பாஜக கூட்டணியை தொடர்வதா? முறிப்பதா? – இறுதி முடிவு எடுக்க வேண்டிய கட்டாயத்தில் இபிஎஸ்!

மத்தியில் பாஜக தலைமையிலான தேசிய ஜனநாயக கூட்டணியில் அதிமுக கட்சி அங்கும் வகிக்கிறது என்று கூறப்பட்டாலும், தமிழகத்தில் பாஜக - அதிமுக இடையே கருத்து மோதல்கள்

ByBalakaliyamoorthyVerified account

2 Min Read

Published - 25 Sept 2023 at 12:07 IST

மத்தியில் பாஜக தலைமையிலான தேசிய ஜனநாயக கூட்டணியில் அதிமுக கட்சி அங்கும் வகிக்கிறது என்று கூறப்பட்டாலும், தமிழகத்தில் பாஜக – அதிமுக இடையே கருத்து மோதல்கள் தொடர்ந்து கொண்டே இருக்கிறது. குறிப்பாக தமிழகத்தில் அண்ணாமலை – அதிமுக இடையே தான் பல்வேறு கருத்து மோதல்கள் ஏற்பட்டுள்ளது. அதாவது, மறைந்த முன்னாள் தலைவர்கள் பற்றி குறிப்பாக அண்ணா பற்றி அண்மையில் பாஜக மாநில தலைவர் அண்ணாமலை பேசிய கருத்துக்கள் பெரும் விவாதத்தை உண்டாக்கியது.

பாஜக மாநில தலைவர் அண்ணாமலை கருத்துக்கு அதிமுக தரப்பினரிடையே கடும் கண்டனங்கள் எழுந்தன. இதன் காரணமாக அதிமுக – பாஜக கூட்டணி தற்போது இல்லை என்றும் முன்னாள் அமைச்சரும், அதிமுக முக்கிய நிர்வாககியுமான ஜெயக்குமார் தெரிவித்தது சலசலப்பை உண்டாக்கியது. ஆனால், மறுபக்கம் முன்னாள் அமைச்சர் செல்லூர் ராஜு, திமுக – பாஜக கூட்டணியில் தற்போது எந்த பாதிப்பும் இல்லை என கூறியிருந்தார். எனவே அதிமுகவில் இருவேறு கருத்துக்கள் இருப்பதால் குழப்பான சூழல் நிலவுகிறது.

இப்படி இருக்கும் சூழலில் பிரதமர் நரேந்திர மோடியை தலைவராக ஏற்றுக் கொள்பவர்களை நாங்களும் ஏற்றுக் கொள்கிறோம். ஆனால், தமிழகத்தின் அடுத்த முதல்வர் எடப்பாடி பழனிச்சாமி என்பதை என்னால் கூற முடியாது என அண்ணாமலை கூறியது அதிமுக – பாஜக இடையே மேலும் விரிசலை ஏற்படுத்தியது. இந்த பிரச்சனைக்கு முடிவு கட்ட வேண்டும் என்று அதிமுக முக்கிய நிர்வாகிகள் தங்கமணி, வேலுமணி, சி.வி சண்முகம், நத்தம் விஸ்வநாதன், கே.பி.முனுசாமி ஆகியோர் சமீபத்தில் டெல்லி சென்று பாஜக தலைவர்களை சந்தித்தனர்.

இந்த சந்திப்பின்போது, தமிழக பாஜக பதவியில் இருந்து அண்ணாமலையை நீக்கினால் தான் பாஜகவுடன் கூட்டணி என அதிமுக நிர்வாகிகள் தெரிவித்ததாக தகவல் வெளியாகியிருந்தது. ஆனால், அதிமுகவின் கோரிக்கை நிராகரிக்கப்பட்டதாகவும், அண்ணா பற்றி அவதூறாக பேசிய அண்ணாமலை மீது நடவடிக்கை எடுக்க வேண்டும் என்ற அதிமுக கோரிக்கையை பாஜக உதாசீனப்படுத்திவிட்டதாகவும் கூறப்படுகிறது.

மேலும், டெல்லி சென்ற அதிமுக நிர்வாகிகளை மத்திய உள்துறை அமைச்சர் அமித்ஷா சந்திக்காதது அரசியல் வட்டாரத்தில் மேலும் சலசலப்பை ஏற்படுத்தியுள்ளது. இந்த பரபரப்பான அரசியல் சூழ்நிலையில் இன்று மாலை 4 மணிக்கு பொதுச்செயலாளர் எடப்பாடி பழனிசாமி தலைமையில் அதிமுக மாவட்ட செயலாளர்கள் கூட்டம் நடைபெற உள்ளது. இந்த நிலையில், பாஜக கூட்டணி குறித்து ஆலோசிக்க அதிமுக மாவட்ட செயலாளர்கள் கூட்டம் இன்று நடக்கும் நிலையில், நிர்வாகிகளுக்கிடையே கருத்து வேறுபாடு இருப்பதாக தகவல் வெளியாகியுள்ளது.

பாஜக கூட்டணியை தொடர்வதா? முறித்து கொள்வதா? என்பது தொடர்பாக அதிமுகவில் பெரும் குழப்பம் நீடித்து வருகிறது. அதிமுக 2-ம் கட்ட தலைவர்களில் ஒரு தரப்பினர் பாஜகவுடன் கூட்டணி தொடர வேண்டும் என வலியுறுத்துவதாகவும், மற்றொரு தரப்பினர் பாஜகவுடன் கூட்டணியை முறித்துக்கொள்ள வேண்டும் என்றும் திட்டவட்டமாக கூறுவதால் முடிவெடுப்பதில் சிக்கல் ஏற்பட்டுள்ளது.

தனக்கு நெருக்கமான அதிமுக நிர்வாகிகளே இரு வேறு கருத்துக்களை வலியுறுத்துவதால் இறுதி முடிக்க முடியாமல் எடப்பாடி பழனிசாமி திணறி வருவதாக கூறப்படுகிறது. கூட்டணிக்காக இறங்கி போக முடியாது என அண்ணாமலையும் உறுதி காட்டுவதால் கூட்டணியை தொடர்வதில் சிக்கல் ஏற்பட்டுள்ளது. இதனிடையே, அண்ணா பற்றி அண்ணாமலை பேசியதால் ஏற்பட்ட சர்ச்சை ஒரு வாரத்துக்கு மேலாக நீடிக்கும் நிலையில், இதுவரை எடப்பாடி பழனிசாமி மவுனம் காத்து வருகிறார்.

எனவே, பாஜக கூட்டணியை தொடர்வதா? முறிப்பதா? என்பது குறித்து இறுதி முடிவு எடுக்க வேண்டிய கட்டாயத்தில் எடப்பாடி பழனிசாமி உள்ளார். அந்தவகையில் இன்று நடைபெற உள்ள அதிமுக மாவட்ட செயலாளர் கூட்டத்தில் முக்கிய முடிவு எடுக்கப்படும் என்றும் இந்த கூட்டத்துக்கு பிறகு ஒரு பெரிய அறிவிப்பு வெளியாகும் எனவும் எதிர்பார்க்கபடுகிறது.