ஸ்டாலின் வீட்டுக்கே நேரில் சென்ற ரஜினிகாந்த்! என்ன பேசினார் தெரியுமா?

சென்னை : தமிழ்நாடு சட்டமன்றத் தேர்தல் 2026 முடிவுகளுக்குப் பிறகு, நடிகர் ரஜினிகாந்த் திமுக தலைவர் மு.க.ஸ்டாலினை அவரது இல்லத்திற்கே நேரில் சென்று சந்தித்தார். இந்தச் சந்திப்பு அரசியல் வட்டாரத்தில் பெரும் கவனத்தை ஈர்த்துள்ளது.

தேர்தலில் தமிழக வெற்றிக் கழகம் (தவெக) 108 தொகுதிகளில் வெற்றி பெற்று ஆட்சி அமைக்கும் நிலையில், நாளை (மே 7) விஜய் முதலமைச்சராக பதவியேற்கவிருக்கிறார். இந்நிலையில், திமுக தலைவர் ஸ்டாலின் முதலமைச்சர் பதவியை ராஜினாமா செய்தார். திமுக 59 தொகுதிகளில் வெற்றி பெற்று எதிர்க்கட்சி அந்தஸ்தைப் பெற்றுள்ளது.

குறிப்பாக, ஸ்டாலின் போட்டியிட்ட கொளத்தூர் தொகுதியில் தவெக வேட்பாளர் டி.எஸ்.பாபுவிடம் 8,795 வாக்குகள் வித்தியாசத்தில் தோல்வியடைந்தார். இந்தத் தோல்வி திமுக தொண்டர்களைப் பெரிதும் கலங்க வைத்தது. தோல்விக்குப் பிறகு ஸ்டாலின் தனக்கு வாக்களித்த கொளத்தூர் மக்களை நேரில் சந்தித்து நன்றி தெரிவித்தார். அப்போது நடைபெற்ற சாலை நிகழ்வில் (road show) திமுக மூத்த தலைவர் சேகர் பாபு உள்ளிட்ட பலரும் கண்கலங்கினர்.தேர்தலில் தோல்வியடைந்தபோதும், “திமுக இதுவரை மக்களுக்காக சிறப்பான ஆளும் கட்சியாக செயல்பட்டது. இனி சிறப்பான எதிர்க்கட்சியாக செயல்படும்” என்று ஸ்டாலின் தெரிவித்தார்.

இந்தச் சூழலில், நடிகர் ரஜினிகாந்த் ஸ்டாலினின் இல்லத்திற்கு நேரில் சென்று அவரைச் சந்தித்தார். சுமார் 30 நிமிடங்கள் நீடித்த இந்தச் சந்திப்பின்போது, ரஜினிகாந்த் ஸ்டாலினுக்கு தனது ஆறுதலைத் தெரிவித்ததாகவும், “உங்களுடைய மக்கள் பணி தொடரட்டும்” என்று வாழ்த்தியதாகவும் தகவல்கள் வெளியாகியுள்ளன.இரு தலைவர்களும் தமிழ்நாட்டின் எதிர்காலம், அரசியல் சூழல் உள்ளிட்ட பல்வேறு விவகாரங்கள் குறித்து உரையாடியதாகக் கூறப்படுகிறது.