UAE கோல்டன் விசா: இந்தியர்களுக்கு வாழ்நாள் முழுவதும் குடும்பத்துடன் வாழ அரிய வாய்ப்பு!

எமிரேட்சு : ஐக்கிய அரபு அமீரகம் (UAE) இந்தியர்களுக்கு கோல்டன் விசா திட்டத்தை ஏற்கனவே இருந்ததை விட இப்போது கொஞ்சம் எளிதாக்கியுள்ளது. ரூ.23 லட்சம் (1 லட்சம் திர்ஹாம்) செலுத்தினால், குடும்பத்துடன் நிரந்தரமாக தங்குவதற்கு வழிவகை செய்யும் கோல்டன் விசாவைப் பெறலாம் என அறிவிக்கப்பட்டுள்ளது. இந்த விசா மூலம் இந்தியர்கள் அமீரகத்தில் வேலை செய்யவும், தொழில் தொடங்கவும், முதலீடு செய்யவும் முடியும். முன்பு இந்த விசாவுக்கு 48 லட்சம் ரூபாய் (10 மில்லியன் திர்ஹாம்) முதலீடு தேவைப்பட்ட நிலையில், புதிய அறிவிப்பு தகுதி வரம்பை குறைத்து, அதிக இந்தியர்களுக்கு வாய்ப்பு அளிக்கிறது.

இந்த கோல்டன் விசா வைத்திருப்பவர்கள் அமீரகத்தில் 10 ஆண்டுகள் வரை எவ்வித கட்டுப்பாடுகளின்றி தங்கலாம், பணியாற்றலாம் மற்றும் வணிகங்களில் 100% உரிமையைப் பெறலாம். இந்த விசாவுக்கு வயது, இனம், மொழி போன்ற எந்த வரம்பும் இல்லை, மேலும் குடும்ப உறுப்பினர்களுக்கும் இந்த சலுகை நீட்டிக்கப்படுகிறது. இந்தத் திட்டம், திறமையானவர்களையும் முதலீட்டாளர்களையும் ஈர்க்கும் வகையில் 2019-ல் தொடங்கப்பட்டது, தற்போது புதிய மாற்றங்களுடன் மேலும் கவர்ச்சிகரமாக உள்ளது.

துபாய், அபுதாபி உள்ளிட்ட எமிரேட்களில் ரியல் எஸ்டேட் முதலீடு, வணிகம், கல்வி மற்றும் ஆராய்ச்சி உள்ளிட்ட துறைகளில் ஈடுபட விரும்புவோருக்கு இந்த விசா பயனுள்ளதாக இருக்கும். மாணவர்கள், மருத்துவர்கள், விஞ்ஞானிகள், கலைஞர்கள், நடிகர்கள் உள்ளிட்ட பல துறைகளைச் சேர்ந்தவர்களுக்கு இந்த விசா வழங்கப்பட்டு வருகிறது. எடுத்துக்காட்டாக, தமிழ் நடிகர்கள் ரஜினிகாந்த், கமல்ஹாசன், விஜய் சேதுபதி மற்றும் மருத்துவர் நஸ்ரின் பேகம் ஆகியோர் இதைப் பெற்றுள்ளனர்.

இந்த புதிய அறிவிப்பு, இந்தியர்கள் உள்ளிட்ட வெளிநாட்டவர்களை அமீரகத்தில் முதலீடு செய்யவும், நிரந்தரமாக தங்கவும் ஊக்குவிக்கும் நோக்கம் கொண்டது. ரூ.23 லட்சம் முதலீட்டில் கோல்டன் விசாவைப் பெறுவது, அமீரகத்தில் புதிய வாழ்க்கையைத் தொடங்க விரும்புவோருக்கு பெரும் வாய்ப்பாக அமைகிறது. இதற்கு விண்ணப்பிக்க, அமீரக அரசின் அதிகாரப்பூர்வ இணையதளம் அல்லது அமர் சேவை மையங்கள் வழியாக செயல்முறைகளை மேற்கொள்ளலாம். விருப்பம் உள்ளவர்கள் தேவையான ஆவணங்களை வைத்து விண்ணப்பம் செய்து கொள்ளலாம்.