மும்பை : இந்தியன் பிரீமியர் லீக் (IPL) 2026 தொடரில் மும்பை இந்தியன்ஸ் அணி பிளேஆஃப் சுற்றுக்கு தகுதி பெறத் தவறியதைத் தொடர்ந்து, அணியின் கேப்டன் ஹர்திக் பாண்டியா சமூக ஊடகத்தில் பெரும் விவாதத்தை ஏற்படுத்தியுள்ளார்.ராயல் சேலஞ்சர்ஸ் பெங்களூருக்கு எதிராக மே 10 அன்று ராய்ப்பூரில் நடைபெற்ற போட்டியில் தோல்வியடைந்ததன் மூலம் மும்பை இந்தியன்ஸ் அணியின் பிளேஆஃப் கனவு முடிவுக்கு வந்தது.
இந்தத் தோல்விக்குப் பிறகு, ஹர்திக் பாண்டியா தனது இன்ஸ்டாகிராம் பக்கத்தில் மும்பை இந்தியன்ஸ் அணியை Unfollow செய்ததாக ரசிகர்கள் கண்டுபிடித்தனர். அப்போது அவரது பின்தொடரும் பட்டியலில் 150 அக்கவுண்ட்கள் மட்டுமே இருந்ததாகவும், MI இல்லை என்றும் கூறப்பட்டது.
இந்தச் செய்தி சமூக ஊடகங்களில் வேகமாகப் பரவியது. ஹர்திக் மீண்டும் அணியுடன் மோதலில் இருப்பதாகவும், அணியை விட்டு வெளியேறும் வாய்ப்பு இருப்பதாகவும் ஊகங்கள் எழுந்தன. இருப்பினும், சிறிது நேரத்துக்குப் பிறகு அவரது பின்தொடரும் எண்ணிக்கை 151 ஆக உயர்ந்து, MI மீண்டும் பட்டியலில் இடம்பெற்றது.
2024-ல் ரோஹித் சர்மாவுக்கு பதிலாக கேப்டனாக நியமிக்கப்பட்ட ஹர்திக், ரசிகர்கள் மத்தியில் பெரும் சர்ச்சையை ஏற்படுத்தியிருந்தார். இந்த சீசனும் ஹர்திக் மற்றும் மும்பை இந்தியன்ஸ் அணிக்கு ஏமாற்றத்தையே கொடுத்தது. ஐந்து முறை சாம்பியனான MI அணி இந்த சீசனில் தொடர்ச்சியான தோல்விகளைச் சந்தித்தது.ஹர்திக் தானும் 8 போட்டிகளில் 146 ரன்கள் மட்டுமே எடுத்தார். பந்து வீச்சிலும் 4 விக்கெட்டுகளை மட்டுமே கைப்பற்றினார்.
முதுகு வலி காரணமாக பல முக்கிய போட்டிகளை அவர் தவறவிட்டார். அவரது இடத்தில் சூர்யகுமார் யாதவ் தற்காலிக கேப்டனாக பொறுப்பேற்றார்.இருப்பினும், மும்பை இந்தியன்ஸ் நிர்வாகம் இன்னும் ஹர்திக்கின் தலைமையில் நம்பிக்கை வைத்துள்ளதாக தகவல்கள் தெரிவிக்கின்றன.ஹர்திக் தவறுதலாகவே MI பக்கத்தை Unfollow செய்திருக்கலாம் என்றும், உடனடியாக மீண்டும் Follow செய்துவிட்டார் என்றும் ரசிகர்கள் கருத்து தெரிவித்து வருகின்றனர்.