தூய்மைப் பணியாளர் உயிரிழப்பு.. "திமுக அரசே முழு பொறுப்பு"

தூய்மைப் பணியாளர் உயிரிழப்பு.. "திமுக அரசே முழு பொறுப்பு" – டிடிவி தினகரன் கருத்து!

மின்சார வாரியத்திடம் புகாரளித்தும் மின் கம்பிகள் சீர் செய்யப்படாததே இறப்புக்கு காரணம் என தினகரன் குற்றச்சாட்டை முன் வைத்துள்ளார்.

ByBalaVerified account

1 Min Read

Published - 23 Aug 2025 at 14:42 IST

சென்னை :கண்ணகி நகரில், அரசு நிர்வாகத்தின் அலட்சியத்தால் ஏற்பட்ட மின்சார விபத்தில் தூய்மைப் பணியாளர் ஒருவர் உயிரிழந்த சம்பவத்திற்கு அமமுக பொதுச்செயலாளர் டிடிவி தினகரன் கடும் கண்டனம் தெரிவித்துள்ளார். சேதமடைந்த மின் கம்பிகளை சரிசெய்ய வேண்டும் என மின்சார வாரியத்திடம் மீண்டும் மீண்டும் புகார் அளிக்கப்பட்டும், உரிய நடவடிக்கை எடுக்கப்படாததே இந்த உயிரிழப்புக்கு முக்கிய காரணம் என்று அவர் குற்றம்சாட்டியுள்ளார்.

கண்ணகி நகர் மட்டுமின்றி, எழில்நகர், பெரும்பாக்கம் உள்ளிட்ட பல பகுதிகளில் சேதமடைந்த மின் கம்பிகள் குறித்து மக்கள் தொடர்ந்து புகார் அளித்தும், மின்சார வாரியம் எவ்வித நடவடிக்கையும் எடுக்கவில்லை என்று அப்பகுதி மக்கள் குற்றம்சாட்டியுள்ளனர். மழைக்காலம் தொடங்கியிருக்கும் நிலையில், இந்த அபாயகரமான மின் கம்பிகள் மேலும் பெரும் ஆபத்தை ஏற்படுத்தலாம் என அவர்கள் எச்சரித்துள்ளனர்.

தூய்மைப் பணியாளர்களின் பாதுகாப்பு கோரிக்கைகளை நிறைவேற்றாமல், அவர்களின் போராட்டங்களை அடக்க காவல்துறையைப் பயன்படுத்திய திமுக அரசு, இந்த உயிரிழப்புக்கு எவ்வாறு பொறுப்பேற்கப் போகிறது என்று டிடிவி தினகரன் கேள்வி எழுப்பியுள்ளார். “அரசின் அலட்சியத்தால் ஏற்பட்ட இந்த துயரத்திற்கு நிவாரணம் மட்டும் தீர்வாகாது. தமிழக அரசு மக்களின் பாதுகாப்பை உறுதி செய்ய வேண்டும்,” என்று அவர் வலியுறுத்தினார்.

மழைக்காலத்தில் சேதமடைந்த மின் கம்பிகளால் ஏற்படும் ஆபத்தைத் தடுக்க, உடனடியாக அவற்றை சரிசெய்ய வேண்டும் என்று டிடிவி தினகரன் மின்சார வாரியத்தையும், தமிழக அரசையும் வற்புறுத்தியுள்ளார். “தூய்மைப் பணியாளர்களின் உயிரைப் பாதுகாக்க அரசு உரிய நடவடிக்கைகளை எடுக்க வேண்டும். மக்களின் பாதுகாப்பு முதன்மையாக கருதப்பட வேண்டும்,” என்று அவர் தனது அறிக்கையில் குறிப்பிட்டார்.