டெல்லி : பைக் பிரியர்களின் ஆல்-டைம் பேவரைட் கஃபே ரேஸர் (Café Racer) பைக்கான ராயல் என்பீல்டு கான்டினென்டல் ஜிடி 650 (Royal Enfield Continental GT 650) மாடலின் புதிய அப்டேட் இந்திய சந்தையில் களமிறங்கியுள்ளது. இன்ஜின் மற்றும் மெக்கானிக்கல் விஷயங்களில் பெரிய மாற்றங்கள் இல்லை என்றாலும், பார்க்க இன்னும் ஸ்டைலாகவும், வசதியாகவும் சில செம அப்டேட்களைக் கொடுத்துள்ளார்கள்.

இதன் ஆரம்ப எக்ஸ்-ஷோரூம் விலை ரூ. 3.58 லட்சம் முதல் தொடங்கி, டாப் மாடலுக்கு ரூ. 3.88 லட்சம் வரை நிர்ணயம் செய்யப்பட்டுள்ளது.இந்த புதிய மாடலுக்கும், முந்தைய மாடலுக்கும் உள்ள வித்தியாசங்கள் என்ன, இதன் மைலேஜ் என்ன என்பதைப் பற்றி பார்ப்போம்.

முந்தைய மாடலுக்கும் புதிய மாடலுக்கும் உள்ள முக்கிய வித்தியாசங்கள்

முந்தைய மாடலோடு ஒப்பிடும் போது இந்த புதிய மாடலில் வெளிப்படையாகத் தெரியும் முதல் பெரிய வித்தியாசம் அதன் ஸ்டைலிங் மற்றும் வசதிகளில்தான் செய்யப்பட்டுள்ளது. பழைய மாடலில் சாதாரண ஹாலோஜன் இண்டிகேட்டர்கள் இருந்த இடத்தில், இப்போது பிரகாசமான புதிய எல்இடி (LED) இண்டிகேட்டர்கள் கொடுக்கப்பட்டுள்ளன. இது வண்டிக்கு ஒரு மாடர்ன் லுக்கைத் தருகிறது. அதே போல, வண்டியின் ஸ்பீடோமீட்டர் இருக்கும் பகுதிக்கு மேலே ஒரு புதிய பிளாக்-பெயிண்டட் இன்ஸ்ட்ருமென்ட் கௌல் (Instrument Cowl) எனப்படும் சிறிய கருப்பு நிறக் கவசம் சேர்க்கப்பட்டுள்ளது. இது பைக்கின் முன்பக்கத் தோற்றத்தை இன்னும் மிரட்டலாகக் காட்டுகிறது.

லாங் ரைடு போகும் போது மொபைல் சார்ஜ் தீர்ந்துவிடும் என்ற கவலையைத் தீர்க்க, இப்போது புதிதாக USB டைப்-சி ஃபாஸ்ட் சார்ஜிங் போர்ட் (USB Type-C Fast-Charging Port) வசதியும் சேர்க்கப்பட்டுள்ளது. இது முந்தைய மாடலில் கிடையாது.அடுத்த பெரிய வித்தியாசம் இதன் கலர் மற்றும் வீல் ஆப்ஷன்களில் நடந்துள்ளது. முந்தைய மாடலில் அபெக்ஸ் கிரே (Apex Grey) கலரில் மட்டுமே இன்ஜின், எக்சாஸ்ட் (சைலன்சர்) மற்றும் அலாய் வீல்கள் அனைத்தும் கருப்பு நிறத்தில் (Blacked-out) கொடுக்கப்பட்டிருந்தன.

