20 நாடுகளின் தலைவர்கள் பங்கேற்கும் ஜி20 உச்சி மாநாட்டில் பங்கேற்பதற்காக பிரதமர் நரேந்திர மோடி, இன்று இந்தோனேசியாவின் பாலிக்கு செல்கிறார்.
இந்தோனேசியாவிலுள்ள பாலியில் நவ 15-16 இல் நடைபெறும் ஜி20 உச்சி மாநாட்டில் பங்கேற்பதற்காக பிரதமர் மோடி, மூன்று நாள் பயணமாக இந்தோனேசியா செல்கிறார். பிரதமர் மோடி இந்த பயணத்தின் போது, நவம்பர் 15 ஆம் தேதி நடைபெறும் இந்திய சமூக வரவேற்பு நிகழ்ச்சியில் இந்திய சமூகம் மற்றும் இந்தியா மற்றும் பாலியின் நண்பர்களுடன் உரையாடுகிறார்.
ஜி20 உறுப்பினர்களான அர்ஜென்டினா, ஆஸ்திரேலியா, பிரேசில் , கனடா, சீனா, பிரான்ஸ், ஜெர்மனி, இந்தியா, இந்தோனேஷியா, இத்தாலி, ஜப்பான், மெக்சிகோ, ரிபப்ளிக் ஆஃப் கொரியா, ரஷ்யா, சவுதி அரேபியா, தென் ஆப்பிரிக்கா, துருக்கி, அமெரிக்கா, இங்கிலாந்து, ஐரோப்பிய ஒன்றியம் ஆகிய 20 நாடுகளைச்சேர்ந்த தலைவர்கள் இந்த மாநாட்டில் கலந்து கொள்கின்றனர்.
இந்த மாநாட்டின் கருவாக “ஒன்றாக மீட்போம், வலுவாக மீட்போம்” என்ற கருப்பொருளின் கீழ் உலகளாவிய அளவில் முக்கிய பிரச்சினைகள் குறித்து பேசப்படவுள்ளன.
உச்சிமாநாட்டின் போது, உலகப் பொருளாதாரம், எரிசக்தி, சுற்றுச்சூழல், விவசாயம், சுகாதாரம் மற்றும் டிஜிட்டல் மாற்றம் போன்றவை தொடர்புடைய முக்கியப் பிரச்சினைகள் குறித்து உலகத் தலைவர்கள் விவாதிப்பார்கள். இதில் பிரதமர் மோடி, உணவு மற்றும் எரிசக்தி பாதுகாப்பு, டிஜிட்டல் மாற்றம் மற்றும் ஆரோக்கியம் குறித்த மூன்று அமர்வுகளில் கலந்து கொள்கிறார்.
நவம்பர் 15-16 உச்சிமாநாட்டில் பங்கேற்கும் உலகத் தலைவர்களில் அமெரிக்க அதிபர் ஜோ பிடன், இங்கிலாந்து பிரதமர் ரிஷி சுனக், பிரான்ஸ் பிரதமர் இம்மானுவேல் மேக்ரான், ஜெர்மன் அதிபர் ஓலாஃப் ஷோல்ஸ் மற்றும் சீன அதிபர் ஜி ஜின்பிங் ஆகியோர் உள்ளனர்.
உக்ரைன் போர் நடந்து வரும் வேளையில் ரஷ்ய அதிபர் புதின் இந்த மாநாட்டில் கலந்துகொள்ளவில்லை, மற்றும் ரஷ்யா-உக்ரைன் போர் குறித்தும் முக்கியமாக விவாதிக்கப்படும். அமெரிக்க அதிபர் ஜோ பிடன் மற்றும் சீன அதிபர் ஜின் பிங் இந்த மாநாட்டில் தைவான் குறித்து விவாதிக்கக்கூடும் என்று எதிர்பார்க்கப்படுகிறது.
இந்த ஜி 20 உச்சிமாநாடு இந்தியாவிற்கு முக்கியமானது, ஏனெனில் இந்தியா டிசம்பர் 1, 2022 முதல் ஒரு வருட காலத்திற்கு ஜி 20 யின் ஜனாதிபதி பதவியை வகிக்க திட்டமிடப்பட்டுள்ளது, மேலும் இந்த பாலி உச்சிமாநாட்டின் போது ஜனாதிபதி பதவி ஒப்படைப்பு நடைபெறும்.
உச்சிமாநாட்டின் நிறைவு அமர்வில், இந்தோனேசிய ஜனாதிபதி விடோடோ, ஜி20 தலைவர் பதவியை பிரதமர் திரு நரேந்திர மோடியிடம் அடையாளமாக ஒப்படைப்பார். 2022 டிசம்பர் 1 முதல் ஜி20 தலைவர் பதவியை இந்தியா முறையாக ஏற்கும் என்று பிரதமர் அலுவலகத்தின் அதிகாரப்பூர்வ செய்திக்குறிப்பில் கூறப்பட்டுள்ளது.