நெல்லை : 10-ம் வகுப்பு மாணவன் தற்கொலை.. 2 பேருந்துகளுக்கு தீ வைப்பு!

நெல்லை : மாவட்டம் வீரவநல்லூரில் உள்ள தனியார் மெட்ரிகுலேஷன் மேல்நிலைப் பள்ளியில் 10ஆம் வகுப்பு படித்து வந்த 17 வயது மாணவன் கவின் குமார், ஜூலை 17, 2025 அன்று தற்கொலை செய்து கொண்ட சம்பவம் பெரும் அதிர்ச்சியை ஏற்படுத்தியுள்ளது. மாணவனின் பெற்றோர் மற்றும் உறவினர்கள், இந்த மரணத்திற்கு பள்ளி நிர்வாகத்தின் அலட்சியமே காரணம் எனக் குற்றம்சாட்டி, மாணவனின் உடலுடன் வீரவநல்லூர் காவல் நிலையம் முன்பு போராட்டத்தில் ஈடுபட்டனர்.

இந்தப் போராட்டத்தின் போது, சிலர் ஆத்திரத்தில் தனியார் பள்ளியின் இரண்டு பேருந்துகளை எரித்ததால், பகுதியில் பதற்றமான சூழல் உருவாகியது. இந்தச் சம்பவம், உள்ளூர் மக்கள் மத்தியில் பெரும் கொந்தளிப்பை ஏற்படுத்தியுள்ளது. கவின் குமார், சென்னை மாநகராட்சியில் ஒப்பந்தத் தொழிலாளியாகப் பணிபுரியும் மகேஷ் என்பவரின் மகன். பள்ளியில் உடற்கல்வி ஆசிரியர் வெங்கடேசன் கடந்த 7-ஆம் தேதி பெற்றோருடன் பள்ளிக்கு வருமாறு அவரைப் பகிரங்கமாக திட்டி, அவமானப்படுத்தியதாகவும் பெற்றோர் குற்றம்சாட்டி உள்ளதாகவும் தகவல்கள் வெளியாகியுள்ளது.  இந்த அவமானத்தால் மனமுடைந்த மாணவன், பள்ளி வளாகத்தில் வைத்து பூச்சிக்கொல்லி மருந்தை குடித்துவிட்டு பள்ளியிலேயே மாணவன் மயங்கி விழுந்துள்ளார்.

இதையடுத்து, பள்ளி நிர்வாகத்தின் மீது கடும் கோபமடைந்த பெற்றோரும், உறவினர்களும், நீதி கேட்டு வீரவநல்லூர் காவல் நிலையம் முன்பு உடலுடன் போராட்டத்தில் ஈடுபட்டனர். இந்தப் போராட்டம், அப்பகுதியில் பெரும் பரபரப்பை ஏற்படுத்தியது. போராட்டத்தின் போது, சிலர் கோபத்தில் தனியார் பள்ளியின் இரண்டு பேருந்துகளை எரித்தனர், மேலும் பள்ளி வளாகத்தில் உள்ள சொத்துகளையும் சேதப்படுத்தினர். இதனால், வீரவநல்லூரில் பதற்றமான சூழல் நிலவியது, மேலும் காவல்துறையினர் கூடுதல் பாதுகாப்பிற்காக அப்பகுதியில் குவிக்கப்பட்டனர்.

மாணவனின் மரணம் தொடர்பாக, உடற்கல்வி ஆசிரியர் வெங்கடேசன், மற்றொரு ஆசிரியர் செல்லபாண்டியன், மற்றும் பள்ளி முதல்வர் மீது, இந்திய தண்டனைச் சட்டத்தின் 305வது பிரிவின் கீழ் (குழந்தையின் தற்கொலையைத் தூண்டுதல்) வழக்கு பதிவு செய்யப்பட்டுள்ளது. காவல்துறை இந்த வழக்கை தீவிரமாக விசாரித்து வருகிறது.