சென்னை : சென்னை சூப்பர் கிங்ஸ் (CSK) அணியின் முன்னணி வீரரும், ஐகானிக் கேப்டனுமான எம்.எஸ். தோனி இந்த ஐபிஎல் 2026 சீசனில் விளையாடும் வாய்ப்பு குறித்து மீண்டும் சந்தேகம் எழுந்துள்ளது.அணியின் தலைமைப் பயிற்சியாளர் ஸ்டீபன் பிளெமிங், தோனியின் உடல்நிலை குறித்து சமீபத்தில் செய்தியாளர்களிடம் பேசியபோது வருத்தமான தகவலை வெளியிட்டார்.
பிளெமிங் கூறியதாவது“தோனியின் கன்று (calf) பகுதியில் ஏற்பட்ட காயம் மிகவும் கடினமானது. அதை மீண்டும் கிழித்துவிட்டால், அவர் முழு சீசனுக்கும் வெளியேறிவிடுவார். எனவே நாங்கள் அவரை சீக்கிரமே மீண்டும் பயிற்சியில் ஈடுபடுத்த முயற்சி செய்தோம். ஆனால் ஒரு பயிற்சி ஆட்டத்தின்போது அந்தக் காயம் மீண்டும் தூண்டப்பட்டுவிட்டது. அதன் பிறகு அவர் தீவிரமாக ரீஹேப் (rehabilitation) பயிற்சியில் ஈடுபட்டு வருகிறார். ஆனால், ஒரு பின்னடைவு (setback) ஏற்பட்டுள்ளது.” எனவும் தெரிவித்தார்.
இருப்பினும், தோனி தன்னால் முடிந்த அளவுக்கு கடுமையாக உழைத்து வருவதாகவும், மருத்துவக் குழுவுடன் இணைந்து தன்னைத் தயார்படுத்த முயற்சிப்பதாகவும் பிளெமிங் தெரிவித்தார்.“இந்த விஷயத்தில் தோனியே இறுதி முடிவெடுப்பவர். அவர் ஃபிசியோவுடன் இணைந்து தீவிரமாக ரீஹேப் செய்து வருகிறார். நாங்கள் அவரது சொல்லுக்காகக் காத்திருக்கிறோம். இதை இலேசாக எடுத்துக்கொள்ளவில்லை. அவர் முன்னேற்றம் அடைந்து வருகிறார் என்று மட்டும் சொல்ல முடியும்” என்றார்.
தோனி கடந்த 2025 சீசனில் 14 போட்டிகளில் மட்டுமே விளையாடினார். தற்போது 44 வயதான அவர் தனது கிரிக்கெட் வாழ்க்கையின் இறுதிக் கட்டத்தில் இருப்பதால், ரசிகர்கள் அவரை ஒருமுறையாவது களத்தில் பார்க்க ஆவலுடன் காத்திருந்தனர். ஆனால் தொடர்ச்சியான காயம் காரணமாக அவர் இந்த சீசனில் இதுவரை விளையாடவில்லை.
இந்நிலையில், சென்னை சூப்பர் கிங்ஸ் அணி இந்த சீசனில் நிலைத்தன்மையற்ற செயல்பாட்டை வெளிப்படுத்தி வருகிறது. ருதுராஜ் கைக்வாட் தலைமையிலான அணி இதுவரை 8 போட்டிகளில் 6 புள்ளிகள் மட்டுமே பெற்று, புள்ளிப்பட்டியலில் 6ஆம் இடத்தில் உள்ளது. தோனி இல்லாததால் அணியின் அனுபவம் மற்றும் அமைதி குறைவாக இருப்பதாக பலரும் கருதுகின்றனர்.தோனியின் உடல்நிலை முழுமையாக சீராகும் வரை அவர் களத்தில் இறங்குவது உறுதியற்ற நிலையிலேயே உள்ளது.