அணையை தமிழகமே கட்டட்டும்... செலவை நாங்கள் ஏற்கிறோம்! முல்லைப் பெரியாறு குறித்து கேரளம்!

கேரளம் : முதல்வர் வி.டி. சதிசன் (V.D. Satheesan) மாமல்லபுரத்தில் நடைபெற்ற தென் மண்டல கவுன்சில் கூட்டத்தில் பேசுகையில் இடுக்கி மாவட்டத்தில் உள்ள 130 ஆண்டுகள் பழமையான முல்லைப் பெரியார் அணைக்குப் பதிலாகப் புதிய அணை கட்டப்பட்டாலும், தற்போதைய அணையின் மூலம் தமிழ்நாடு பெற்றுவரும் முழு அளவிலான தண்ணீரையும் தடையின்றி வழங்கத் தயார் என்று கூறியுள்ளார்.

புதிய அணைக்கான வடிவமைப்பு (Design), சரியான இடத்தைத் தேர்ந்தெடுத்தல் மற்றும் கட்டுமானப் பணிகள் அனைத்தையும் தமிழ்நாடு அரசே முன்னெடுத்து நடத்தலாம் என்றும், அதற்கான முழுச் செலவையும் கேரள அரசு முழுமையாக ஏற்றுக்கொடுக்கும் என்றும் வி.டி. சதிசன் மாநாட்டில் தெரிவித்தார்.

மேலும், தற்போதைய அணை பாதுகாப்பானது என்ற வாதத்தைத் தமிழ்நாடு தொடர்ந்து முன்வைத்து வந்தாலும், இந்தப் பழமையான அணை பாதுகாப்பற்றது என்றும், எதிர்காலத்தில் ஏதேனும் பாதிப்பு ஏற்பட்டால் அது கீழ் இருக்கும் பகுதியில் உள்ள மக்களின் வாழ்வாதாரத்திற்குப் பெரும் ஆபத்தை விளைவிக்கும் என்பதால் புதிய அணை அவசியமானது என்பதே கேரளத்தின் நிலையாகக் கூட்டத்தில் சுட்டிக்காட்டப்பட்டது.

அதனைத்தொடர்ந்து, கேரள அரசின் சார்பில் முன்னெடுக்கப்பட்டு வரும் 'மிஷன் சமுத்திரம்' (Mission Samudra) திட்டம் குறித்த விவரங்களை அவர் மாநாட்டில் முன்வைத்தார்.

சுரங்கத் திருத்தச் சட்டம்: மத்திய அரசு சமீபத்தில் கொண்டுவந்த கனிம மற்றும் சுரங்கங்கள் (மேம்பாடு மற்றும் ஒழுங்குமுறை) திருத்தச் சட்டத்தை (Mines and Minerals Amendment Act) திரும்பப் பெற வேண்டும் என்று கோரிக்கை விடுக்கப்பட்டது.

கூட்டுச் கூட்டாட்சி தத்துவம்: சுகாதாரம், உள்கட்டமைப்பு மேம்பாடு, சுற்றுச்சூழல் பாதுகாப்பு மற்றும் பிராந்தியப் பாதுகாப்பு உள்ளிட்ட விவகாரங்களில் மாநிலங்களுக்கு இடையே கூட்டுச் கூட்டாட்சி தத்துவத்தை வலுப்படுத்த வேண்டியதன் அவசியத்தை அவர் வலியுறுத்தினார்.

மத்திய உள்துறை அமைச்சர் அமித் ஷா தலைமையில் நடைபெற்ற இந்தக் கூட்டத்தில், தமிழ்நாடு, கேரளம், கர்நாடகம், ஆந்திரா மற்றும் தெலங்கானா உள்ளிட்ட தென் மாநிலங்களின் முதலமைச்சர்கள் மற்றும் பிரதிநிதிகள் கலந்துகொண்டு மாநிலங்களுக்கு இடையேயான நதிநீர் பகிர்வு உள்ளிட்ட பல்வேறு முக்கியப் பிரச்சனைகள் குறித்து விவரமாக பேசினார்கள் என்பதும் குறிப்பிடத்தக்கது.