பீகார் :சட்டமன்றத் தேர்தல் 2025-இன் வாக்கு எண்ணிக்கை முடிவுகள், தேசிய ஜனநாயக கூட்டணி (NDA) அவர்களுக்கு வரலாற்று ரீதியான அமோக வெற்றியைத் தந்துள்ளது. 243 தொகுதிகளில் NDA 200-க்கும் மேற்பட்ட இடங்களைப் பெற்று, பெரும்பான்மைக்கு தேவையான 122 இடங்களை விட நூற்றுக்கணக்கான இடங்கள் அதிகமாகப் பெற்றுள்ளது. பாரதிய ஜனதா கட்சி (BJP) தனியாக 91 தொகுதிகளில் வென்றுள்ளது, ஜனதா தள ஐக்கியம் (JDU) 83 தொகுதிகளில் வெற்றி பெற்றுள்ளது.
கடந்த 2020 தேர்தலில் 125 இடங்களைப் பெற்ற NDA, இம்முறை 75 இடங்கள் கூடுதலாகப் பெற்று, மகா கட்பந்தன் கூட்டணி (MGB) 40-க்கும் குறைவான இடங்களில் மட்டுமே தங்கியுள்ளது. இந்த வெற்றி, பிரதமர் நரேந்திர மோடி மற்றும் முதலமைச்சர் நிதீஷ் குமாரின் “டபுள் இன்ஜின்” அரசின் வளர்ச்சி மற்றும் நல்லாட்சி உத்திகளுக்கு மக்கள் அளித்த மண்டேட் என்று கருதப்படுகிறது.
பிஹார் தேர்தலில் பாஜக கூட்டணி அமோக வெற்றி பெற்றுள்ள நிலையில், பாஜக தலைமையகத்திற்கு வந்தார் பிரதமர் மோடி பிரதமர் மோடிக்கு மலர்களை தூவி பாஜகவினர் உற்சாக வரவேற்பு அளித்தனர். அதன்பிறகு பேசிய மோடி “பீகார் மக்களுக்கு இதயப்பூர்வமான நன்றியைத் தெரிவித்துக் கொள்கிறேன். இந்தத் தேர்தலில் பெண்கள் மற்றும் இளைஞர்களின் வாக்குகளால் NDA கூட்டணி வெற்றி பெற்றுள்ளது. இதுவரையிலான தேர்தல் வெற்றிகளை முறியடித்து புதிய சாதனையைப் படைத்துள்ளோம்” என்று அவர் பெருமிதத்துடன் தெரிவித்தார்.“பிஹார் மக்கள் அனைத்து தேர்தல் சாதனைகளையும் முறியடித்துவிட்டனர். மாபெரும் வரலாற்றுத் தீர்ப்பை மக்கள் அளித்துள்ளனர்” என்று மோடி கூறினார்.
இந்தத் தேர்தல், பொதுமக்களின் தேர்தல் ஆணையம் மீதான நம்பிக்கையை மேலும் வலுப்படுத்தியதாகவும், கடந்த சில ஆண்டுகளாக தொடர்ந்து உயர்ந்த வாக்குப்பதிவு, பின்தங்கியோர் மற்றும் சுரண்டப்பட்டோரின் அதிகரித்த பங்கேற்பு ஆகியவை தேர்தல் ஆணையத்தின் மிகப்பெரிய சாதனை என்றும் அவர் பாராட்டினார்.“இதே பீகார் தான் ஒரு காலத்தில் மாவோயிஸ்ட் பயங்கரவாதத்தால் ஆதிக்கம் செலுத்தப்பட்டது. நக்சல் பாதிப்புள்ள பகுதிகளில் மாலை 3 மணிக்கே வாக்குப்பதிவு முடிந்துவிடும்.
ஆனால் இந்தத் தேர்தலில் பீகார் மக்கள் பயமின்றி, உற்சாகத்துடனும் உற்சாகத்துடனும் வாக்களித்துள்ளனர். ஜங்கள் ராஜ் காலத்தில் என்ன நடந்தது என்பது உங்களுக்குத் தெரியும். வாக்குச்சாவடிகளில் வெளிப்படையாக வன்முறை நடக்கும், வாக்குப்பெட்டிகள் கொள்ளையடிக்கப்படும். இன்று அதே பீகார் சாதனை வாக்குப்பதிவைப் பதிவு செய்துள்ளது. அமைதியாக வாக்களிக்கிறது.
அனைவரின் வாக்கும் பதிவாகியுள்ளது. அனைவரும் தங்கள் விருப்பப்படி வாக்களித்துள்ளனர்” என்று மோடி நெகிழ்ச்சியுடன் கூறினார்.“பீகார் தேர்தல்களில் நான் ஜங்கள் ராஜ், கட்டா சர்க்கார் பற்றி பேசினேன். RJD கட்சி எதிர்ப்பு தெரிவிக்கவில்லை. ஆனால் காங்கிரஸ் கட்சிக்கு அது வலித்தது. இன்று நான் மீண்டும் உறுதியாகக் கூறுகிறேன்: கட்டா சர்க்கார் ஒருபோதும் பீகாருக்குத் திரும்பாது. பீகார் மக்கள் வளர்ச்சி பீகாருக்கு வாக்களித்துள்ளனர்” என்று மோடி உறுதியளித்தார்.