மகாராஷ்டிரா :மராட்டிய துணை முதலமைச்சர் அஜித் பவார் நேற்று விமான விபத்தில் உயிரிழந்த சம்பவத்தின் துயரம் இன்னும் மாநிலம் முழுவதும் தொடர்கிறது. அவரது இறுதிச் சடங்கு இன்று காலை 11 மணிக்கு முழு அரசு மரியாதையுடன் நடைபெற உள்ளது. மும்பையில் உள்ள அவரது இல்லத்தில் இருந்து புறப்பட்ட உடல், பொதுமக்கள் அஞ்சலி செலுத்தும் வகையில் அமைக்கப்பட்டுள்ள இடத்துக்கு கொண்டு செல்லப்பட்டு, பின்னர் இறுதிச் சடங்கு நடைபெறும் இடத்துக்கு எடுத்துச் செல்லப்படும்.
இறுதிச் சடங்கில் பிரதமர் நரேந்திர மோடி, உள்துறை அமைச்சர் அமித் ஷா, மராட்டிய முதலமைச்சர் தேவேந்திர ஃபட்னாவிஸ் உள்ளிட்ட முக்கிய தலைவர்கள் பங்கேற்க உள்ளதாக தகவல்கள் வெளியாகியுள்ளன. மத்திய அமைச்சர்கள், மாநில அமைச்சர்கள், அரசியல் கட்சி தலைவர்கள், பிரபலங்கள் என பலரும் இறுதிச் சடங்கில் கலந்து கொண்டு அஜித் பவாருக்கு அஞ்சலி செலுத்துவர் என்று எதிர்பார்க்கப்படுகிறது.
மராட்டிய அரசு சார்பில் முழு அரசு மரியாதையுடன் சடங்குகள் நடத்தப்படும்.அஜித் பவாரின் மறைவை அடுத்து மராட்டிய மாநிலம் முழுவதும் 3 நாட்கள் துக்கம் அனுசரிக்கப்படும் என்று மாநில அரசு உத்தியோகபூர்வமாக அறிவித்துள்ளது. அரசு அலுவலகங்கள், கல்வி நிறுவனங்கள், பொதுப் போக்குவரத்து ஆகியவற்றில் கொடி ஏற்றம் செய்யப்படாமல் பாதி கொடியில் பறக்க விடப்படும்.
மக்கள் தங்கள் வீடுகளிலும் கொடிகளை பாதி உயரத்தில் ஏற்றி இரங்கல் தெரிவிக்க வேண்டும் என்று அரசு வேண்டுகோள் விடுத்துள்ளது.அஜித் பவாரின் மறைவு மராட்டிய அரசியலில் பெரும் வெற்றிடத்தை ஏற்படுத்தியுள்ளது. NDA கூட்டணியில் முக்கிய பங்காற்றிய அவர், NCP-யின் வலுவான தூணாக இருந்தவர். இன்றைய இறுதிச் சடங்கு மராட்டிய மக்களின் ஒற்றுமையை வெளிப்படுத்தும் நிகழ்வாக அமையும் என்று எதிர்பார்க்கப்படுகிறது. உயிரிழந்த அஜித் பவார் மற்றும் விமானத்தில் உயிரிழந்த மற்றவர்களின் ஆத்மாக்களுக்கு அமைதி கிடைக்க வேண்டும் என்று அனைவரும் பிரார்த்தனை செய்து வருகின்றனர்.