மீண்டும் உயர தொடங்கியது தங்கம் விலை! இன்றைய நிலவரம் இதுதான்!

சென்னை :சென்னையில் ஆபரணத் தங்கம் விலை இன்று சற்று உயர்ந்துள்ளது. ஒரு சவரனுக்கு ரூ.640 உயர்ந்து தற்போது ரூ.1,12,240-க்கு விற்பனையாகிறது. கிராம் அடிப்படையில் ரூ.80 உயர்ந்து ஒரு கிராம் ரூ.14,030-க்கு வர்த்தகம் நடைபெறுகிறது. கடந்த சில நாட்களாக தொடர் சரிவை சந்தித்து வந்த தங்கம் விலை, இன்று திடீர் ட்விஸ்டாக சிறிது மீண்டுள்ளது. இந்த உயர்வு நகை வாங்க திட்டமிட்டவர்களுக்கு சற்று ஏமாற்றத்தை அளித்துள்ளது.

கடந்த சில மாதங்களில் தங்கம் விலை தொடர்ந்து உயர்ந்து புதிய உச்சங்களை தொட்டு வந்தது. நவம்பர் 1 அன்று சவரன் ரூ.90,480-ஆக இருந்தது. டிசம்பர் 1 அன்று ரூ.96,560-க்கு உயர்ந்தது. டிசம்பர் 15 அன்று முதல் முறையாக ஒரு லட்ச ரூபாய் என்ற மைல்கல்லை எட்டியது. ஜனவரி 1 அன்று ரூ.99,520-ஆக இருந்த விலை, ஜனவரி மாதத்தில் தொடர்ந்து எகிறி ஜனவரி 29 அன்று ரூ.1,34,400 என்ற உச்சத்தை தொட்டது. இதே காலகட்டத்தில் வெள்ளி விலையும் கடுமையாக உயர்ந்து கிலோ ரூ.4.25 லட்சத்தை எட்டியது.ஜனவரி மாத இறுதியில் தங்கம் விலை பெரும் சரிவை சந்தித்தது.

ஜனவரி 28 அன்று சவரனுக்கு ரூ.5,200 உயர்ந்தது. ஜனவரி 29 அன்று ரூ.9,520 உயர்ந்து உச்சம் தொட்டது. ஆனால் ஜனவரி 30 அன்று ரூ.7,600 குறைந்து ரூ.1,26,800-க்கு வந்தது. ஜனவரி 31 அன்று மீண்டும் ரூ.7,600 குறைந்து ரூ.1,11,600-க்கு வந்தது. இந்த தொடர் சரிவு நேற்று முன்தினம் மத்திய பட்ஜெட் தாக்கல் செய்யப்பட்ட பிறகு தொடங்கியது. நேற்று சவரன் ரூ.1,11,600-க்கும், கிராம் ரூ.13,950-க்கும் வந்தது.வெள்ளி விலையும் கடந்த சில நாட்களாக பெரும் சரிவை சந்தித்து வருகிறது.

நேற்று ஒரு கிராம் வெள்ளி ரூ.20 குறைந்து ரூ.300-க்கு வந்தது. கிலோ அடிப்படையில் ரூ.20,000 குறைந்து ரூ.3 லட்சத்திற்கு வந்தது. இன்று மேலும் சரிந்து ஒரு கிராம் ரூ.280-க்கும், ஒரு கிலோ ரூ.2.80 லட்சத்திற்கும் விற்பனையாகிறது. கடந்த வாரத்தில் ரூ.4.25 லட்சம் வரை உயர்ந்த வெள்ளி விலை இப்போது கணிசமாக குறைந்துள்ளது.

ஒட்டுமொத்தமாக, கடந்த இரண்டு நாட்களில் தங்கம் சவரனுக்கு ரூ.15,200 குறைந்து ரூ.1,11,600-க்கு வந்த நிலையில், இன்று சிறிது மீண்டு ரூ.1,12,240-க்கு உயர்ந்துள்ளது. வெள்ளி விலை தொடர்ந்து சரிந்து ரூ.2.80 லட்சத்திற்கு வந்துள்ளது. திருமண சீசன் நெருங்கும் நிலையில் இந்த ஏற்ற இறக்கம் நுகர்வோருக்கு சற்று நம்பிக்கையை அளித்தாலும், சந்தை இன்னும் ஸ்திரமடையவில்லை. முதலீட்டாளர்கள் மற்றும் நகை வாங்குபவர்கள் சந்தை நிலவரத்தை தினசரி கவனித்து முடிவெடுப்பது அவசியமாக உள்ளது.