இந்தியா-பிரிட்டன் இடையே வர்த்தக ஒப்பந்தம் கையெழுத்து…பிரதமர் மோடி பெருமிதம்!!

லண்டன் : இந்தியாவுக்கும் பிரிட்டனுக்கும் இடையே முக்கிய வர்த்தக ஒப்பந்தங்கள் கையெழுத்தாகியுள்ளன. இந்த ஒப்பந்தங்கள் இந்தியப் பிரதமர் நரேந்திர மோடி மற்றும் பிரிட்டன் பிரதமர் கெய்ர் ஸ்டார்மர் ஆகியோரின் முன்னிலையில் ஜூலை 24, 2025 அன்று லண்டனில் இறுதி செய்யப்பட்டன. மூன்று ஆண்டுகால பேச்சுவார்த்தைகளுக்குப் பின் இந்த ஒப்பந்தம் உருவாகியுள்ளது, இது இரு நாடுகளுக்கும் இடையிலான பொருளாதார உறவை மேம்படுத்துவதற்கு முக்கிய பங்கு வகிக்கும்.

இந்த ஒப்பந்தம் இரு நாடுகளுக்கு இடையே வர்த்தகத்தை ஆண்டுக்கு 34 பில்லியன் அமெரிக்க டாலர்கள் (சுமார் 25.5 பில்லியன் பவுண்டுகள்) அதிகரிக்கும் என எதிர்பார்க்கப்படுகிறது. இந்தியாவில் இருந்து பிரிட்டனுக்கு ஏற்றுமதி செய்யப்படும் 99% பொருட்களுக்கு வரி குறைக்கப்படுவதுடன், பிரிட்டனின் விஸ்கி, கார், அழகுசாதனப் பொருட்கள் உள்ளிட்டவற்றின் வரி 150%லிருந்து 40% ஆக படிப்படியாகக் குறையும். இந்தியாவின் ஜவுளி, காலணி, மீன் பொருட்கள், மற்றும் வேளாண் பொருட்களுக்கு பிரிட்டனில் சிறந்த சந்தை அணுகல் கிடைக்கும்.

பிரதமர் மோடி இந்த ஒப்பந்தத்தை “வரலாற்று முக்கியத்துவம் வாய்ந்த தருணம்” என கூறி இது இரு நாடுகளுக்கும் இடையிலான விரிவான மூலோபாய கூட்டாண்மையை மேலும் ஆழப்படுத்தும் எனக் கூறினார். “இந்த ஒப்பந்தம் வர்த்தகம், முதலீடு, வளர்ச்சி, வேலைவாய்ப்பு மற்றும் புதுமையை ஊக்குவிக்கும்,” என அவர் பெருமிதம் தெரிவித்தார். மேலும், பிரிட்டன் பிரதமர் ஸ்டார்மரை இந்தியாவுக்கு வருகை தர அழைப்பு விடுத்தார்.

பிரிட்டன் பிரதமர் கெய்ர் ஸ்டார்மர், இந்த ஒப்பந்தத்தை பிரெக்ஸிட் பின்னர் பிரிட்டனின் மிகப்பெரிய வர்த்தக ஒப்பந்தமாகக் குறிப்பிட்டார். “இது பிரிட்டன் தொழில்களுக்கு புதிய வாய்ப்புகளை உருவாக்கி, பொருளாதாரத்தை வலுப்படுத்தும்,” என அவர் கூறினார். இந்த ஒப்பந்தம் 2040-ஆம் ஆண்டுக்குள் பிரிட்டன் பொருளாதாரத்தில் 4.8 பில்லியன் பவுண்டுகள் மற்றும் ஊதியங்களில் 2.2 பில்லியன் பவுண்டுகள் உயர்வை ஏற்படுத்தும் என எதிர்பார்க்கப்படுகிறது.