ஆனால் இப்போது, பலருக்கும் பிடித்தமான ராக்கர் ரெட் (Rocker Red) வேரியண்ட்டிலும் இன்ஜின், சைலன்சர் மற்றும் காஸ்ட்-அலாய் வீல்கள் அனைத்தையும் முழுமையாகக் கருப்பு நிறமாக மாற்றி அசத்தியுள்ளார்கள். இதனால் பிரிட்டிஷ் ரேசிங் கிரீன் (British Racing Green) மற்றும் மிஸ்டர் கிளீன் (Mr Clean - Chrome) ஆகிய இரண்டு வேரியண்ட்கள் மட்டுமே பழையபடி பளபளக்கும் குரோம் இன்ஜின் மற்றும் கம்பி வீல்களுடன் (Spoke Wheels) தொடர்கின்றன.

இன்ஜின் பவர்

வண்டியின் வெளித்தோற்றத்தில் மாற்றங்கள் இருந்தாலும், இதன் இதயமான இன்ஜினில் ராயல் என்பீல்டு எந்த மாற்றமும் செய்யவில்லை. முந்தைய மாடலில் இருந்த அதே நம்பகமான 648cc, ஏர் அண்ட் ஆயில்-கூக்டு, பேரலல்-ட்வின் (Parallel-twin) இன்ஜின் தான் இதிலும் தொடர்கிறது. இது அதிகபட்சமாக 47 hp பவரையும், சீறிப்பாய உதவும் 52.3 Nm (டார்க்) அப்படியே வாரி வழங்குகிறது. இந்த அசுர பவரைச் சாலைகளுக்குக் கொண்டு செல்ல 6-ஸ்பீடு கியர்பாக்ஸ் இணைக்கப்பட்டுள்ளது. ஓட்டுவதற்கு பழைய மாடலைப் போலவே அதே முரட்டுத்தனமான பவரையும், அதிர்வுகள் இல்லாத ஸ்மூத்தான ரைடிங் அனுபவத்தையும் இது கொடுக்கிறது.

மைலேஜ் விவரம்

இந்த பைக் 650சிசி எஞ்சின் கொண்ட ஒரு ஹெவிவெயிட் பெர்ஃபாமன்ஸ் பைக் என்பதால், இதனிடம் 100சிசி வண்டிகள் போல மைலேஜை எதிர்பார்க்க முடியாது. இருந்தாலும், இதன் செக்மென்ட்டுக்கு இது ஒரு சிறப்பான மைலேஜை வழங்குகிறது. இந்த புதிய மாடல் ஒரு லிட்டர் பெட்ரோலுக்கு தோராயமாக 22 முதல் 27 கி.மீ வரை மைலேஜ் தரும். நீங்கள் சிட்டி டிராஃபிக்கில் ஓட்டும்போது 22 கி.மீ வரையும், இதுவே நெடுஞ்சாலையில் (Highway) சீரான வேகத்தில் செல்லும்போது 27 கி.மீ வரைக்கும் மைலேஜை அசால்ட்டாகப் பெறலாம்.

புதிய மாடல் ஒர்த்-தா?

உங்களிடம் ஏற்கனவே பழைய கான்டினென்டல் ஜிடி 650 பைக் இருக்கிறது என்றால், நீங்கள் இந்த புதிய மாடலுக்கு மாற வேண்டிய அவசியம் பெரியதாக இல்லை. ஏன்னென்றால் இன்ஜின் பவரும் வண்டியின் குணமும் ஒன்றுதான். ஆனால், நீங்கள் முதன்முறையாக ஒரு பிரீமியம் கஃபே ரேஸர் பைக் வாங்கத் திட்டமிட்டுக்கொண்டிருக்கிறீர்கள் என்றால், இந்த புதிய மாடல் உங்களுக்கு மிகச்சிறந்த சாய்ஸ்! எல்இடி இண்டிகேட்டர்கள், மொபைல் சார்ஜர் போன்ற நவீன வசதிகளுடனும், ராக்கர் ரெட் கலரில் வந்துள்ள மாஸான பிளாக்-அவுட் லுக்கோடும் கிடைப்பதால், இந்த விலைக்கு இது செம ஒர்த்.