இந்தியாவின் பாதுகாப்பை 10 செயற்கைக்கோள்கள் மூலம் 24×7 கண்காணிக்கிறோம் – இஸ்ரோ.!

டெல்லி : இந்தியாவிற்கும் பாகிஸ்தானுக்கும் இடையிலான மோதலுக்குப் பிறகு, நாட்டின் பாதுகாப்பு நோக்கங்களுக்காக இஸ்ரோவின் 10 செயற்கைக்கோள்கள் தொடர்ந்து கண்காணித்து வருவதாக இந்திய விண்வெளி ஆராய்ச்சி அமைப்பின் தலைவர் வி.நாராயணன் தெரிவித்துள்ளார்.

நேற்று இரவு எல்லையில் முழுமையான அமைதி நிலவியதாகவும், துப்பாக்கிச் சூடு சம்பவம் எதுவும் இல்லை என்றும் ராணுவம் தெரிவித்துள்ளது. இந்தியாவிற்கும் பாகிஸ்தானுக்கும் இடையிலான மோதலுக்குப் பிறகு சனிக்கிழமை மாலை போர்நிறுத்தம் அறிவிக்கப்பட்ட நேரத்தில் இஸ்ரோ தலைவரின் இவ்வாறு கூறியிருக்கிறார்.

இது தொடர்பாக, நேற்றைய தினம் இம்பாலில் உள்ள மத்திய வேளாண் பல்கலைக்கழகத்தின் (CAU) 5வது பட்டமளிப்பு விழாவில் உரையாற்றிய இந்திய விண்வெளி ஆராய்ச்சி அமைப்பின் (இஸ்ரோ) தலைவர் வி. நாராயணன், ”இதுபோன்ற சூழ்நிலையில், நாட்டின் பாதுகாப்பை உறுதி செய்ய நாம் செயற்கைக்கோள்களின் உதவியை நாட வேண்டும். நாங்கள் 7000 கிலோமீட்டர் பரப்பளவைக் கொண்டுள்ளோம்.

மேலும், முழு வடகிழக்குப் பகுதியும் தொடர்ந்து கண்காணிப்பில் உள்ளது, மேலும் செயற்கைக்கோள்கள் மற்றும் ட்ரோன்களின் உதவியின்றி, இதை நாம் அடைய முடியாது. இந்தியாவின் 7 ஆயிரம் கிலோ மீட்டர் நீள கடற்பகுதியில் பாதுகாப்பை உறுதி செய்ய வேண்டியுள்ளது, நாட்டின் வடபகுதியை 24 மணி நேரமும் கண்காணிக்க வேண்டிய தேவை உள்ளது.

டிரோன்கள் மற்றும் செயற்கைக்கோள் வசதியில்லாமல் இவற்றை சாத்தியப்படுத்த முடியாது. இந்தியா 34 நாடுகளுக்கான 433 செயற்கைக்கோள்களை விண்ணில் செலுத்தி சுற்றுப்பாதையில் நிலைநிறுத்தியுள்ளது என்றும் அவர் கூறினார்.