பிலடெல்பியா : FIFA உலகக் கோப்பை 2026 தொடரில் தனது முதல் வெற்றியை பதிவு செய்து அசத்தியுள்ளது பிரேசில் அணி. பிலடெல்பியா மைதானத்தில் நடைபெற்ற குரூப் C லீக் போட்டியில் ஹைதி அணியை 3-0 என்ற கோல் கணக்கில் வீழ்த்தி, புள்ளிப்பட்டியலில் முதலிடத்திற்கு முன்னேறியுள்ளது.
முதல் போட்டியில் மொராக்கோவுடன் 1-1 என டிரா செய்ததால் விமர்சனங்களை சந்தித்த பிரேசில், இந்த முறை தொடக்கம் முதலே அதிரடி ஆட்டத்தை வெளிப்படுத்தியது. உலகின் முன்னணி அணிகளில் ஒன்றாக கருதப்படும் பிரேசில், தனது முழு திறமையையும் வெளிப்படுத்தி ஹைதி அணியை திணறடித்தது.
மத்தேயுஸ் குன்ஹா இரட்டை கோல்
போட்டியின் 23வது நிமிடத்தில் வினிசியஸ் ஜூனியர் மேற்கொண்ட தாக்குதல் முயற்சியை ஹைதி கோல்கீப்பர் ஜானி பிளாசிட் தடுத்தார். ஆனால் திரும்ப வந்த பந்தை மத்தேயுஸ் குன்ஹா கோலாக மாற்றி பிரேசிலுக்கு முன்னிலை பெற்றுக் கொடுத்தார்.
இதனால் உற்சாகமடைந்த பிரேசில் அணி தொடர்ந்து தாக்குதல் நடத்தி வந்தது. 36வது நிமிடத்தில் வினிசியஸ் ஜூனியர் வழங்கிய துல்லியமான பாஸை பயன்படுத்திய குன்ஹா, தனது இரண்டாவது கோலையும் பதிவு செய்து அணியின் முன்னிலையை 2-0 ஆக உயர்த்தினார்.
வினிசியஸ் ஜூனியரின் மாஸ் ஆட்டம்
முதல் பாதி முடிவதற்கு முன்பு கூடுதல் நேரத்தில், லூகாஸ் பகுவேட்டா வழங்கிய அருமையான பாஸை பெற்ற வினிசியஸ் ஜூனியர், கோல்கீப்பரை எளிதாக ஏமாற்றி மூன்றாவது கோலை அடித்தார்.
இந்த போட்டியில் பிரேசில் அடித்த மூன்று கோல்களிலும் நேரடியாக பங்களித்த வினிசியஸ் ஜூனியர், ஆட்டநாயகன் விருதுக்கான முக்கிய போட்டியாளராக திகழ்ந்தார்.
ஹைதியின் உலகக் கோப்பை கனவு முடிவு
முதல் போட்டியிலும் தோல்வி கண்டிருந்த ஹைதி, இந்த போட்டியிலும் தோல்வியை சந்தித்ததால் உலகக் கோப்பை தொடரில் இருந்து அதிகாரப்பூர்வமாக வெளியேறியுள்ளது. இருப்பினும், கடைசி வரை போராடிய ஹைதி வீரர்கள் ஆறுதல் கோல் அடிக்க முயன்றனர். ஆனால் பிரேசில் பாதுகாப்பு அரணை உடைக்க முடியவில்லை.
குரூப் C-ல் பரபரப்பு
இந்த வெற்றியின் மூலம் பிரேசிலும் மொராக்கோவும் தலா 4 புள்ளிகளுடன் உள்ளன. ஸ்காட்லாந்து 3 புள்ளிகளுடன் மூன்றாவது இடத்தில் உள்ளது. ஹைதி புள்ளிகள் எதுவுமின்றி கடைசி இடத்தில் உள்ளது.
கடைசி லீக் போட்டியில் பிரேசில் - ஸ்காட்லாந்து மோதுகின்றன. மொராக்கோ - ஹைதி அணிகள் மற்றொரு போட்டியில் மோதுகின்றன. இந்த போட்டிகளின் முடிவே நாக்அவுட் சுற்றுக்கு முன்னேறும் அணிகளை தீர்மானிக்கும்.
ரஃபின்யா காயம்.. பிரேசிலுக்கு அதிர்ச்சி
அபார வெற்றியை பெற்றாலும் பிரேசில் அணிக்கு ஒரு கவலை ஏற்பட்டுள்ளது. நட்சத்திர வீரர் ரஃபின்யா முதல் பாதியிலேயே தொடைப்பகுதியில் ஏற்பட்ட அசௌகரியம் காரணமாக வெளியேறினார். அவரது காயம் தீவிரமானதா என்பது குறித்து மருத்துவ பரிசோதனைக்கு பிறகே தெரியவரும். ஸ்காட்லாந்துக்கு எதிரான முக்கியமான போட்டிக்கு முன்பு ரஃபின்யாவின் உடல்நிலை பிரேசில் ரசிகர்களுக்கு கவலையை ஏற்படுத்தியுள்ளது.