பிரதமர் மோடியை இன்று சந்திக்கும் முதல்வர் ஸ்டாலின்!

டெல்லி:தமிழக முதலமைச்சர் மு.க.ஸ்டாலின்,இன்று மதியம் 1 மணிக்கு பிரதமர் மோடியை சந்திக்கிறார்.

சர்வதேச முதலீடுகளை தமிழ்நாட்டிற்கு ஈர்க்கும் வகையில், ஐக்கிய அரபு அமீரகத்தில் நான்கு நாள் சுற்றுப் பயணத்தை முடித்துக் கொண்டு, முதலமைச்சர் மு.க.ஸ்டாலின் நேற்று முன்தினம் அதிகாலை சென்னை வந்தடைந்தார்.

டெல்லி புறப்பட்ட முதல்வர்:

இதனைத்தொடர்ந்து, டெல்லியில் கட்டப்பட்டுள்ள திமுகவின் அலுவலகமான அண்ணா – கலைஞர் அறிவாலய கட்டடத்தின் திறப்பு விழா வரும் 2-ம் தேதி நடைபெற உள்ள நிலையில், இதில் பங்கேற்க முதலமைச்சர் மு.க.ஸ்டாலின் நேற்று இரவு டெல்லி புறப்பட்டார்.

பிரதமருடன் சந்திப்பு:

இந்த நிலையில்,முதலமைச்சர் மு.க.ஸ்டாலின் அவர்கள் இன்று மதியம் 1 மணிக்கு பிரதமர் மோடியை சந்தித்து பேசவுள்ளார்.பின்னர் இன்று பிற்பகல் 2.30 மணிக்கு மத்திய அமைச்சர் நிதின் கட்கரியையும்,3.30-க்கு உள்துறை அமைச்சர் அமித்ஷாவையும் சந்திக்கவுள்ளார்.

நிதி அமைச்சர் நிர்மலா சீதாராமன்:

இதனையடுத்து,இன்று மாலை 4.30க்கு டெல்லியில் பாதுகாப்புத்துறை அமைச்சர் ராஜ்நாத் சிங்கை முதல்வர் சந்திக்கிறார்.ஏப்ரல் 1-ஆம் தேதி காலை 10.30 மணிக்கு நிதி அமைச்சர் நிர்மலா சீதாராமனை, தமிழக நிதியமைச்சர் பழனிவேல் தியாகராஜனுடன் முதல்வர் சேர்ந்து சந்திக்கவுள்ள்ளார்.

சந்திப்பிற்கான காரணம்:

மேலும், 1 ஆம் தேதி மாலை 4.30-க்கு மத்திய அமைச்சர் பியூஸ் கோயலை முதல்வர் ஸ்டாலின் சந்திக்கவுள்ளார்.தமிழக திட்டங்களுக்கான நிதி ஒதுக்கீடு,நீட் விலக்கு,மேகதாது, ஜிஎஸ்டி நிலுவை தொகை, நிவாரணம் உள்ளிட்டவைகள் தொடர்பாக மத்திய அமைச்சர்களை முதலமைச்சர் சந்திக்க உள்ளார் என்பது குறிப்பிடத்தக்கது.