கவலைப்படாதீங்க தவெக உடன் இருக்கும் – தவெக தலைவர் விஜய் ஆறுதல்!

சிவகங்கை  : மாவட்டம், திருப்புவனம் அருகே மடப்புரம் பத்ரகாளியம்மன் கோயிலில் தற்காலிக காவலாளியாகப் பணியாற்றிய அஜித்குமார் (வயது 27) நகை திருட்டு புகாரில் ஜூன் 28, 2025 அன்று காவல் நிலையத்திற்கு விசாரணைக்காக அழைத்துச் செல்லப்பட்டார். அங்கு காவலர்களால் தாக்கப்பட்டு உயிரிழந்தார். இந்த சம்பவம் சிவகங்கை மாவட்டத்தில் பெரும் அதிர்ச்சியையும், மக்களிடையே கோபத்தையும் ஏற்படுத்தியுள்ளது. இது காவல்துறையின் செயல்பாடு மீது கேள்விகளை எழுப்பியுள்ளது.

இந்நிலையில், அரசியல் தலைவர்கள் பலரும் உயிரிழந்த அஜித்குமாரின் குடும்பத்திற்கு ஆறுதல் தெரிவித்து வருகிறார்கள். அந்த வகையில், விடுதலை சிறுத்தைகள் கட்சித் தலைவர் திருமாவளவன், ஜூலை 3, 2025 காலை அஜித்குமாரின் வீட்டிற்கு நேரில் சென்றார். அங்கு அஜித்குமாரின் உருவப் படத்திற்கு மலர் தூவி, மாலை அணிவித்து மரியாதை செலுத்தினார். பின்னர், ஒரு நிமிட மௌன அஞ்சலி செலுத்தி, அவரது குடும்பத்திற்கு ஆறுதல் கூறினார். இந்த சம்பவத்திற்கு நீதி கோரி, திருமாவளவன் காவல்துறையின் செயலை கண்டித்து பேசியதாக தகவல்கள் தெரிவிக்கின்றன.

அதே நாள் மாலை, தமிழக வெற்றிக் கழக (தவெக) தலைவர் விஜய், அஜித்குமாரின் வீட்டிற்கு சென்றார். அவருடன் தவெக பொதுச் செயலாளர் ஆனந்த் உடனிருந்தார். விஜய், அஜித்குமாரின் உருவப் படத்திற்கு மாலை அணிவித்து அஞ்சலி செலுத்தினார். அஞ்சலி செலுத்திய பிறகு அஜித்தின் தாய் மற்றும் தம்பியை சந்தித்து, அவர்களின் கைகளைப் பிடித்து ஆறுதல் கூறினார். மேலும், குடும்பத்திற்கு ரூ.2 லட்சம் நிதியுதவி வழங்கினார்.

குடும்பத்திடம் என்ன பேசினார் என்கிற தகவல் வெளியாகாமல் இருந்த நிலையில், தற்போது அதற்கான விவரம் குறித்த தகவலும் வெளியாகியுள்ளது. விஜய், “இந்த சம்பவம் மிகவும் வருத்தமளிக்கிறது. கவலைப்பட வேண்டாம், தவெக உங்களுடன் எப்போதும் இருக்கும். அஜித்குமாரின் மரணத்திற்கு நீதி கிடைக்கும் வரை உறுதுணையாக இருப்போம். தைரியமாக இருங்கள்,” என்று குடும்பத்திற்கு உறுதியளித்தார். இந்த நிதியுதவியும், ஆறுதல் வார்த்தைகளும் அஜித்தின் குடும்பத்திற்கு மன உறுதியை அளித்ததாக அவர்கள் தெரிவித்தனர்.

மேலும், இந்த சம்பவம், காவலர் தாக்குதலுக்கு எதிரான பொதுமக்களின் கோபத்தை மேலும் தூண்டியுள்ளது. அரசியல் தலைவர்களின் இந்தப் பயணமும், ஆறுதல் நடவடிக்கைகளும், அஜித்குமாரின் மரணத்திற்கு நீதி கோருவதற்கு மக்களிடையே ஆதரவை அதிகரித்துள்ளன. இந்த விவகாரம், காவல்துறையின் பொறுப்பு மற்றும் நடவடிக்கைகள் குறித்து பரந்த விவாதத்தை உருவாக்கியுள்ளது.