தகிக்கும் ஐரோப்பா! வெப்பத்தின் உச்சத்தில் ஆம்லேட் சமைத்த நபர்!

ஐரோப்பிய : நாடுகளில் தற்பொழுது கோடைக்காலம் தீவிரமடைந்து, கடுமையான வெப்ப அலை (Heatwave) வீசி வருகிறது. பிரான்ஸ், ஜெர்மனி, நெதர்லாந்து உள்ளிட்ட பல்வேறு ஐரோப்பிய நாடுகளில் முன்னெப்போதும் இல்லாத வகையில் வெயில் தகித்து வருவதால், அங்குள்ள பொதுமக்கள் பகல் நேரங்களில் வெளியே வர முடியாமல் பெரும் அவதிக்குள்ளாகி வருகின்றனர்.

இத்தகைய கடுமையான சூழ்நிலைக்கு மத்தியில், சமூக வலைதளங்களில் நபர் ஒருவர் பகிர்ந்துள்ள வினோதமான வீடியோ ஒன்று தற்பொழுது இணையத்தில் காட்டுத்தீயாகப் பரவி உலகளவில் பெரும் வைரலாகி வருகிறது.

ஐரோப்பாவில் வீசி வரும் இந்த அதீத வெப்பத்தை உலகிற்கு உணர்த்தும் வகையில், நேதன் ஸ்வார்ட்ஸ் (Nathan Swart) என்ற நபர் எவ்வித அடுப்பு அல்லது எரிபொருளின் உதவியும் இல்லாமல், வெறும் சூரிய வெப்பத்தைப் பயன்படுத்தித் தார்ச்சாலையில் ஆம்லெட் போட்டு அசத்தியுள்ளார். அவர் முட்டையை உடைத்து ஊற்றிய சில நிமிடங்களிலேயே அது வெயிலின் தாக்கத்தால் நன்றாக வெந்து ஆம்லெட்டாக மாறிய வினோதக் காட்சி பார்ப்பவர்களை வாயடைக்க வைத்துள்ளது.

இந்த வீடியோ ஐரோப்பாவின் தற்போதைய தகிக்கும் நிலையை அப்படியே பிரதிபலிப்பதாக நெட்டிசன்கள் கருத்து தெரிவித்து வருகின்றனர். இதற்கிடையில், கடந்த சில நாட்களாகக் கொளுத்தி எடுத்த வெயிலில் இருந்து நெதர்லாந்து உள்ளிட்ட சில நாடுகளுக்குத் தற்பொழுது தற்காலிகமாகச் சற்று நிம்மதி கிடைத்துள்ளது.

வாரத்தின் தொடக்கமான இன்று நெதர்லாந்தில் வெப்பத்தின் அளவு குறைந்து, பெரும்பாலான பகுதிகளில் 22 முதல் 25 டிகிரி செல்சிஸ் வரையிலும், தென்கிழக்கு பகுதிகளில் அதிகபட்சமாக 28 டிகிரி செல்சிஸ் வரையிலும் பதிவாகியுள்ளது. வடமேற்கு திசையில் இருந்து வீசும் மிதமான காற்றால் காற்றில் ஈரப்பதம் குறைந்து, மக்கள் நிம்மதியடைந்துள்ளனர்.

இருப்பினும், இந்த நிம்மதி தற்காலிகமானதுதான் என வானிலை ஆய்வாளர்கள் எச்சரித்துள்ளனர். தென்மேற்கு ஐரோப்பாவில் தற்பொழுது மீண்டும் புதிய வெப்பக்காற்று உருவாகி வருவதாகவும், அது இந்த வார இறுதியில் வடக்கு நோக்கி நகர்ந்து நெதர்லாந்து உள்ளிட்ட நாடுகளுக்குள் நுழையும் என்பதால், அடுத்த வாரத் தொடக்கத்தில் மீண்டும் மிகக் கடுமையான வெப்ப அலை மற்றும் வெப்பமண்டல காலநிலை திரும்பக் கூடும் என்றும் வானிலை மையங்கள் எச்சரித்துள்ளன.