INDvsENG : தொடரை வெல்ல பும்ரா வேணும்! இந்தியாவுக்கு அட்வைஸ் கொடுத்த கும்ப்ளே!

லண்டன் : இங்கிலாந்துக்கு எதிரான ஐந்து போட்டிகள் கொண்ட டெஸ்ட் தொடரில் இந்திய அணி 2-1 என்ற கணக்கில் பின்தங்கியுள்ள நிலையில், முன்னாள் இந்திய அணியின் கேப்டனும் பயிற்சியாளருமான அனில் கும்ப்ளே, இந்தியாவின் முன்னணி வேகப்பந்து வீச்சாளர் ஜஸ்பிரித் பும்ராவை அடுத்த இரண்டு டெஸ்ட் போட்டிகளிலும் (மான்செஸ்டர் மற்றும் ஓவல்) விளையாட வைக்க வேண்டும் என்று அணி நிர்வாகத்தை வலியுறுத்தியுள்ளார்.

லார்ட்ஸில் நடந்த மூன்றாவது டெஸ்ட் போட்டியில் இந்திய அணி 22 ரங்களுக்கு  தோல்வியடைந்த பிறகு, JioHotstar-ல் பேசிய கும்ப்ளே, பும்ராவின் முக்கியத்துவத்தை வலியுறுத்தினார். இந்திய அணி இந்தத் தொடரை வெல்ல வேண்டுமானால், பும்ரா களத்தில் இருப்பது இன்றியமையாதது என்று அவர் கூறினார்.

பும்ரா, இந்தத் தொடருக்கு முன்பு, தனது உடல் நிலையைப் பாதுகாக்கும் பொருட்டு ஐந்து டெஸ்ட் போட்டிகளில் மூன்று போட்டிகளில் மட்டுமே விளையாடுவதாக அறிவித்திருந்தார். முதல் டெஸ்ட் போட்டியில் (லீட்ஸ்) அவர் 5 விக்கெட்டுகளை வீழ்த்திய போதிலும் இந்தியா தோல்வியடைந்தது, மேலும் இரண்டாவது டெஸ்ட் போட்டியில் (பர்மிங்ஹாம்) அவர் ஓய்வு எடுத்தார். மூன்றாவது டெஸ்ட் போட்டியில் (லார்ட்ஸ்) மீண்டும் களமிறங்கிய பும்ரா, முதல் இன்னிங்ஸில் 5 விக்கெட்டுகளை வீழ்த்தி, இந்தியாவின் பந்து வீச்சை வலுப்படுத்தினார். இருப்பினும், இந்திய அணி போட்டியில் தோல்வியை தழுவியது.

இந்த நிலையில், கும்ப்ளே, “நான் அணி நிர்வாகத்தில் இருந்தால், பும்ராவை அடுத்த போட்டியில் விளையாட வற்புறுத்துவேன். அவர் இல்லையென்றால், அடுத்த டெஸ்டில் இந்தியா தோல்வியடைந்தால், தொடர் முடிந்துவிடும். பும்ரா இரண்டு டெஸ்ட் போட்டிகளிலும் விளையாட வேண்டும்,” என்றும் அவர் வலியுறுத்தி பேசினார்.

கும்ப்ளே மேலும் கூறுகையில், இந்தத் தொடருக்குப் பிறகு இந்தியாவுக்கு நீண்ட இடைவெளி இருப்பதால், பும்ரா தனது உடல் நிலையை பராமரிக்க அக்டோபரில் நடைபெறவுள்ள வெஸ்ட் இண்டீஸுக்கு எதிரான உள்நாட்டு டெஸ்ட் தொடரில் ஓய்வு எடுக்கலாம் என்று ஆலோசனை வழங்கினார். “இந்தத் தொடருக்குப் பிறகு நீண்ட இடைவெளி உள்ளது. உள்நாட்டு டெஸ்ட் தொடரில் பும்ரா விளையாட வேண்டிய அவசியமில்லை. ஆனால், இப்போது மான்செஸ்டர் (ஜூலை 23) மற்றும் ஓவல் (ஜூலை 31) டெஸ்ட் போட்டிகளில் அவர் களமிறங்க வேண்டும்,” என்று அவர் வலியுறுத்தினார்.

மேலும், இந்திய அணி மான்செஸ்டரில் வெற்றி பெற்று தொடரை 2-2 என சமன் செய்தால், ஓவலில் நடக்கவுள்ள இறுதி டெஸ்ட் போட்டி தொடரைத் தீர்மானிக்கும். இந்திய அணியின் கேப்டன் சுப்மன் கில், லார்ட்ஸ் டெஸ்ட் முடிந்த பிறகு, பும்ராவின் அடுத்த போட்டிகளில் பங்கேற்பு குறித்து கேட்கப்பட்டபோது, “விரைவில் தெரிந்துவிடும்,” என்று மட்டும் பதிலளித்தார்.

மான்செஸ்டரில் இந்தியா இதுவரை ஒரு டெஸ்ட் போட்டியிலும் வெற்றி பெறவில்லை, மேலும் 9 போட்டிகளில் 5 டிராவாகவும், 4 இங்கிலாந்து வெற்றியாகவும் முடிந்துள்ளன. இந்த சவாலான பின்னணியில், பும்ராவின் பங்களிப்பு இந்தியாவுக்கு இல்லை என்றால் மிகவும் சவாலானதாக இருக்கும் எனவே, அவரை விளையாட வைக்க வேண்டும் என்பது  முக்கியமானது என்று கும்ப்ளே எச்சரித்தார். இப்படியான முக்கியமான போட்டியில் அவருடைய இடத்தை நிரப்புவது என்பது மிகவும் கடினம் எனவே இரண்டு போட்டியிலும் பும்ரா விளையாடுவாரா? இல்லையா? என்பதை பொறுத்திருந்து தான் பார்க்கவேண்டும்.