வாஷிங்டன் :அமெரிக்க அதிபர் டொனால்ட் ட்ரம்ப், ஈரான் மீதான தற்போதைய போரை முடித்துக்கொள்வது குறித்து தீவிரமாக பரிசீலித்து வருவதாக தெரிவித்துள்ளார். இது மத்திய கிழக்கு பிராந்தியத்தில் கடந்த சில வாரங்களாக தீவிரமடைந்து வரும் இராணுவ பதற்றத்துக்கு தற்காலிக தீர்வு காணும் முயற்சியாக பார்க்கப்படுகிறது.இந்நிலையில், உலக அளவில் கச்சா எண்ணெய் விநியோகத்தில் ஏற்பட்டுள்ள கடுமையான தட்டுப்பாடு மற்றும் விலை உயர்வை சீராக்கும் நோக்கில், ஈரான் எண்ணெய் மீதான அமெரிக்காவின் பொருளாதார தடைகளை (sanctions) ஓரளவு தளர்த்தியுள்ளது.
இந்த தளர்வு ஈரானின் எண்ணெய் ஏற்றுமதியை சற்று இயல்பு நிலைக்கு கொண்டு வர உதவும் என்று எதிர்பார்க்கப்படுகிறது.ஈரான் மீதான தடைகள் தளர்த்தப்பட்டதால், சர்வதேச சந்தையில் கச்சா எண்ணெய் விலை சற்று குறையும் வாய்ப்பு உருவாகியுள்ளது. ஹார்முஸ் நீரிணை வழியாக செல்லும் எண்ணெய் போக்குவரத்து பாதுகாப்பு அதிகரித்தால், உலக நாடுகளுக்கு எண்ணெய் விநியோகம் மீண்டும் சீரடையும் என்று எண்ணெய் துறை நிபுணர்கள் கருத்து தெரிவித்துள்ளனர்.
இந்த அறிவிப்பு அமெரிக்கா – ஈரான் இடையேயான உறவில் சிறிது தளர்வை ஏற்படுத்தும் என்று அரசியல் ஆய்வாளர்கள் கருதுகின்றனர். இருப்பினும், போர் முழுமையாக முடிவுக்கு வருவது குறித்து இறுதி முடிவு எடுக்கப்படவில்லை என்பதால், மத்திய கிழக்கில் பதற்றம் முழுமையாக குறையவில்லை என்றே பார்க்கப்படுகிறது.
தமிழ்நாடு உள்ளிட்ட இந்தியாவில் எண்ணெய் விலை உயர்வு, எல்பிஜி கியாஸ் சிலிண்டர் தட்டுப்பாடு, போக்குவரத்து கட்டண உயர்வு போன்ற பிரச்சினைகளுக்கு இந்த நடவடிக்கை சிறிதளவு நிவாரணம் அளிக்கும் என்று எதிர்பார்க்கப்படுகிறது. இருப்பினும், சர்வதேச சந்தை மாற்றங்கள், புவிசார் அரசியல் நிலவரங்கள், ஈரான் – இஸ்ரேல் இடையேயான மோதல் தொடர்ச்சி ஆகியவற்றைப் பொறுத்து எதிர்காலத்தில் எண்ணெய் விலையில் ஏற்ற இறக்கம் இருக்கலாம் என்று நிபுணர்கள் எச்சரிக்கின்றனர்.