யூடியூப் புதிய விதிகள் : தரமற்ற வீடியோக்களுக்கு இனி காசு இல்லை!

யூடியூப் உலகம் முழுக்க 200 கோடிக்கும் மேற்பட்ட மக்களால் பயன்படுத்தப்படும் ஒரு பிரம்மாண்ட மேடையாக இருந்து வருகிறது.  இதில் பலர் வீடியோக்கள் பதிவேற்றி, விளம்பரங்கள் மூலம் பணம் சம்பாதிக்கிறார்கள். ஆரம்பத்தில், யார் வேண்டுமானாலும் வீடியோ போட்டு காசு பார்க்கலாம் என்று இருந்தது. அதன்பிறகு இதனை பயன்படுத்துவோரின் எண்ணிக்கை அதிகமாக சென்ற நிலையில்,  பிறகு, 1,000 சந்தாதாரர்கள் (subscribers) மற்றும் 4,000 மணிநேர பார்வைகள் (watch hours) அல்லது 10 மில்லியன் ஷார்ட்ஸ் பார்வைகள் (Shorts views) போன்ற கண்டிஷன்கள் வந்தன.

இப்போது, 2025 ஜூலை 15 முதல் யூடியூப் ஒரு பெரிய “கிளீனிங்” ஆரம்பித்துள்ளது. இனி, உண்மையான, தனித்துவமான, தரமான வீடியோக்களுக்கு மட்டுமே மதிப்பு என அதிரடியான மாற்றங்களும் கொண்டு வரப்பட்டுள்ளது.

என்ன மாற்றம்?

யூடியூப், தரமற்ற, ஒரே மாதிரியான, அல்லது “காப்பி-பேஸ்ட்” வீடியோக்களை கட்டுப்படுத்த விரும்புகிறது. சிலர் செயற்கை நுண்ணறிவு (AI) மூலமாகவோ, மற்றவர்களின் வீடியோக்களை மறுபயன்படுத்தியோ, பயனற்ற வீடியோக்களை பெருமளவில் பதிவேற்றுகிறார்கள். இவை பார்வையாளர்களுக்கு பயனில்லாமல், யூடியூபின் தரத்தை குறைக்கின்றன. இதனால், இனி இப்படியான வீடியோக்களுக்கு விளம்பரங்கள் மூலம் பணம் (monetization) கிடைக்காது. ஆனால், உண்மையாகவும், புதுமையாகவும், பயனுள்ள வீடியோக்கள் போடுபவர்களுக்கு எந்த பாதிப்பும் இல்லை.

யாரை பாதிக்கும்?

இந்த புதிய விதிகள் பின்வரும் வகை வீடியோக்களை பதிவேற்றுபவர்களை பாதிக்கும்

AI மட்டும் வீடியோக்கள்: AI கருவிகளை வைத்து, உங்கள் பங்களிப்பு இல்லாமல், உரை-பேச்சு (text-to-speech) குரல்களும், இணையத்தில் எடுக்கப்பட்ட படங்களும் (stock images) உள்ள வீடியோக்கள். உதாரணமாக, “10 சிறந்த பயண இடங்கள்” என்று AI குரலில், இணைய படங்களுடன் வீடியோ செய்வது.

மறுபயன்பாடு (காப்பி) வீடியோக்கள்: மற்றவர்களின் வீடியோ கிளிப்புகளை எடுத்து, எந்த மாற்றமும் இல்லாமல் அல்லது சிறு மாற்றங்களுடன் பதிவேற்றுவது இனிமேல் செய்யமுடியாது.

ஒரே மாதிரி வீடியோக்கள்: ஒரே கதையை அல்லது ஸ்லைடுஷோவை சிறு மாற்றங்களுடன் பலமுறை பதிவேற்றுவது. உதாரணமாக, “5 சிறந்த மொபைல்கள்” என்று ஒரே உள்ளடக்கத்தை 10 வீடியோக்களாக பதிவேற்றுவது இனிமேல் செய்யமுடியாது.

ரியாக்ஷன், கிளிப், AI வீடியோக்கள் பற்றி?

ரியாக்ஷன் மற்றும் கிளிப் வீடியோக்கள்: இவை தடை செய்யப்படவில்லை. ஆனால், உங்கள் வீடியோவில் உங்கள் சொந்த கருத்து அல்லது பொழுதுபோக்கு மதிப்பு இருக்க வேண்டும். உதாரணமாக, ஒரு பாடலுக்கு ரியாக்ஷன் செய்யும்போது, உங்கள் முகத்துடன், “இந்த பாடல் எனக்கு ஏன் பிடித்தது என்கிற காரணத்தை ” என்று சொன்னால், அது பணமாக்கப்படும்.

AI வீடியோக்கள்: AI கருவிகளை (எ.கா., ட்ரீம்ஸ்கிரீன், ஆட்டோ-டப்பிங்) பயன்படுத்தலாம். ஆனால், உங்கள் பங்களிப்பு (எ.கா., உங்கள் குரல், எடிட்டிங், கதை) இருக்க வேண்டும். AI பயன்படுத்துவதை வெளிப்படையாக சொல்ல வேண்டும்.

உதாரணமாக சொல்லவேண்டும் என்றால், AI குரலுடன், இணைய படங்களை வைத்து, “10 சிறந்த கார்கள்” என்று 20 ஒரே மாதிரி வீடியோக்கள் பதிவேற்றினால், பணமாக்குதல் நின்றுவிடும். அதைப்போல, ஒரு படத்தின் கிளிப்பை எடுத்து, உங்கள் முகத்துடன், “இந்த காட்சி ஏன் அருமையானது” என்று உங்கள் கருத்தை சொன்னால், பணமாக்குதல் தொடரும்.

படைப்பாளர்கள் என்ன செய்ய வேண்டும்?

உங்கள் வீடியோக்களில் உங்கள் கருத்து, கதை, அல்லது எடிட்டிங் சேர்க்கவும். உதாரணமாக, உங்கள் குரல், முகம், அல்லது உங்கள் பாணியில் எடிட்டிங். AI பயன்படுத்தினால், உங்கள் பங்களிப்பு முக்கியமாக இருக்கட்டும். பழைய வீடியோக்களை பரிசோதித்து, ஒரே மாதிரியானவற்றை மேம்படுத்தவும் அல்லது நீக்கவும். பார்வையாளர்களுக்கு பயனுள்ள, மகிழ்ச்சியான, அல்லது கற்றுக்கொடுக்கும் வீடியோக்கள் செய்யவும்.

ஏன் இந்த மாற்றம்?

சிலர் AI-ஐ வைத்து, மனித பங்களிப்பு இல்லாமல், தரமற்ற வீடியோக்களை பதிவேற்றி, பார்வைகளை மட்டும் நோக்கமாகக் கொள்கிறார்கள். இது யூடியூபின் தரத்தை குறைக்கிறது, விளம்பரதாரர்களின் நம்பிக்கையை பாதிக்கிறது. உண்மையான, ஆர்வமுள்ள படைப்பாளர்களை ஊக்குவிக்கவும், பார்வையாளர்களுக்கு தரமான வீடியோக்களை கொடுக்கவும் யூடியூப் இந்த மாற்றங்களை கொண்டு வந்துள்ளது.