சென்னை : ஊத்தங்கரை தவெக எம்.எல்.ஏ இளையராஜாவிடம் ரூ.35 கோடி பேரம் பேசியதாக எழுந்த புகாரில், தமிழகத்தின் முன்னாள் அமைச்சர் செந்தில் பாலாஜி மற்றும் அவரது சகோதரர் அசோக்குமார் மீது சென்னை காவல்துறை அதிரடி நடவடிக்கைகளைத் தொடங்கியுள்ளது. இந்த விவகாரம் தமிழக அரசியலில் பெரும் பரபரப்பை ஏற்படுத்தியுள்ளது.

செந்தில் பாலாஜி மற்றும் அவரது சகோதரர் அசோக்குமார் ஆகிய இருவரும் வரும் திங்கட்கிழமை நேரில் ஆஜராகி விளக்கம் அளிக்க வேண்டும் என்று சென்னை திருவல்லிக்கேணி காவல்துறையினர் சம்மன் அனுப்பியுள்ளனர். இந்தச் சம்மனை கரூரில் உள்ள செந்தில் பாலாஜியின் பூர்வீக இல்லத்திற்குச் சென்ற காவல்துறை அதிகாரிகள் வழங்கியுள்ளனர். இந்த வழக்கில் உண்மைகளையும், சூழ்நிலைகளையும் வெளிக்கொணர செந்தில் பாலாஜியிடம் விசாரணை நடத்துவது அவசியம் என காவல்துறை சம்மனில் குறிப்பிட்டுள்ளது.

சம்மன் வழங்கப்பட்ட சூழலில், செந்தில் பாலாஜி மற்றும் அவரது சகோதரர் அசோக்குமார் இருவரும் தலைமறைவாக உள்ளதாகத் திருவல்லிக்கேணி காவல்துறையினர் தெரிவித்துள்ளனர். அவர்கள் வெளிநாடு தப்பிச் செல்ல வாய்ப்புள்ளதாகக் கருதி, இருவருக்கும் எதிராக 'லுக் அவுட்' (Look Out) நோட்டீஸை காவல்துறை பிறப்பித்துள்ளது. இதன் மூலம் விமான நிலையங்கள் மற்றும் துறைமுகங்களில் அவர்கள் கண்காணிக்கப்படுவார்கள்.

என்ன சொல்கிறது சம்மன்?

காவல்துறை அனுப்பியுள்ள சம்மனில், "குதிரை பேர வழக்கு தொடர்பாக உங்களை நேரில் விசாரிப்பதன் மூலம் மட்டுமே இந்த விவகாரத்தில் மறைந்துள்ள உண்மைகளையும், சூழ்நிலைகளையும் வெளிக்கொணர முடியும்" என்று தெளிவாகக் குறிப்பிடப்பட்டுள்ளது. 35 கோடி ரூபாய் பேரம் என்ற குற்றச்சாட்டு மிக தீவிரமான ஒன்றாகப் பார்க்கப்படுவதால், விசாரணை வளையம் மேலும் இறுகியுள்ளது.

இந்த லுக் அவுட் நோட்டீஸ் மற்றும் சம்மன் விவகாரம், செந்தில் பாலாஜி மற்றும் அவரது தரப்பினருக்குப் பெரும் சட்ட நெருக்கடியை உருவாக்கியுள்ளது. தவெக-திமுக இடையேயான அரசியல் மோதலில் இது ஒரு முக்கியத் திருப்பமாகப் பார்க்கப்படுகிறது.