சாத்தான்குளம் வழக்கில் புதிய திருப்பம்! ஸ்ரீதர் அப்ரூவராக மாற எதிர்ப்பு!

மதுரை : சாத்தான்குளம் காவல் நிலையத்தில் 2020-ல் ஜெயராஜ் மற்றும் அவரது மகன் பென்னிக்ஸ் காவலில் உயிரிழந்த வழக்கில், முதன்மை குற்றவாளியான முன்னாள் காவல் ஆய்வாளர் எஸ். ஸ்ரீதர், அரசுத் தரப்பு சாட்சியாக (அப்ரூவர்) மாறுவதற்கு மதுரை முதல் கூடுதல் மாவட்ட மற்றும் அமர்வு நீதிமன்றத்தில் மனு தாக்கல் செய்தார். இந்த மனுவுக்கு, ஜெயராஜின் மனைவி செல்வராணி மற்றும் அவரது குடும்பத்தினர் கடும் எதிர்ப்பு தெரிவித்தனர்.

செல்வராணி தரப்பு, “ஜெயராஜ் மற்றும் பென்னிக்ஸை அடிக்கும்போது ஸ்ரீதர் அங்கு இருந்து ரசித்தார். ‘நன்றாக அடி’ என்று உதவி ஆய்வாளர்களுக்கு உத்தரவிட்டார்,” என வாதிட்டு, இந்த வழக்கில் அப்ரூவர் தேவையில்லை என்று கூறியது. இதனையடுத்து, மனு குறித்து முடிவெடுக்கப்படும் என்று நீதிமன்றம் தெரிவித்துள்ளது.

செல்வராணி தரப்பு வழக்கறிஞர், “ஜெயராஜ் மற்றும் பென்னிக்ஸ் மீது தாக்குதல் நடந்தபோது, ஸ்ரீதர் ‘சத்தம் வரவில்லை, நன்றாக அடி’ என்று உதவி ஆய்வாளரிடம் கூறியதாகவும், அவர்களின் அலறல் சத்தத்தை ரசித்ததாகவும் சாட்சியங்கள் உள்ளன. இந்த வழக்கில் பல காவல் துறை சாட்சிகள் உள்ளதால், ஸ்ரீதரை அப்ரூவராக ஏற்க வேண்டிய அவசியமில்லை,” என்று வாதிட்டார். மேலும், ஸ்ரீதரின் மனு விசாரணையை தாமதப்படுத்தும் நோக்கத்துடன் தாக்கல் செய்யப்பட்டதாகவும் குற்றம்சாட்டினார்.

சிபிஐயும் இந்த மனுவுக்கு எதிர்ப்பு தெரிவித்து, ஸ்ரீதர் முதன்மை குற்றவாளி மற்றும் சதித்திட்டத்தின் மூல காரணமாக இருந்தவர் என்று கூறி, அவருக்கு எந்தவித சலுகையும் அளிக்கக் கூடாது என்று வலியுறுத்தியது. 2020 ஜூன் 19-ல், தூத்துக்குடி மாவட்டம் சாத்தான்குளத்தில், கோவிட்-19 ஊரடங்கு விதிகளை மீறியதாகக் கூறி, ஜெயராஜ் மற்றும் அவரது மகன் பென்னிக்ஸை காவல் நிலையத்தில் காவலர்கள் கடுமையாகத் தாக்கியதாகக் குற்றச்சாட்டு எழுந்தது.

இந்தத் தாக்குதலில் இருவரும் பலத்த காயங்களால் ஜூன் 22 மற்றும் 23-ல் கோவில்பட்டி சிறையில் உயிரிழந்தனர். இந்த வழக்கில், ஸ்ரீதர் உள்ளிட்ட 10 காவலர்கள் கைது செய்யப்பட்டனர், ஒருவர் விசாரணையின்போது இறந்தார். தற்போது மதுரை மத்திய சிறையில் அடைக்கப்பட்டுள்ள ஸ்ரீதர், ஏழு முறை ஜாமீன் மனு தாக்கல் செய்து நிராகரிக்கப்பட்ட பின்னர், அப்ரூவர் ஆக மாறுவதற்கு மனு தாக்கல் செய்துள்ளார்.

செல்வராணி தரப்பு, “இந்த வழக்கில் ஸ்ரீதரின் மனு தேவையற்றது, இதைத் தள்ளுபடி செய்ய வேண்டும்,” என்று கோரியுள்ளது. சிபிஐயும், “லத்திகள், காவல் நிலைய அறைகள் மற்றும் கழிவறைகளில் இருந்து பெறப்பட்ட டி.என்.ஏ ஆதாரங்கள் உள்ளிட்டவை ஸ்ரீதருக்கு எதிராக வலுவான ஆதாரங்களாக உள்ளன,” என்று கூறி, அவரை அப்ரூவராக ஏற்கக் கூடாது என்று வாதிட்டது. இந்த வழக்கு, நாடு முழுவதும் பெரும் அதிர்ச்சியை ஏற்படுத்தியதால், நீதிமன்றத்தின் முடிவு பெரிதும் எதிர்பார்க்கப்படுகிறது. மதுரை மாவட்ட நீதிமன்றம், ஜூலை 28-ல் இந்த மனு குறித்து முடிவெடுக்கப்படும் என்று அறிவித்துள்ளது.