#ElectionBreaking: எஞ்சிய 3 தொகுதிகளுக்கான வேட்பாளர் பட்டியலை வெளியிட்ட பாஜக.!

சட்டப்பேரவை தேர்தலுக்கான பாஜகவில் மீதமுள்ள 3 தொகுதிகளின் வேட்பாளர் பட்டியல் தற்போது வெளியிடப்பட்டுள்ளது.

அதிமுக கூட்டணியில் இருக்கும் பாஜகவுக்கு 20 இடங்கள் ஒதுக்கப்பட்ட நிலையில், கடந்த 14ம் தேதி 17 தொகுதிகளுக்கான முதற்கட்ட வேட்பாளர் பட்டியலை பாஜக வெளியிட்டிருந்தது. அதன்படி, தாராபுரம் (தனி ) – எல்.முருகன், கோவை தெற்கு – வானதி சீனிவாசன், காரைக்குடி – ஹெச் .ராஜா, அரவக்குறிச்சி – அண்ணாமலை, நாகர்கோவில் – எம்.ஆர்.காந்தி, ஆயிரம் விளக்கு – குஷ்பு, துறைமுகம் – வினோஜ் பி.செல்வம் ஆகியோர் இடம்பெற்றிருந்தன.

மேலும், திருவண்ணாமலை – தணிகைவேல், மொடக்குறிச்சி – சி.கே.சரஸ்வதி,  திட்டக்குடி – பெரியசாமி, திருவையாறு – பூண்டி வெங்கடேசன், மதுரை வடக்கு – சரவணன், குளச்சல் -பி.ரமேஷ், திருநெல்வேலி – நயினார் நாகேந்திரன், ராமநாதபுரம் -டி.குப்புராமு, விருதுநகர் – பாண்டுரங்கன், திருக்கோவிலூர் – வி.ஏ.டி.கலிவரதன் உள்ளிட்டவர்களும் 17 பேரில் இடம்பிடித்திருந்தனர்.

இதனிடையே, திமுக கூட்டணியிலுள்ள காங்கிரஸ் 25 தொகுதிகள் ஒதுக்கப்பட்ட நிலையில், 21 தொகுதிகளுக்கான வேட்பாளர்களை மட்டுமே அறிவித்திருந்தனர். இரு கட்சிகளும் மீதுமுள்ள தொகுதிகளில் யார் வேட்பாளர் என காத்திருந்த நிலையில், நேற்று எஞ்சிய 4 தொகுதிகளுக்கான வேட்பாளர்களை காங்கிரஸ் அறிவித்தது. விளவங்கோடு- விஜயதரணி, வேளச்சேரி – ஜே.எம்.எச்.ஹசன், மயிலாடுதுறை – ராஜகுமார், குளச்சல் – பிரின்ஸ் ஆகியோர் அறிவிக்கப்பட்டன.

இந்நிலையில், பாஜகவில் மீதமுள்ள 3 தொகுதிகளின் வேட்பாளர் பட்டியல் தற்போது வெளியிடப்பட்டுள்ளது. அதன்படி, உதகை – போஜராஜன், விளவங்கோடு – ஜெயசீலன், தளி – நகேஷ்குமார் உள்ளிட்டவர்களை அறிவித்துள்ளது. இதில் குறிப்பாக மீண்டும் இந்தியில் வேட்பாளர் பட்டியலை வெளியிட்டுள்ளது பாஜக. காங்கிரஸ் கட்சியின் மீதமுள்ள வேட்பளார் யார் என்று அறிவிப்புக்கு காத்திருந்த பாஜக, தற்போது வேட்பாளர்களை அறிவித்துள்ளது என்பது குறிப்பிடத்தக்கது.