விம்பிள்டன் 2025 : சாம்பியன் பட்டம் வென்ற ஜானிக் சின்னர்! பரிசுத்தொகை எவ்வளவு தெரியுமா?

லண்டன் : 2025 விம்பிள்டன் ஆடவர் ஒற்றையர் இறுதிப்போட்டியில், இத்தாலியின் முதல் நிலை வீரர் ஜானிக் சின்னர், நடப்பு சாம்பியனான ஸ்பெயின் வீரர் கார்லஸ் அல்காரஸை 4-6, 6-4, 6-4, 6-4 என்ற செட் கணக்கில் வீழ்த்தி, தனது முதல் விம்பிள்டன் பட்டத்தை வென்றார். இந்த வெற்றியின் மூலம், விம்பிள்டனின் 148 ஆண்டு கால வரலாற்றில் ஆடவர் ஒற்றையர் பட்டம் வென்ற முதல் இத்தாலிய வீரர் என்ற பெருமையை சின்னர் பெற்றார். இந்தப் போட்டி, லண்டனில் உள்ள ஆல் இங்கிலாந்து கிளப் மைய மைதானத்தில் (சென்டர் கோர்ட்) ஜூலை 13, 2025 அன்று மூன்று மணி நேரம் நான்கு நிமிடங்கள் நடைபெற்றது.

முதல் செட்டை அல்காரஸ் 6-4 என கைப்பற்றினார், ஆனால் சின்னர் அடுத்த மூன்று செட்களில் தனது துல்லியமான ஆட்டத்தால் ஆதிக்கம் செலுத்தினார். முதல் செட்டில் 4-2 என முன்னிலை பெற்றிருந்த சின்னர், அல்காரஸின் அபாரமான திருப்புமுனை ஆட்டத்தால் பின்னடைவை சந்தித்தார். இருப்பினும், இரண்டாவது செட்டில் ஆரம்பத்தில் அல்காரஸை பிரேக் செய்து, தனது சர்வீஸை உறுதியாக பிடித்து 6-4 என வென்றார். மூன்றாவது மற்றும் நான்காவது செட்களிலும் சின்னரின் தாக்குதல் ஆட்டமும், அழுத்தமான சர்வீஸும் அல்காரஸை மீண்டு வர விடாமல் தடுத்தன. இந்த வெற்றி, சின்னரின் நான்காவது கிராண்ட்ஸ்லாம் பட்டமாகவும், புல் தரை மைதானத்தில் அவரது முதல் பட்டமாகவும் அமைந்தது.

இந்த வெற்றியின் மூலம், சின்னர் 3 மில்லியன் பவுண்டுகள் (தோராயமாக 34 கோடி ரூபாய்) பரிசுத் தொகையைப் பெற்றார், அதே நேரத்தில் இறுதிப்போட்டியில் தோல்வியடைந்த அல்காரஸுக்கு 1.52 மில்லியன் பவுண்டுகள் (தோராயமாக 17 கோடி ரூபாய்) வழங்கப்பட்டது. இந்த ஆண்டு விம்பிள்டன் பரிசுத் தொகை, முந்தைய ஆண்டை விட 11% உயர்ந்து, மொத்தம் 53.5 மில்லியன் பவுண்டுகளாக உயர்த்தப்பட்டது. இந்தப் போட்டி, சின்னர் மற்றும் அல்காரஸ் இடையேயான பரபரப்பான போட்டியை மீண்டும் வெளிப்படுத்தியது, இது கடந்த ஜூன் மாதம் பிரெஞ்சு ஓபன் இறுதிப்போட்டியில் அல்காரஸிடம் சின்னர் தோல்வியடைந்ததற்கு பழிவாங்கும் வெற்றியாகவும் அமைந்தது.

விம்பிள்டன் நிர்வாகம், சின்னரின் இந்த வரலாற்று வெற்றியை, நடிகர் விஜய்யின் ‘ஜனநாயகன்’ திரைப்படத்தின் போஸ்டர் ஸ்டைலில் ஒரு சிறப்பு போஸ்டர் வெளியிட்டு கொண்டாடியது. இது, 2023ஆம் ஆண்டு அல்காரஸின் வெற்றியை விஜய்யின் ‘மாஸ்டர்’ திரைப்பட போஸ்டர் ஸ்டைலில் விம்பிள்டன் கொண்டாடியதைப் போலவே, ரசிகர்களிடையே பெரும் வரவேற்பைப் பெற்றது. மேலும், சின்னர் மற்றும் அல்காரஸ், கடந்த இரண்டு ஆண்டுகளாக ஆண்கள் டென்னிஸில் ஆதிக்கம் செலுத்தி வருகின்றனர், கடந்த 12 கிராண்ட்ஸ்லாம்களில் 9 பட்டங்களை இருவரும் பகிர்ந்து கொண்டுள்ளனர் என்பதும் குறிப்பிடத்தக்கது.