மகளிர் ஆசிய சாம்பியன்ஸ் ட்ராஃபி ஹாக்கி போட்டி – இந்திய அணி 4வது அசத்தல் வெற்றி!

[image source:x/kssiddhu]

மகளிருக்கான 7-வது ஆசிய சாம்பியன்ஸ் ட்ராஃபி ஹாக்கி போட்டி ஜார்கண்ட் மாநில தலைநகர் ராஞ்சியில் உள்ள ஜெய்பால் சிங் ஸ்டேடியத்தில் அக்டோபர் 27ம் தேதி முதல் நடைபெற்று வருகிறது. இதில், நடப்பு சாம்பியன் ஜப்பான், 3 முறை சாம்பியனான தென்கொரியா, முன்னாள் சாம்பியனான இந்தியா மற்றும் சீனா, மலேசியா, தாய்லாந்து ஆகிய 6 அணிகள் பங்கேற்றுள்ள ஆசிய சாம்பியன்ஸ் ட்ராஃபி ஹாக்கி போட்டி நவம்பர் 5-ம் தேதி வரை நடைபெறவுள்ளது.

ஆசிய சாம்பியன்ஸ் ட்ராஃபி ஹாக்கி போட்டியில் இந்திய மகளிர் ஹாக்கி அணி சிறப்பாக செயல்பட்டு தொடர் வெற்றிகளை பெற்று வருகிறது. அதன்படி, நேற்று முன்தினம் நடந்த லீக் போட்டியில் இந்தியா 2-1 கோல் கணக்கில் சீனாவை வீழ்த்தி ஹாட்ரிக் வெற்றியை பதிவு செய்தது. இதனைத்தொடர்ந்து நடப்பு சாம்பியனான ஜப்பானை நேற்று இரவு இந்திய ஹாக்கி மகளிர் எதிர்கொண்டது. இப்போட்டி மீது மிகுந்த எதிர்பார்ப்பு இருந்தது.

2023 பலோன் டி’ஓர் விருது : சிறந்த கால்பந்தாட்ட வீரர் மெஸ்ஸி.!

இந்த நிலையில், நேற்றிரவு நடந்த போட்டியில் இந்திய அணி 2-1 என்ற கோல் கணக்கில் நடப்பு சாம்பியன் ஜப்பானை வீழ்த்தி அசத்தலான வெற்றியை பதிவு செய்தது. இந்திய அணியில், நவ்னீத் கவுர் (31-வது நிமிடம்) சங்கீதா குமாரி (47-வது நிமிடம்) கோல் அடித்து அசத்தினர். இதன் மூலம் ஆசிய சாம்பியன்ஸ் ட்ராஃபி ஹாக்கி போட்டியில் தொடர்ந்து 4-வது வெற்றியை பதிவு செய்த இந்திய அணி 12 புள்ளிகளுடன் முதலிடத்தில் உள்ளது.

மேலும், நடப்பு சாம்பியன் ஜப்பான் ஹாக்கி மகளிர் அணி 3 வெற்றி, ஒரு தோல்வி அடைந்து புள்ளி பட்டியலில் 9 புள்ளிகளுடன் 2-வது இடத்தில் இருக்கிறது. இந்திய அணி ஏற்கனவே அரை இறுதியை எட்டிவிட்ட நிலையில், தனது கடைசி லீக் ஆட்டத்தில் தென்கொரியாவை நாளை சந்திக்க உள்ளது என்பது குறிப்பிடத்தக்கது.