ரேஷன் கார்டில் இறந்தவர் பெயர் நீக்கப்படாததால் தமிழக அரசுக்கு வீண் செலவு!

சென்னை : தமிழகத்தில் மாதந்தோறும் சராசரியாக 35,000 முதல் 40,000 பேர் வரை இறப்பதாக உணவு வழங்கல் துறையின் புள்ளிவிவரங்கள் தெரிவிக்கின்றன. ஆனால், இறந்தவர்களின் பெயர்கள் ரேஷன் கார்டில் இருந்து உரிய நேரத்தில் நீக்கப்படாததால், அவர்களுக்குரிய அரிசி, பருப்பு, சர்க்கரை, மண்ணெண்ணெய் போன்ற அத்தியாவசியப் பொருட்கள் ரேஷன் கடைகளுக்கு தொடர்ந்து அனுப்பப்படுகின்றன. இதனால், தமிழக அரசுக்கு கோடிக்கணக்கில் கூடுதல் செலவு ஏற்படுவதாக உணவு வழங்கல் துறை அதிகாரிகள் தெரிவித்துள்ளனர்.

இந்த வீண் செலவு, அரசின் நிதி நிர்வாகத்தில் பெரும் பாதிப்பை ஏற்படுத்துவதாகவும் அவர்கள் கவலை தெரிவித்தனர். ரேஷன் கார்டு முறை, தமிழகத்தில் ஏழை மற்றும் நடுத்தர மக்களுக்கு அத்தியாவசியப் பொருட்களை மலிவு விலையில் வழங்குவதற்காக உருவாக்கப்பட்டது. ஒவ்வொரு குடும்பத்துக்கும் அவர்களின் உறுப்பினர்களின் எண்ணிக்கையைப் பொறுத்து பொருட்கள் ஒதுக்கப்படுகின்றன. ஆனால், இறந்தவர்களின் பெயர்கள் ரேஷன் கார்டில் இருந்து நீக்கப்படாமல் இருப்பதால், அந்தப் பொருட்கள் தேவையின்றி விநியோகிக்கப்படுகின்றன.

இது, ரேஷன் கடைகளில் கையாடல் அல்லது தவறான பயன்பாட்டுக்கும் வழிவகுக்கலாம் என்று அதிகாரிகள் எச்சரிக்கின்றனர்.இந்தப் பிரச்சினையைத் தீர்க்க, இறந்தவர்களின் பெயர்களை உடனடியாக ரேஷன் கார்டில் இருந்து நீக்க வேண்டுமென உணவு வழங்கல் துறை வலியுறுத்தியுள்ளது. குடும்ப உறுப்பினர்கள், உறவினரின் மரணத்தை உறுதி செய்யும் ஆவணங்களுடன் (மரணச் சான்றிதழ்) அருகிலுள்ள ரேஷன் கடை அல்லது உணவு வழங்கல் துறை அலுவலகத்தில் புகார் அளிக்க வேண்டும். இதற்காக ஆன்லைன் முறையிலும் விண்ணப்பிக்கலாம் என்று துறை அறிவித்துள்ளது.

மேலும், இதை பொதுமக்கள் உடனடியாக செய்யாவிட்டால், அரசின் நிதி விரயம் தொடரும் என்று எச்சரிக்கப்பட்டுள்ளது.இந்த வீண் செலவை கட்டுப்படுத்துவதற்காக, உணவு வழங்கல் துறை தற்போது தீவிரமாக செயல்படத் தொடங்கியுள்ளது. ரேஷன் கார்டுகளை ஆய்வு செய்யவும், இறந்தவர்களின் பெயர்களை நீக்கவும் மாவட்ட அளவில் சிறப்பு குழுக்கள் அமைக்கப்பட்டுள்ளன. பொதுமக்களும் இதற்கு ஒத்துழைத்து, தங்கள் ரேஷன் கார்டில் உள்ள விவரங்களை புதுப்பித்து, அரசுக்கு உதவ வேண்டுமென அதிகாரிகள் கோரிக்கை விடுத்துள்ளனர்.