“சாரித்திரம் புரட்டு போராட்டம் பல்லாயிரம்”…வலியிலும் வரலாறு படைத்த ரிஷப் பண்ட்!

மான்செஸ்டர் : இந்திய கிரிக்கெட் அணியின் விக்கெட் கீப்பர்-பேட்ஸ்மேன் ரிஷப் பண்ட், இங்கிலாந்துக்கு எதிரான மான்செஸ்டரில் நடைபெறும் நான்காவது டெஸ்ட் போட்டியில், கால் விரலில் எலும்பு முறிவு காயத்துடனும் பல சாதனைகளைப் படைத்து அசத்தினார். ஜூலை 24, இரண்டாம் நாள் ஆட்டத்தில், முதல் நாளில் காயமடைந்து வெளியேறிய பண்ட், ஷர்துல் தாக்கூரின் விக்கெட் வீழ்ச்சிக்குப் பிறகு மீண்டும் களமிறங்கி, 54 ரன்கள் (75 பந்துகளில், 3 பவுண்டரிகள், 2 சிக்ஸர்கள்) எடுத்து அரைசதம் கடந்தார்.

இந்த ஆட்டத்தின் மூலம், அவர் முன்னாள் இந்திய கேப்டன் எம்.எஸ். தோனியின் சாதனைகளை முறியடித்து, பல உலக சாதனைகளைப் பதிவு செய்தார். முதல் நாள் ஆட்டத்தில், 68-வது ஓவரில், இங்கிலாந்து வேகப்பந்து வீச்சாளர் கிறிஸ் வோக்ஸின் முழு நீளப் பந்து, பண்ட் 37 ரன்களில் ஆடிக்கொண்டிருந்தபோது, ரிவர்ஸ் ஸ்வீப் ஆட முயன்றபோது அவரது வலது கால் விரலை பலமாகத் தாக்கியது. கடுமையான வலியால் துடித்த அவர், மைதானத்தில் மருத்துவ உதவி பெற்று, கால் விரலில் வீக்கம் மற்றும் சிறு கீறல் ஏற்பட்டதால் மருத்துவ வாகனத்தில் மருத்துவமனைக்கு அழைத்துச் செல்லப்பட்டார்.

ஸ்கேன் பரிசோதனையில், வலது கால் விரலில் மெட்டாடார்சல் எலும்பு முறிவு இருப்பது உறுதியானதால், இந்த டெஸ்டில் விக்கெட் கீப்பிங் பணியில் ஈடுபட முடியாது என பிசிசிஐ அறிவித்தது. துருவ் ஜூரல் விக்கெட் கீப்பிங் பொறுப்பை ஏற்றார்.இருப்பினும், பண்ட் தனது காயத்தைப் பொருட்படுத்தாமல், இரண்டாம் நாளில் களமிறங்கி, ஒரு காலில் நொண்டியபடி ஆடினார். ஓல்டு ட்ராஃபோர்டு மைதானத்தில் ரசிகர்கள் நின்று கைதட்டி வரவேற்றனர். இந்த ஆட்டத்தில், ஒரு சிக்ஸர் மற்றும் பவுண்டரி உட்பட 54 ரன்கள் எடுத்து, இந்திய அணியின் முதல் இன்னிங்ஸ் மொத்தத்தை 358 ரன்களாக உயர்த்த உதவினார்.

இந்த போட்டியில் அவர் அரை சதம் அடித்ததன் மூலம், வெளிநாட்டு மண்ணில் விக்கெட் கீப்பராக 1000 டெஸ்ட் ரன்கள் எடுத்த முதல் வீரர் என்ற உலக சாதனையைப் படைத்தார். அதேபோல, முன்னாள் கிரிக்கெட் வீரர் எம்.எஸ். தோனியின் விக்கெட் கீப்பர்-பேட்ஸ்மேனாக அதிக அரைசதங்கள் (29) என்ற சாதனையை முறியடித்து, 30 அரைசதங்களைப் பதிவு செய்தார். இந்தத் தொடரில், பண்ட் ஏற்கனவே இரண்டு சதங்களுடன் 479 ரன்கள் (7 இன்னிங்ஸ்களில், சராசரி 68.43) எடுத்து, ஷுப்மன் கில்லுக்கு அடுத்தபடியாக இந்திய அணியின் இரண்டாவது அதிக ரன்கள் எடுத்த வீரராக உள்ளார்.

இந்த சாதனைகள் மட்டுமின்றி, இந்திய அணியின் விக்கெட் கீப்பர்-பேட்ஸ்மேன் ரிஷப் பண்ட், இங்கிலாந்துக்கு எதிரான 2025 டெஸ்ட் தொடரில், இங்கிலாந்து மண்ணில் ஒரு விக்கெட் கீப்பராக ஒரு தொடரில் அதிக ரன்கள் (479 ரன்கள், 4 போட்டிகள்) என்ற உலக சாதனையைப் படைத்தார்.

மேலும், பண்ட் உலக டெஸ்ட் சாம்பியன்ஷிப் (WTC) வரலாற்றில் முன்னாள் கேப்டன் ரோஹித் சர்மாவை மிஞ்சி, அதிக ரன்கள் எடுத்த வீரராக புதிய சாதனை படைத்தார். 38 டெஸ்ட் போட்டிகளில் 2717 ரன்கள் எடுத்து, விக்கெட் கீப்பர்-பேட்ஸ்மேனாக இந்த மைல்கல்லை எட்டியுள்ளார். இந்தத் தொடரில், 7 இன்னிங்ஸ்களில் 2 சதங்கள் மற்றும் 1 அரைசதத்துடன், 68.43 சராசரியில் 479 ரன்கள் எடுத்து, இந்திய அணியின் முதன்மை ரன் குவிப்பவர்களில் ஒருவராக விளங்குகிறார். வலியிலும் இப்படியான சாதனைகளை அவர் படைத்துள்ள காரணத்தால் அவருக்கு பாராட்டுக்கள் குவிந்து வருகிறது.