Follow us on YouTube

சென்னை : தமிழ்நாட்டில் தற்பொழுது ஏற்பட்டுள்ள ஆட்சி மாற்றத்தைத் தொடர்ந்து பல்வேறு இடங்களில் நிலவி வரும் மின்வெட்டுப் பிரச்சினை குறித்து, நடிகர் மாஸ்டர் மகேந்திரன் அண்மையில் அளித்த பேட்டி ஒன்று சமூக வலைதளங்களில் கடுமையான விவாதங்களையும் எதிர்ப்புகளையும் கிளப்பியது.

மின்வெட்டு குறித்துப் பொதுமக்கள் யாரும் கேள்வி கேட்கக் கூடாது என்றும், மின்சாரத்தை வைத்து அரசியல் செய்யக் கூடாது என்பது போல அவர் பேசியது இருப்பது என்றும் அவர் பேசிய காணொளி வைரலாக பரப்பப்பட்டு விமர்சனங்களுக்கு உள்ளாகினார், தனக்கு எதிராக எழுந்த விமர்சனங்களுக்கு விளக்கம் அளித்து மாஸ்டர் மகேந்திரன் தற்பொழுது ஒரு புதிய விளக்கம் கொடுத்து வீடியோவை வெளியிட்டுள்ளார்.

அதில், தன்னுடைய பேட்டி குறித்து இன்ஸ்டாகிராம், எக்ஸ் தளம் மற்றும் யூடியூப் போன்ற சமூக வலைதளங்களில் வெளியாகி வரும் எதிர்மறையான விமர்சனங்கள் தனக்கு மிகுந்த அதிர்ச்சியை ஏற்படுத்தியுள்ளதாக மகேந்திரன் தெரிவித்துள்ளார்.

தான் யாரையெல்லாம் மதிக்கிறேனோ, யாருடைய கருத்துக்களையெல்லாம் சரி என்று தனது நண்பர்களிடம் பேசி வந்தேனோ, அவர்களே தற்பொழுது தன்னைப் பற்றித் தவறாகப் பேசி வருவது வருத்தமளிப்பதாகக் குறிப்பிட்டுள்ளார். தான் சொல்ல வந்த கருத்தின் உண்மையான நோக்கத்தைப் புரிந்து கொள்ளாமல் பலரும் விமர்சித்து வருவதால், மக்களுக்குத் தெளிவான விளக்கத்தைக் கொடுக்க விரும்புவதாக அவர் கூறியுள்ளார்.

'கேள்வி கேட்டால் மின்சாரம் வந்துவிடுமா?' என்று தான் பேசியது ஒட்டுமொத்தப் பொதுமக்களையும் பார்த்து அல்ல என்றும், மின்சாரப் பிரச்சினையை வைத்து அரசியல் செய்யக்கூடிய சில குறிப்பிட்ட நபர்களைக் குறிவைத்தே தான் அப்படிப் பேசியதாகவும் அவர் விளக்கியுள்ளார். மேலும், 'ஆறு மாதம் காலம் அவகாசம் கொடுங்கள், கேள்விக் கேட்காதீர்கள்' என்று தான் குறிப்பிட்டதற்குக் காரணம், தற்போதைய முதலமைச்சர் ஆட்சிப் பொறுப்பேற்கும் போது மின்சாரக் கட்டமைப்பைச் சரிசெய்ய ஆறு மாத காலம் அவகாசம் கேட்டிருந்தார் என்றும், அவர் மீதுள்ள நம்பிக்கை மற்றும் அன்பின் காரணமாகவே தானும் அந்த அவகாசத்தை மக்களுக்கு நினைவூட்டியதாகவும் அவர் சுட்டிக்காட்டியுள்ளார்.

மேலும், பேட்டியின் போது 'சோலார் சிஸ்டம்' என்று தான் குறிப்பிட்டது தனது வார்த்தைப் பிழைதான் என்பதை ஒப்புக்கொண்ட மகேந்திரன், தான் ஒரு சராசரி மாணவன் என்பதால் 'சோலார் எனர்ஜி' அல்லது 'சோலார் பேனல்' என்று சரியாகக் குறிப்பிடத் தெரியாமல் மாற்றிப் பேசிவிட்டதாகத் தெரிவித்துள்ளார்.

