பப்ஜி மதன் மீதான குண்டாசை உறுதி செய்தது அறிவுரை கழகம்…!

பப்ஜி மதன் மீதான குண்டாசை உறுதி செய்தது அறிவுரை கழகம்.

யூ -டியூப்பில் ஆபாசமான பேச்சுக்களை பேசி வீடியோக்களை பதிவிட்டு வந்த பப்ஜி மதனை, கடந்த ஜூன் மாதம் 18-ஆம் தேதி சென்னை மத்திய குற்றப்பிரிவு போலீசார் கைது செய்து வழக்கு பதிவு செய்தனர்.இந்த வழக்கில் மதன் மீது கடந்த ஜூலை மாதம் 6-ஆம் தேதி குண்டர் சட்டத்தில் நடவடிக்கை எடுக்கப்பட்டு,அவர் புழல் சிறையில் அடைக்கப்பட்டிருந்தார்.

இந்நிலையில், கடந்த சில வாரங்களுக்கு முன்பதாக, சென்னை கலெக்டர்  அலுவலக வளாகத்தில் உள்ள அறிவுரை கழகத்தில் ஓய்வுபெற்ற நீதிபதிகள் மாசில்லாமணி, ரகுபதி முன்னிலையில் ஆஜர்படுத்தபட்டார். அவருடன் அவரது மனைவியான கிருத்திகாவும், கைக்குழந்தையுடன் ஆஜரானார்.

அப்போது பப்ஜி மதன், குண்டர் தடுப்பு சட்டத்தின் கீழ் தண்டிக்க வேண்டிய அளவிற்கு நான் எந்தவித தவறும் செய்யவில்லை என்றும், எனவே தன் மீதான குண்டர் சட்டத்தை ரத்து செய்ய உத்தரவிட வேண்டும் என்றும் வாதாடினார்.  இந்நிலையில், இன்று பப்ஜி மதன் மீது போடப்பட்ட குண்டர் சட்டத்தை அறிவுரை கழகம் உறுதி செய்துள்ளது.