – 1124
• 2022 – 1062
• 2018 – 872
• 2019 – 794
• 2020 – 734

ஐபிஎல் 2023ல் அதிக சிக்ஸர்கள் அடித்த வீரர்:

1. ஃபாஃப் டு பிளெசிஸ்- 36
2. சிவம் துபே – 35
3. சுப்மான் கில்- 33

மேலும், பல தனிப்பட்ட சாதனைகளும் முறியடிக்கப்பட்டன. குஜராத் டைட்டன்ஸ் அணிக்கு எதிரான ஆட்டத்தின் யஷ் தயால் வீசிய இறுதி ஓவரில் ரிங்கு சிங் 5 சிக்ஸர்களை அடித்திருப்பது அத்தகைய ஒன்றாகும். ஐபிஎல் வரலாற்றில் வேறு எந்த கிரிக்கெட் வீரரும் கடைசி ஐந்து பந்துகளில் 29 ரன்களை அடித்ததில்லை, ஆனால் ரிங்கு நினைத்துப் பார்க்க முடியாததைச் செய்து காட்டினார்.

குஜராத் வீரர் ஷுப்மான் கில் நடப்பு சீசனில் 890 ரன்களை எடுத்தார், இது எந்த ஒரு கிரிக்கெட் வீரரின் இரண்டாவது அதிகபட்சமாகும், மேலும் அவர் ஒரு சீசனில் 800+ ரன்கள் எடுத்த 3வது மற்றும் இளைய கிரிக்கெட் வீரர் என்ற பெருமையையும் பெற்றார். பந்துவீச்சைப் பொறுத்தவரை, GT பந்துவீச்சாளர்களில் மூன்று பேர், முகமது ஷமி, ரஷித் கான் மற்றும் மோஹித் ஷர்மா IPL பர்பிள் கேப் லிஸ்டில் முதல் மூன்று இடங்களைப் பிடித்தனர், இது அரிதான நிகழ்வாகும்.