புதுடெல்லி: டெல்லி ஜந்தர் மந்தர் பகுதியில் போராட்டத்தில் ஈடுபடும் மாணவர்களைக் கண்காணிப்பதற்காக, செயற்கை நுண்ணறிவு (AI) தொழில்நுட்பத்துடன் கூடிய முக அங்கீகார (Facial Recognition) வாகனங்களை டெல்லி காவல்துறை பயன்படுத்தத் தொடங்கியுள்ளது. இது தற்போது நாடு முழுவதும் பெரும் தனியுரிமை (Privacy) விவாதத்தை கிளப்பியுள்ளது.
வைரலாகும் வீடியோக்கள்: பின்னணி என்ன?
சமீபத்தில் ஜந்தர் மந்தர் பகுதியில் நடைபெற்ற மாணவர் போராட்டத்தின் போது எடுக்கப்பட்ட வீடியோக்கள் எக்ஸ் (X) தளத்தில் வேகமாகப் பரவி வருகின்றன. சி.ஜே.பி (CJP) போன்ற அமைப்புகளும் இந்த வீடியோக்களைப் பகிர்ந்துள்ளன. அந்த வீடியோவில், 360 டிகிரி கேமராக்கள் பொருத்தப்பட்ட நடமாடும் கண்காணிப்பு வாகனம் ஒன்று நிறுத்தப்பட்டுள்ளது.
அந்த வாகனத்தின் உள்ளே இருக்கும் திரையில், வெளியில் போராட்டம் நடத்துவோரின் முகங்கள் ஸ்கேன் செய்யப்படுவதோடு, சில குறிப்பிட்ட நபர்களின் பெயர்கள், புகைப்படங்கள் மற்றும் தனிப்பட்ட விவரங்கள் உடனுக்குடன் தோன்றுவது போன்ற காட்சிகள் இடம்பெற்றுள்ளன.
ஆதார் கார்டுடன் இணைக்கப்பட்டுள்ளதா?
போராட்டக்காரர்களின் முகத்தை ஸ்கேன் செய்த உடனே அவர்களின் பெயர் மற்றும் முகவரி போன்ற தனிப்பட்ட விவரங்கள் திரையில் தோன்றுவதால், இந்த AI சிஸ்டம் மத்திய அரசின் 'ஆதார்' (Aadhaar) தரவுத்தளத்துடன் இணைக்கப்பட்டுள்ளதா என்ற அச்சமும், சந்தேகமும் சமூக வலைதளப் பயனர்களிடையே எழுந்துள்ளது.
உண்மை நிலை என்ன?
வைரலாகும் எந்தவொரு வீடியோவிலும் 'ஆதார்' என்ற வார்த்தை நேரடியாகக் குறிப்பிடப்படவில்லை.இந்தத் தொழில்நுட்பம் ஆதார் தரவுத்தளத்துடன் இணைக்கப்பட்டுள்ளது என்பதற்கு இதுவரை எந்தவொரு அதிகாரப்பூர்வ ஆதாரமும் இல்லை.டெல்லி காவல்துறையும் இந்த சிஸ்டம் ஆதாரோடு இணைக்கப்பட்டுள்ளதாக எங்கும் அறிவிக்கவில்லை.
டெல்லி போலீஸ் பயன்படுத்தும் 2 ரகசிய வாகனங்கள் என்ன
முதல் வாகனம் (Mobile Monitoring Unit): இது ஜந்தர் மந்தர் பகுதி முழுவதும் பொருத்தப்பட்டுள்ள சிசிடிவி (CCTV) கேமராக்களில் இருந்து வரும் நேரடி காட்சிகளை (Live Feeds) சேகரிக்கும் கட்டுப்பாட்டு அறையாகச் செயல்படுகிறது.
இரண்டாவது வாகனம் (AI Analysis Unit): இந்த வாகனம் தான் செயற்கை நுண்ணறிவு (AI) தொழில்நுட்பத்தைப் பயன்படுத்தி, கேமராவில் பதிவாகும் முகங்களை, காவல்துறையிடம் ஏற்கனவே இருக்கும் குற்றவாளிகளின் புகைப்படத் தொகுப்போடு (Police Database) ஒப்பிட்டுப் பார்க்கிறது.
காவல்துறையின் விளக்கம் என்ன?
போராட்டத்தில் பங்கேற்கும் ஒட்டுமொத்த பொதுமக்களையோ அல்லது மாணவர்களையோ அடையாளம் காண்பது தங்களது நோக்கமல்ல என்று டெல்லி காவல்துறை அதிகாரிகள் தெரிவித்துள்ளனர்.
இதன் முக்கிய நோக்கம், போராட்டம் நடக்கும் கூட்ட நெரிசலைப் பயன்படுத்தி ஏதேனும் பழைய குற்றவாளிகள், சமூக விரோதிகள் அல்லது வன்முறையாளர்கள் உள்ளே நுழைந்துவிடக் கூடாது என்பதற்காக மட்டுமே. அப்படி யாராவது நுழைந்தால், இந்த AI சிஸ்டம் காவல்துறையினருக்கு உடனடியாக எச்சரிக்கை (Alert) விடுக்கும் என்று அதிகாரிகள் தரப்பில் விளக்கமளிக்கப்பட்டுள்ளது.இருப்பினும், ஜனநாயக ரீதியாகப் போராடுபவர்களை இப்படி அதிநவீன கேமராக்கள் மூலம் கண்காணிப்பது தனிமனித சுதந்திரத்திற்கு எதிரானது என்று மனித உரிமை ஆர்வலர்கள் குற்றம் சாட்டி வருகின்றனர்.