பாகிஸ்தானின் வான் தடுப்பு அமைப்பை சில்லி சில்லியாக்கிய இந்தியா.!

புதுடெல்லி: ஏப்ரல் 22 அன்று ஜம்மு காஷ்மீரின் பஹல்காமில் நடந்த பயங்கரவாத தாக்குதலுக்கு பதிலடி கொடுக்கும் விதமாக, பாகிஸ்தான் மற்றும் பாகிஸ்தான் ஆக்கிரமிப்பு ஜம்மு காஷ்மீரில் (POJK) ஒன்பது பயங்கரவாத மறைவிடங்கள் மீது இந்தியா துல்லியமான வான்வழித் தாக்குதலை நடத்தியது. 15 நாட்களுக்குப் பிறகு, இந்திய ராணுவத்தின் இந்த நடவடிக்கைக்குப் பிறகு, இரு நாடுகளுக்கும் இடையே பதற்றம் அதிகரித்துள்ளது.

இந்த சூழலில் பாகிஸ்தானின் மிகப்பெரிய ஏவுகணை மற்றும் ஆளில்லா விமானத் தாக்குதலை இந்தியா முறியடித்துள்ளது. மேலும், இந்தியாவின் பதிலடி தாக்குதலில் பாகிஸ்தானின் வான் பாதுகாப்பு அமைப்பு முற்றிலுமாக அழிக்கப்பட்டுள்ளது. ஒரு தகவலின்படி, இந்தியாவின் 15 நகரங்களில் உள்ள ராணுவ தளங்களைத் தாக்க பாகிஸ்தான் முயன்றது.

இதற்கு பதிலளிக்கும் விதமாக, இந்தியாவின் நடவடிக்கை லாகூரில் உள்ள வான் பாதுகாப்பு அமைப்பை முற்றிலுமாக அழித்துவிட்டது. ஜம்மு, அவந்திபோரா, அமிர்தசரஸ், ஜலந்தர், ஆதம்பூர், லூதியானா, பதான்கோட், பதிண்டா மற்றும் சண்டிகர் உள்ளிட்ட 15 நகரங்களை பாகிஸ்தான் தாக்க முயன்றது. ஆனால், பாகிஸ்தானின் ஏவுகணைகளை இந்தியா சுட்டு வீழ்த்தியது.

இன்று காலை, பாகிஸ்தானின் வான் தடுப்பு பிரிவை இந்திய ராணுவம் தாக்கி அழித்ததாக தகவல் வெளியாகி உள்ளது. லாகூரில் உள்ள பாகிஸ்தானின் வான் பாதுகாப்பு பிரிவான HQ-9 அழிக்கப்பட்டதாக  செய்தி நிறுவனம் ANI தெரிவித்துள்ளது. இந்தியா மீதான பாகிஸ்தானின் தாக்குதலை, இந்திய ஏவுகணை தடுப்பு கட்டமைப்பான எஸ்-400 சுதர்சன் சக்ரா முறியடித்தது.

இதனிடையே, ஜம்மு-காஷ்மீரின் குப்வாரா, பாரமுல்லா, உரி, பூஞ்ச், மெந்தர் மற்றும் ரஜோரி ஆகிய பகுதிகளில் மோர்ட்டார் மற்றும் கனரக பீரங்கிகளைப் பயன்படுத்தி பாகிஸ்தான் தனது  துப்பாக்கிச் சூட்டின் தீவிரத்தை அதிகரித்துள்ளதாக பாதுகாப்பு அமைச்சகம் தெரிவித்துள்ளது.

This morning, the Indian Armed Forces targeted Air Defence Radars and systems at a number of locations in Pakistan. Indian response has been in the same domain with same intensity as Pakistan. It has been reliably learnt that an Air Defence system at Lahore has been neutralised.… pic.twitter.com/z2OexT2nJP

— ANI (@ANI) May 8, 2025

முதல் முறையாக S-400

இந்திய விமானப்படையின் S-400 சுதர்சன் சக்ரா வான் பாதுகாப்பு ஏவுகணை அமைப்பு நேற்று இரவு இந்தியாவை நோக்கி நகரும் இலக்குகளை நோக்கி ஏவப்பட்டது. இந்த நடவடிக்கையில் இலக்குகள் வெற்றிகரமாக அழிக்கப்பட்டதாக பல டொமைன் நிபுணர்கள் ANI இடம் தெரிவித்தனர்.