சென்னை : சூப்பர் ஸ்டார் ரஜினிகாந்த் நடிப்பில், இயக்குனர் நெல்சன் இயக்கத்தில் உருவாகி வரும் 'ஜெயிலர் 2' திரைப்படம் திட்டமிட்டபடி வெளியாகும் என தயாரிப்பு நிறுவனமான சன் பிக்சர்ஸ் அதிகாரப்பூர்வமாக உறுதிப்படுத்தியுள்ளது. படம் தள்ளிப்போக வாய்ப்பே இல்லை என்பதைத் திட்டவட்டமாக அறிவித்து, ரிலீஸ் தேதியையும் படக்குழுவினர் வெளியிட்டுள்ளனர்.
வதந்திகளுக்கு முற்றுப்புள்ளி
ஜெயிலர் படத்தின் முதல் பாகம் அடைந்த பிரம்மாண்ட வெற்றியைத் தொடர்ந்து, அதன் இரண்டாம் பாகத்தின் படப்பிடிப்பு முடிவடைந்து தற்போது இறுதிக்கட்ட பணிகள் மிகவும் மும்மரமாக நடந்து வருகின்றன. இதற்கிடையில், படத்தில் சில காட்சிகள் திருப்திகரமாக இல்லை என்றும், அதனால் சில பகுதிகளை மீண்டும் படப்பிடிப்பு (Reshoot) செய்ய ரஜினிகாந்த் கேட்டுக்கொண்டதாகவும் சமூக வலைத்தளங்களில் வதந்திகள் பரவின. இதனால் படம் ரிலீஸ் ஆவதில் தாமதம் ஏற்படும் என்று கூறப்பட்ட நிலையில், தற்போது தயாரிப்பு நிறுவனம் அந்த வதந்திகளுக்கு முழுமையாக முற்றுப்புள்ளி வைத்துள்ளது.
ரிலீஸ் தேதி அறிவிப்பு
சன் பிக்சர்ஸ் நிறுவனம் ஏற்கனவே ஜூலை மாதம் அறிவித்தபடி, 'ஜெயிலர் 2' திரைப்படம் வரும் 2026 அக்டோபர் 15 ஆம் தேதி வியாழக்கிழமை அன்று உலகெங்கும் உள்ள திரையரங்குகளில் மிக பிரம்மாண்டமாக வெளியாகவுள்ளது. ஆயுத பூஜை மற்றும் விஜயதசமி பண்டிகை (தசரா) விடுமுறை நாட்களைக் குறிவைத்து இந்தத் திரைப்படம் ரிலீஸ் செய்யப்படுகிறது. பண்டிகை காலத்தில் வெளியாவதால் குடும்பம் குடும்பமாக மக்கள் தியேட்டருக்கு வந்து படத்தை ரசிப்பார்கள் என்று படக்குழுவினர் பெரிதும் நம்புகின்றனர்.
மிரட்டலான புதிய நட்சத்திரப் பட்டாளம்
ஜெயிலர் 2 திரைப்படத்தில் ரஜினிகாந்துடன் இணைந்து நடிக்கும் நட்சத்திரங்களின் பட்டியல் ரசிகர்களுக்குப் பெரிய ஆச்சரியத்தைத் தந்துள்ளது. குறிப்பாக, இனிமேல் சிறப்புத் தோற்றங்களில் (Cameo) நடிக்க மாட்டேன் என்று அறிவித்திருந்த நடிகர் விஜய் சேதுபதி, இந்த படத்தில் ஒரு முக்கியக் கதாபாத்திரத்தில் சிறப்புத் தோற்றத்தில் நடிக்க சம்மதித்துள்ளார்.
இவர்களுடன் ரம்யா கிருஷ்ணன், யோகி பாபு மற்றும் பாலிவுட் நடிகை வித்யா பாலன் ஆகியோர் இணைந்து நடிப்பதால், இந்த இரண்டாம் பாகம் முதல் பாகத்தை விட டபுள் மடங்கு மாஸான பொழுதுபோக்குத் திரைப்படமாக இருக்கும் என்று மக்கள் ஆவலுடன் காத்திருக்கின்றனர்.