நேபாளத்தில் நிகழ்ந்த கோரமான பனிப்பாறைச் சரிவு மற்றும் திடீர் பெருவெள்ளத்தில் சிக்கித் தவித்த தமிழர்களில் முதற்கட்டமாக 21 பேர் பத்திரமாக மீட்கப்பட்டுச் சென்னை திரும்பியுள்ள நிலையில், இதுகுறித்த கூடுதல் விவரங்களை அமைச்சர் ஆனந்த் செய்தியாளர்களை சந்தித்தபோது விளக்கம் அளித்தார்.
செய்தியாளர் சந்திப்பில் பேசிய அவர், நேபாளப் பேரழிவில் சிக்கியுள்ள தமிழர்களை மீட்கும் பணிகளைத் துரிதப்படுத்தும் நோக்கில், மாண்புமிகு முதலமைச்சரின் நேரடி மற்றும் கண்டிப்பான உத்தரவின் பேரில் அமைச்சர்கள் பி.ஆர். அர்ஜுனன், ராஜமோகன், தங்கம் தென்னரசு மற்றும் வினோத் ஆகியோர் ஏற்கனவே புதுடெல்லியில் முகாமிட்டுள்ளதாகத் தெரிவித்தார்.
அங்குள்ள மத்திய அரசு அதிகாரிகளுடனும் தூதரக அதிகாரிகளுடனும் இணைந்து மீட்புப் பணிகளை அவர்கள் தீவிரமாக ஒருங்கிணைத்து வருவதாகவும், கள நிலவரங்கள் குறித்த அனைத்துத் தகவல்களும் உடனுக்குடன் முதலமைச்சரின் கவனத்திற்குத் கொண்டு செல்லப்பட்டு வருவதாகவும் அவர் குறிப்பிட்டார்.
டெல்லியில் முகாமிட்டுள்ள அமைச்சர்களின் தொடர் முயற்சியால், முதற்கட்டமாக அங்கு சிக்கியிருந்த தமிழர்கள் மீட்கப்பட்டுத் தற்போது பாதுகாப்பாகத் தமிழகம் அழைத்து வரப்பட்டுள்ளனர். குறிப்பாக, நேபாளத்தில் இதுவரை 21 தமிழர்கள் பத்திரமாக மீட்கப்பட்டுள்ளதாக அவர் உறுதிப்படுத்தினார்.
இதற்கிடையே, அங்கு இன்னும் மீட்கப்படாமல் தவிக்கும் பிற தமிழர்களின் நிலையைக் கண்டறியவும், எஞ்சியவர்களை விரைந்து மீட்கவும் தமிழகத்திலிருந்து மத்திய அரசுடன் இணைந்து வேறு தனிக்குழுக்கள் எவையேனும் நேபாளத்திற்கு அனுப்பப்படுமா என்ற செய்தியாளர்களின் கேள்விக்கு அமைச்சர் பதிலளித்தார்.
டெல்லியில் ஏற்கனவே முகாமிட்டுள்ள நான்கு அமைச்சர்களும் நிலைமையை மிக நெருக்கமாகக் கண்காணித்து வருவதாகவும், மத்திய அரசு மற்றும் விமானப் போக்குவரத்துத் துறையுடன் இணைந்து இதற்கான அனைத்துச் சாத்தியக்கூறுகளையும் அவர்கள் ஆராய்ந்து வருவதாகவும் அவர் கூறினார்.