கடந்த 2015-ஆம் ஆண்டிலேயே கேரளாவின் கொச்சி சர்வதேச விமான நிலையம் முற்றிலும் சூரிய ஆற்றல் (Solar Energy) மூலம் இயங்கும் உலகின் முதல் விமான நிலையமாக மாற்றப்பட்டதை நேரில் பார்த்த போது, ஏன் தமிழ்நாட்டிலும் இது போன்ற திட்டங்கள் வரவில்லை என்ற ஆதங்கம் தனக்கு இருந்ததாகக் குறிப்பிட்டுள்ளார்.

மேலும், கடந்த 2011-ஆம் ஆண்டிலேயே மறைந்த முன்னாள் முதலமைச்சர் ஜெயலலிதா தனது வீட்டுமனைத் திட்டங்களில் சூரிய ஒளித் தகடுகளை (Solar Panels) அறிமுகப்படுத்திய தொழில்நுட்பத்தை நாம் முறையாகப் பின்பற்றியிருந்தால், இந்த 2026-ஆம் ஆண்டில் மின்தடைப் பாதிப்புகளைத் தவிர்த்திருக்கலாம் என்ற அர்த்தத்திலேயே தான் அதைப் பேச முற்பட்டதாகத் தெளிவுபடுத்தியுள்ளார்.

'என் வீட்டிலிருந்தே மின்சாரத்தை எடுத்துக் கொள்ளுங்கள்' என்று தான் உணர்ச்சிவசப்பட்டுப் பேசியது, மின்தடையால் மக்கள் கஷ்டப்படும் போது தானும் மக்களோடு மக்களாக அந்தக் கஷ்டத்தைப் பகிர்ந்து கொள்ளத் தயார் என்ற நோக்கில் பேசியதுதானே தவிர, யாரையும் ஏளனம் செய்யும் நோக்கம் தனக்கு இல்லை என்று அவர் கூறியுள்ளார்.

இதனிடையே, தனக்குத் திமிர் மற்றும் தலைக்கனம் இருப்பதாகச் சமூக வலைதளங்களில் பரப்பப்படும் பழைய சினிமா சம்பவங்கள் குறித்த வதந்திகள் முற்றிலும் பொய்யானவை என்றும், சம்பந்தப்பட்ட நபரே அது ஒரு விளையாட்டுக்காகப் பேசப்பட்ட விஷயம் என்று தன்னிடம் போனில் ஒப்புக்கொண்டதாகவும் மகேந்திரன் குறிப்பிட்டுள்ளார்.

தான் இன்று ஒருவேளைச் சோறு சாப்பிடுவதற்குக் காரணமே இந்த மக்கள்தான் என்றும், தன்னை வாழ வைக்கும் பொதுமக்களைத் தான் ஒருபோதும் ஏளனம் செய்ய மாட்டேன் என்றும் அவர் உருக்கமாகத் தெரிவித்துள்ளார்.

தனது நடிப்பு பிடிக்கவில்லை என்றால் தாராளமாக விமர்சிக்கலாம், அதைத் திருத்திக் கொள்ளத் தயாராக இருக்கிறேன்; ஆனால் தன் மீது இதுபோன்ற தவறான தனிப்பட்ட பழிகளைச் சுமத்த வேண்டாம் என்று அவர் கேட்டுக்கொண்டுள்ளார். தனது பேச்சு ஏதேனும் ஒரு வகையில் பொதுமக்களின் மனதைப் புண்படுத்தியிருந்தால், அதற்காகத் தனது மனப்பூர்வமான வருத்தத்தையும் மன்னிப்பையும் தெரிவித்துக் கொள்வதாக மாஸ்டர் மகேந்திரன் அந்த வீடியோவில் பேசியுள்ளார்.