டெல்லி : இந்தியாவில் 6 லட்சம் ரூபாய்க்குக் குறைவான பட்ஜெட்டில், தினசரிப் பயன்பாட்டிற்கு ஒரு நல்ல ஹேட்ச்பேக் (Hatchback) காரைத் தேர்ந்தெடுப்பது எளிதான காரியம் அல்ல. இந்த பட்ஜெட் பிரிவில் இரண்டு கார்கள் நீண்ட காலமாக நடுத்தரக் குடும்பங்களின் பேராதரவைப் பெற்று வருகின்றன. ஒன்று, பயணிகளின் பாதுகாப்பிற்கு முக்கியத்துவம் தரும் 'டாடா டியாகோ' (Tata Tiago); மற்றொன்று, இந்தியர்களின் செல்லப்பிள்ளையான 'மாருதி சுசுகி வேகன்ஆர்' (Maruti Suzuki WagonR).
ஒரு கார் தரம் மற்றும் பாதுகாப்பை முதன்மையாகக் கொண்டிருக்க, மற்றொரு காரோ அதிக இடவசதி மற்றும் பெட்ரோல் சிக்கனத்தைக் குறிவைக்கிறது. இந்த இரண்டு கார்களின் விலை, மைலேஜ், பாதுகாப்பு மற்றும் ஒட்டுமொத்த மதிப்பு என்ன என்பதைப் பற்றி இந்த செய்தியில் விவரமாக பார்ப்போம். பார்த்துவிட்டு உங்களுக்கு எந்த கார் பிடிக்கிறதோ வாங்கிக்கொள்ளுங்கள்.
விலை விபரம்
காரை வாங்கும் போது பட்ஜெட்டைத் தீர்மானிப்பதில் எக்ஸ்-ஷோரூம் விலையே முக்கியப் பங்கு வகிக்கிறது. ஆரம்ப விலையைப் பொறுத்தவரை டாடா டியாகோ கார் சற்று குறைவாகத் தொடங்குகிறது. இதன் அடிப்படை பெட்ரோல் மாடல் தோராயமாக ரூ. 4.69 லட்சம் முதல் கிடைக்கிறது. ஆனால், இதன் அனைத்து வசதிகளும் நிறைந்த டாப்-எண்ட் மாடல்கள் (ஃபேக்டரி சிஎன்ஜி மற்றும் ஏஎம்டி ஆட்டோமேட்டிக் உட்பட) ரூ. 8.55 லட்சம் வரை உயர்கிறது.
மறுபுறம், மாருதி வேகன்ஆர் காரின் அடிப்படை எல்எக்ஸ்ஐ (LXI) வேரியண்ட் தோராயமாக ரூ. 4.99 லட்சம் என்ற சற்று கூடுதலான விலையில் தொடங்குகிறது. இருப்பினும், இதன் மிட் மற்றும் டாப்-எண்ட் மாடல்களின் விலை நடுத்தர வர்க்கத்தினருக்குப் பெரிய சுமையாக இல்லாமல், அதிகபட்சமாக ரூ. 7.24 லட்சம் என்ற அளவிலேயே முடிந்துவிடுகிறது. சுருக்கமாகச் சொன்னால், ஆரம்ப விலையில் டியாகோ மலிவாக இருந்தாலும், டாப் மாடல்களை வாங்குவதற்கு வேகன்ஆர் காரே சிக்கனமானதாக உள்ளது.
மைலேஜ்
தினசரி ஆபீஸ் அல்லது குடும்பப் பயன்பாட்டிற்குப் பயன்படுத்தும் போது, மாதந்தோறும் ஆகும் பெட்ரோல் செலவு மிகவும் முக்கியமானது. இந்த விஷயத்தில் மாருதி நிறுவனத்தின் கே-சீரிஸ் (K-Series) இன்ஜின்கள் எப்போதும் போல அசைக்க முடியாத இடத்தில் உள்ளன. பெட்ரோல் வேகன்ஆர் கார் (1.0L அல்லது 1.2L இன்ஜின் ஆப்ஷன்களில்) ஒரு லிட்டருக்கு 23.56 முதல் 25.19 கி.மீ வரை அசாத்திய மைலேஜை அள்ளித் தருகிறது. இதன் எஸ்-சிஎன்ஜி (S-CNG) வேரியண்ட் ஒரு கிலோவிற்கு 34.05 கி.மீ என்ற இமாலய மைலேஜைக் கொடுத்து மற்ற கார்களைப் பின்னுக்குத் தள்ளுகிறது.
