ஒரே நாளில் ருத்ர தாண்டவம்...மீண்டும் ஒரு லட்சத்தை தொட்டது தங்கம் விலை!

சென்னை :சென்னையில் ஆபரணத் தங்கத்தின் விலை இன்று (டிசம்பர் 23, 2025) மீண்டும் கணிசமான அளவில் உயர்ந்து, ஒரு சவரன் ரூ.1 லட்சத்தை தாண்டியுள்ளது. இது நகைப் பிரியர்கள், திருமணம் மற்றும் பண்டிகை காலத்தில் நகை வாங்க திட்டமிட்டுள்ள குடும்பங்கள் மற்றும் முதலீட்டாளர்களிடையே பெரும் அதிர்ச்சியையும் கவலையையும் ஏற்படுத்தியுள்ளது.

இன்று காலை சவரனுக்கு ரூ.640 உயர்வு காணப்பட்ட நிலையில், நாள் முழுவதும் மேலும் உயர்ந்து ரூ.720 வரை அதிகரித்துள்ளது. இதனால், 22 கேரட் ஆபரணத் தங்கம் ஒரு சவரன் ரூ.1,00,560-க்கு விற்பனை செய்யப்படுகிறது. ஒரு கிராம் ஆபரணத் தங்கம் ரூ.170 உயர்ந்து ரூ.12,570-க்கு விற்கப்படுகிறது.இன்று ஒரே நாளில் சவரனுக்கு மொத்தம் ரூ.1,360 உயர்வு ஏற்பட்டுள்ளது. கடந்த சில நாட்களாகத் தொடர்ந்து உயர்ந்து வரும் தங்கம் விலை, இன்று மீண்டும் ஒரு லட்சத்தை தாண்டியுள்ளது.

இந்த உயர்வு சர்வதேச சந்தை மாற்றங்கள், டாலர் மதிப்பு ஏற்றம் மற்றும் உள்நாட்டு தேவை அதிகரிப்பு ஆகியவற்றால் ஏற்பட்டுள்ளதாக சந்தை ஆய்வாளர்கள் குறிப்பிடுகின்றனர்.

நகை வாங்க திட்டமிட்டுள்ள நடுத்தர மற்றும் ஏழை எளிய மக்களுக்கு இந்த உயர்வு பெரும் சுமையாக உள்ளது. திருமணங்கள், பண்டிகைகள் மற்றும் பிறந்தநாள் கொண்டாட்டங்களுக்காக நகை வாங்க தயாராகும் குடும்பங்கள் இப்போது காத்திருப்பது அல்லது விலை மேலும் உயரும் முன் வாங்குவது என்பதில் குழப்பத்தில் உள்ளனர். தங்கம் விலை தொடர்ந்து உயர்ந்து வருவதால், சந்தை நிலவரங்களை உன்னிப்பாகக் கவனிக்க வேண்டிய நிலை ஏற்பட்டுள்ளது.