விளையாட மட்டுமே வந்தோம்..கைக்குலுக்கல் சர்ச்சை குறித்து சூர்யகுமார் என்ன சொன்னார் தெரியுமா?

துபாய் :செப்டம்பர் 14 அன்று நடந்த ஆசிய கோப்பை 2025 குரூப் ஏ ஆட்டத்தில், இந்திய அணி பாகிஸ்தானை 7 விக்கெட் வித்தியாசத்தில் எளிதாக வீழ்த்தியது. இந்த வெற்றியைத் தொடர்ந்து, இந்திய வீரர்கள் பாகிஸ்தான் அணியுடன் பாரம்பரியமான கைக்குலுக்கலைத் தவிர்த்தது பெரும் சர்ச்சையை ஏற்படுத்தியது. இந்திய கேப்டன் சூர்யகுமார் யாதவ், போட்டிக்கு பிந்தைய பத்திரிகையாளர் சந்திப்பில் இதற்கு விளக்கமளித்தார். “நாங்கள் இங்கு விளையாட மட்டுமே வந்தோம் என்று அணியாக முடிவெடுத்தோம். சிறப்பான பதிலடியை மைதானத்தில் கொடுத்துவிட்டோம்,” என்று கூறினார்.

இந்த முடிவு, இந்திய அரசு மற்றும் BCCI-யின் வழிகாட்டுதல்களின் அடிப்படையில் எடுக்கப்பட்டதாகவும், விளையாட்டு உணர்வுக்கு அப்பாற்பட்ட சில அரசியல் சூழல்களை பிரதிபலிப்பதாகவும் அவர் தெரிவித்தார்.சூர்யகுமார், தனது விளக்கத்தில் மேலும் கூறுகையில், “எங்கள் அரசு மற்றும் BCCI-யுடன் ஒரே பக்கத்தில் இருந்தோம். இது முன்கூட்டியே திட்டமிடப்பட்ட முடிவு இல்லை. ஆனால், சில விஷயங்கள் விளையாட்டு உணர்வுக்கு மேல் உள்ளன. நாங்கள் மைதானத்தில் எங்கள் பதிலை ஆட்டத்தின் மூலம் கொடுத்தோம்,” என்றார்.

ஜம்மு-காஷ்மீரின் பகால்காம் தாக்குதலில் 26 சுற்றுலாப் பயணிகள் கொல்லப்பட்டதையும், இந்தியாவின் ‘ஆபரேஷன் சிந்தூர்’ நடவடிக்கைகளையும் குறிப்பிட்டு, இந்த முடிவு அரசியல் சூழலுடன் தொடர்புடையது என்று மறைமுகமாக உறுதிப்படுத்தினார். “சமூக ஊடகங்களில் #BoycottIndvsPak போன்ற பிரச்சாரங்கள் இருந்தாலும், நாங்கள் எங்கள் வேலையில் கவனம் செலுத்தினோம். விளையாட்டில் எங்கள் பதில் முழுமையாக இருந்தது,” என்று அவர் வலியுறுத்தினார். இந்திய அணியின் இந்த முடிவு, BCCI-யின் வழிகாட்டுதல்களைப் பின்பற்றியதாகவும், அணி ஒருமித்து எடுத்த முடிவாகவும் இருந்தது.

அதைப்போல, போட்டிக்கு முன் நடந்த கேப்டன்கள் பத்திரிகையாளர் சந்திப்பில், சூர்யகுமார் பாகிஸ்தான் கேப்டன் சல்மான் அலி ஆகாவுடன் கை குலுக்கியதற்கு விமர்சனங்கள் எழுந்ததை ஒப்புக்கொண்டார். “அது ஒரு தனி சம்பவம். ஆனால், போட்டி நேரத்தில் எங்கள் முடிவு வேறாக இருந்தது. நாங்கள் விளையாட வந்தோம், அதைச் சிறப்பாக செய்தோம்,” என்று தெளிவுபடுத்தினார். இந்திய அணியின் வெற்றி, தொடக்க வீரர் அபிஷேக் சர்மாவின் 31 ரன்கள் (13 பந்துகள்) மற்றும் சூர்யகுமாரின் 47 ரன்கள் (37 பந்துகள்) ஆகியவற்றால் மைதானத்தில் பதிலடி கொடுக்கப்பட்டதாக அவர் குறிப்பிட்டார் என்பதும் குறிப்பிடத்தக்கது.