இதற்கு நேர்மாறாக, டாடா டியாகோ கார் பெட்ரோலில் ஒரு லிட்டருக்கு 19.01 முதல் 20.09 கி.மீ வரை டீசன்ட்டான மைலேஜை வழங்குகிறது. இதன் புதுமையான ட்வின்-சிலிண்டர் சிஎன்ஜி (Twin-Cylinder CNG) தொழில்நுட்பம் காரின் பூட் ஸ்பேஸை (டிவிகி பாக்ஸ் வைக்கும் இடம்) வீணாக்காமல், ஒரு கிலோவிற்கு 26.49 கி.மீ மைலேஜை உறுதி செய்கிறது. மைலேஜ் பந்தயத்தில் மாருதி வேகன்ஆர் காரே இங்கு மிகத் தெளிவான வெற்றியைப் பெறுகிறது.
பாதுகாப்பு vs கேபின் இடவசதி
இந்த இரண்டு கார்களும் முற்றிலும் மாறுபட்ட இரண்டு கொள்கைகளைக் கொண்டுள்ளன. டாடா டியாகோ கார் குளோபல் என்சிஏபி (Global NCAP) விபத்து சோதனையில் 4-ஸ்டார் பாதுகாப்பு மதிப்பீட்டைப் (4-Star Rating) பெற்று, இந்த பட்ஜெட்டில் இந்தியாவின் மிகப்பாதுகாப்பான காராகத் திகழ்கிறது. இதன் பலமான சேசிஸ் வடிவமைப்பு நெடுஞ்சாலைகளில் அதிவேகமாகச் செல்லும் போதும் வண்டிக்கு நல்ல ஸ்டெபிலிட்டியைத் தருகிறது. உள்ளே பிரீமியம் தரத்திலான 7-இன்ச் ஹர்மன் (Harman) இன்ஃபோடெயின்மென்ட் சிஸ்டமும் உள்ளது.
மறுபுறம், மாருதி வேகன்ஆர் கார் தனது புகழ்பெற்ற 'டால்-பாய்' (Tall-boy) வடிவமைப்பால் காருக்குள் தாராளமான இடவசதியை (Cabin Space) வழங்குகிறது. உயரம் அதிகமான பயணிகள் கூட மிக எளிதாக ஏறி, இறங்கும் வகையில் இதன் கூரை உயரமாக அமைக்கப்பட்டுள்ளது. மேலும், இதில் 341 லிட்டர் கொள்ளளவு கொண்ட பிரம்மாண்ட பூட் ஸ்பேஸ் உள்ளது (டியாகோவில் 242 லிட்டர் மட்டுமே). ஆனால், பாதுகாப்பைப் பொறுத்தவரை இது விபத்து சோதனையில் வெறும் 1-ஸ்டார் மட்டுமே பெற்று மிகவும் பின்தங்கியுள்ளது.
எந்த காரைத் தேர்ந்தெடுக்கலாம்?
நெடுஞ்சாலைப் பயணங்கள் அதிகம் உள்ளவர்கள், குடும்பத்தினரின் பாதுகாப்புக்கு முதல் முக்கியத்துவம் தருபவர்கள், நல்ல கையாளுமை மற்றும் பிரீமியம் லுக் கொண்ட ஒரு கார் வேண்டும் என்று நினைப்பவர்கள் தாராளமாக Tata Tiago காரைத் தேர்ந்தெடுக்கலாம்.
அதே சமயம், நகரத்திற்குள் ஓட்டுவதற்கு அதிக இடவசதியும், பெரிய லக்கேஜ் வைக்கும் இடமும் தேவைப்படுபவர்கள், குறைந்த பராமரிப்புச் செலவில் மிக எளிமையான ஆட்டோமேட்டிக் (AMT) கார் வேண்டும் என்று நினைப்பவர்கள் மற்றும் மைலேஜில் உச்சகட்ட சேமிப்பை எதிர்பார்க்கும் நடுத்தரக் குடும்பங்கள் Maruti Suzuki WagonR காரை தங்களது இல்லத்திற்குத் தேர்வு செய்யலாம்.