சென்னை : தேமுதிக நிறுவனரும், மறைந்த கேப்டன் விஜயகாந்தின் பிறந்தநாளையொட்டி, பல்வேறு அரசியல் தலைவர்கள் அவரை நினைவுகூர்ந்து சமூக வலைதளங்கள் வாயிலாக வாழ்த்துகளையும், புகழஞ்சலிகளையும் தெரிவித்து வருகின்றனர். அந்த வகையில், கேப்டன் விஜயகாந்தின் பிறந்தநாளில் தமிழக முதல்வர் விஜய் அவருக்கு புகழஞ்சலி செலுத்தியுள்ளார்.
மனிதநேயம், துணிச்சல், தன்னலமற்ற சேவை ஆகியவற்றை தனது அடையாளமாகக் கொண்டவர் கேப்டன் விஜயகாந்த் என முதல்வர் விஜய் புகழாரம் சூட்டியுள்ளார். தமிழ்நாடு சட்டமன்றத்தின் முன்னாள் எதிர்க்கட்சித் தலைவராகவும், தேசிய முற்போக்கு திராவிட கழகத்தின் நிறுவனத் தலைவராகவும் செயல்பட்ட விஜயகாந்தின் பிறந்தநாளில், அவருக்கு தனது புகழ் வணக்கங்களைத் தெரிவித்துக் கொள்வதாக முதல்வர் விஜய் குறிப்பிட்டுள்ளார்.
திரைத்துறையில் தனக்கென தனி முத்திரையைப் பதித்த விஜயகாந்த், பின்னர் அரசியலிலும் களமிறங்கி மக்கள் நலனை முன்னிறுத்திய தலைவராகத் திகழ்ந்தார். குறிப்பாக, ஏழை மற்றும் எளிய மக்களின் மீது அன்பும் அக்கறையும் கொண்டிருந்ததோடு, அவர்களுக்கு கொடையுள்ளத்துடன் பல்வேறு உதவிகளை வழங்கியவர் என்றும் முதல்வர் விஜய் தெரிவித்துள்ளார்.
விஜயகாந்தின் அரசியல் பயணம் மட்டுமின்றி, அவரது மனிதநேயப் பண்புகளும் மக்கள் மத்தியில் அவருக்கு தனி இடத்தைப் பெற்றுத் தந்ததாகவும் முதல்வர் விஜயின் பதிவில் குறிப்பிடப்பட்டுள்ளது. பொதுமக்களின் பிரச்சினைகள் மற்றும் தேவைகளுக்கு முக்கியத்துவம் அளித்து செயல்பட்ட அவரது அணுகுமுறை இன்றளவும் நினைவுகூரப்பட்டு வருகிறது.
திரையுலகில் ‘புரட்சிக் கலைஞர்’ என்ற பெயரில் ரசிகர்களால் கொண்டாடப்பட்ட விஜயகாந்த், அரசியலிலும் தனது தனித்துவமான பாணியால் கவனம் பெற்றார். சினிமாவில் முன்னணி நடிகராக இருந்த காலத்திலேயே மக்களுடன் நெருக்கமாக இருந்த அவர், அரசியலுக்கு வந்த பிறகும் பொதுமக்களின் நலனில் தொடர்ந்து கவனம் செலுத்தியதாக அவரது ஆதரவாளர்கள் மற்றும் அரசியல் தலைவர்கள் நினைவுகூர்ந்து வருகின்றனர்.