இந்தியாவில் 5 ஆண்டுகளுக்குப் பிறகு சீனர்களுக்கு சுற்றுலா விசா!
சீன குடிமக்கள் இந்தியாவுக்கு சுற்றுலா வருவதற்கான விசா சேவை, 5 ஆண்டுகளுக்குப் பிறகு மீண்டும் நாளை முதல் (ஜூலை 24) தொடங்கப்படவுள்ளது.
டெல்லி : ஜூலை 23 அன்று, சீனாவில் உள்ள இந்திய தூதரகம் ஒரு அறிக்கை வெளியிட்டு, சீன குடிமக்கள் இந்தியாவுக்கான சுற்றுலா விசாவிற்கு விண்ணப்பிக்கும் எளிய முறைகளை விளக்கியது. சீன பயணிகள் முதலில் ஆன்லைனில் விசா விண்ணப்பத்தை பூர்த்தி செய்ய வேண்டும், பின்னர் பெய்ஜிங், ஷாங்காய் அல்லது குவாங்சோவில் உள்ள இந்திய விசா விண்ணப்ப மையங்களில் முன்பதிவு செய்து சந்திப்பு நேரம் பெற வேண்டும். அதன் பிறகு, தங்கள் பாஸ்போர்ட் மற்றும் தேவையான ஆவணங்களை நேரில் சென்று சமர்ப்பிக்க வேண்டும். குறிப்பாக, பெய்ஜிங் மையத்தில் பாஸ்போர்ட்டை திரும்பப் பெற விரும்புவோர், ஒரு அதிகாரப்பூர்வ பாஸ்போர்ட் திரும்பப் பெறுதல் கடிதத்தை இணைக்க வேண்டும் என்று தூதரகம் தெளிவாகக் குறிப்பிட்டுள்ளது.
இந்த வழிமுறைகள், விசா செயல்முறையை எளிதாகவும் ஒழுங்காகவும் மாற்றுவதற்காக அறிமுகப்படுத்தப்பட்டுள்ளன.2020-ல் கோவிட்-19 தொற்றுநோய் மற்றும் கல்வான் பள்ளத்தாக்கு மோதல்களால் இந்தியா-சீனா இடையேயான உறவுகள் பெரிதும் பாதிக்கப்பட்டன. இதனால், இரு நாடுகளுக்கு இடையேயான பயணங்கள் கடுமையாக தடைபட்டன, குறிப்பாக சுற்றுலா பயணங்கள் முற்றிலும் நிறுத்தப்பட்டன. இருப்பினும், சீனா படிப்படியாக இந்திய மாணவர்கள் மற்றும் வணிகர்களுக்கு விசாக்களை மீண்டும் வழங்கத் தொடங்கியது.
1962-ல் நடந்த கல்வான் மோதல்களுக்கு பிறகு, இரு நாடுகளின் உறவு மிகவும் மோசமான நிலைக்கு சென்றிருந்தது. ஆனால், சமீப காலங்களில், இராஜதந்திர மற்றும் ராணுவ பேச்சுவார்த்தைகள் மூலம் பதற்றங்கள் குறைக்கப்பட்டு, உறவை மேம்படுத்துவதற்கான முயற்சிகள் தொடங்கப்பட்டுள்ளன. 2024 அக்டோபரில், கிழக்கு லடாக்கில் உள்ள உண்மையான கட்டுப்பாட்டுக் கோடு (LAC) பகுதியில் உள்ள டெப்சாங் மற்றும் டெம்சோக் ஆகிய மோதல் பகுதிகளில் இருந்து இரு நாட்டு படைகளையும் திரும்பப் பெறுவதற்கு ஒரு ஒப்பந்தம் உறுதி செய்யப்பட்டது.
இதைத் தொடர்ந்து, பிரதமர் நரேந்திர மோடியும் சீன ஜனாதிபதி ஜி ஜின்பிங்கும் கசானில் சந்தித்து, இரு நாடுகளுக்கும் இடையேயான உறவை மேம்படுத்துவது குறித்து முக்கிய முடிவுகளை எடுத்தனர். இந்த பேச்சுவார்த்தைகள், இரு நாடுகளுக்கு இடையேயான பதற்றத்தை குறைத்து, ஒத்துழைப்பை மேம்படுத்துவதற்கு ஒரு திருப்புமுனையாக அமைந்தது.
2025-ன் தொடக்கத்தில், இந்தியாவும் சீனாவும் தங்கள் உறவை மீண்டும் கட்டியெழுப்புவதற்கு பல்வேறு வழிகளை ஆராய்ந்தன. மக்களிடையேயான தொடர்புகளை வலுப்படுத்துவதற்காக, நேரடி விமான சேவைகளை மீண்டும் தொடங்குவது மற்றும் கைலாஷ் மானசரோவர் யாத்திரையை மீண்டும் தொடங்குவது போன்ற முயற்சிகளுக்கு இரு நாடுகளும் ஒப்புக்கொண்டன. கோவிட்-19 தொற்றுநோய் காரணமாக இந்த யாத்திரை 2020 முதல் நிறுத்தப்பட்டிருந்தது.
இந்த முயற்சிகள், இரு நாடுகளுக்கு இடையேயான பயணத்தையும் கலாசார பரிமாற்றத்தையும் ஊக்குவிக்கும் என்று எதிர்பார்க்கப்படுகிறது.இந்த ஆண்டு ஏப்ரலில், இந்திய வெளியுறவு அமைச்சர் எஸ். ஜெய்சங்கர், இந்தியா-சீன உறவு “நேர்மறையான திசையை” நோக்கி நகர்ந்து வருவதாகவும், இரு நாடுகளுக்கு இடையேயான உறவை இயல்பாக்குவதற்கு மேலும் முயற்சிகள் தேவை என்றும் கூறினார்.
