மண்டல தலைவர்கள் ராஜினாமா செய்யணும் – உத்தரவு போட்ட முதல்வர் மு.க.ஸ்டாலின்! என்ன காரணம்?

மதுரை : மாநகராட்சியில் அனைத்து மண்டல தலைவர்களும் ராஜினாமா செய்ய வேண்டும் என்று தமிழக முதலமைச்சரும், திமுக தலைவருமான மு.க.ஸ்டாலின் அதிரடி உத்தரவு பிறப்பித்துள்ளார். இந்த உத்தரவு, மதுரை மாநகராட்சி மேயர் இந்திராணியின் கணவர் பொன் வசந்த் திமுகவில் இருந்து நீக்கப்பட்டதைத் தொடர்ந்து வெளியிடப்பட்டுள்ளது. மதுரை மாநகராட்சியில் ஐந்து மண்டலங்களில் 100 வார்டுகள் உள்ளன, மற்றும் இந்த மண்டலங்களின் தலைவர்களாக வாசுகி, சரவண புவனேஸ்வரி, பாண்டிச்செல்வி, முகேஷ் சர்மா மற்றும் சுவிதா ஆகியோர் பதவி வகித்து வந்தனர். இந்த உத்தரவு மாநகராட்சி நிர்வாகத்தில் ஒரு பெரிய மாற்றத்தை ஏற்படுத்தியுள்ளது.

இந்த நடவடிக்கையின் பின்னணியில், மதுரை மாநகராட்சியில் சொத்து வரி நிர்ணயத்தில் முறைகேடு செய்யப்பட்டதாக எழுந்த புகார்கள் முக்கிய காரணமாகக் கருதப்படுகின்றன. தனியார் கட்டிடங்கள் மற்றும் வீடுகளுக்கு சொத்து வரி குறைவாக நிர்ணயிக்கப்பட்டு பல கோடி ரூபாய் மோசடி நடந்ததாக குற்றச்சாட்டுகள் எழுந்தன.

இதையடுத்து, முதலமைச்சர் மு.க.ஸ்டாலின் கட்சி நிர்வாகிகளுடனான ‘உடன்பிறப்பே வா’ நிகழ்ச்சியில், தேவையான இடங்களில் தயவு தாட்சண்யமின்றி பதவிகளைப் பறிப்பேன் என்று எச்சரித்திருந்தார். இந்த எச்சரிக்கையைத் தொடர்ந்து, மண்டல தலைவர்கள் மற்றும் குழு தலைவர்களான மூவேந்தன், கரன் ஆகியோரிடமும் விசாரணை நடத்தப்பட்டது.

மதுரை மாநகராட்சி மேயர் இந்திராணியின் கணவர் பொன் வசந்த், மாநகராட்சி நிர்வாகத்தில் ‘நிழல் மேயராக’ செயல்பட்டு, முடிவுகளை எடுத்ததாக எதிர்க்கட்சிகளும், திமுகவினரும் புகார் எழுப்பி வந்தனர். இதனால், கடந்த மே மாதம் பொன் வசந்த் கட்சியின் அடிப்படை உறுப்பினர் உள்ளிட்ட அனைத்து பொறுப்புகளில் இருந்தும் தற்காலிகமாக நீக்கப்பட்டார். இந்த நீக்கத்தைத் தொடர்ந்து, மாநகராட்சியில் மேலும் ஒழுங்கு நடவடிக்கைகளை மேற்கொள்ள வேண்டிய அவசியம் ஏற்பட்டதாகவும், அதன் விளைவாக மண்டல தலைவர்களின் ராஜினாமா உத்தரவு பிறப்பிக்கப்பட்டதாகவும் தகவல்கள் தெரிவிக்கின்றன.

மேலும், இந்த விவகாரத்தில், ஓய்வு பெற்ற உதவி கமிஷனர் ரங்கராஜன் உள்ளிட்ட எட்டு பேர் கைது செய்யப்பட்டு சிறையில் அடைக்கப்பட்டுள்ளனர்.இந்த உத்தரவை அடுத்து, மதுரை மாநகராட்சியின் மண்டல தலைவர்களான சரவண புவனேஸ்வரி, பாண்டிச்செல்வி, சுவிதா, முகேஷ் சர்மா ஆகியோர் ஏற்கனவே ராஜினாமா செய்துள்ளனர். மேலும், நகராட்சி நிர்வாகத்துறை அமைச்சர் கே.என்.நேரு, மதுரையைச் சேர்ந்த அமைச்சர்கள் மூர்த்தி, பழனிவேல் தியாகராஜன் மற்றும் மாநகராட்சி ஆணையாளர் சித்ரா விஜயன் ஆகியோர் இந்த விவகாரம் தொடர்பாக விசாரணை நடத்தியுள்ளனர் என்பதும் குறிப்பிடத்தக்கது.