வங்கதேச வன்முறை : ஷேக் ஹசீனாவுக்கு மரண தண்டனை!

வங்கதேசம் :வங்கதேசத்தின் முன்னாள் பிரதமர் ஷேக் ஹசீனாவுக்கு அந்த நாட்டின் “சர்வதேச குற்றவியல் நீதிமன்றம்” (ICT) இன்று (நவம்பர் 17, 2025) மரண தண்டனை விதித்துள்ளது. இது 2024-ல் நடந்த பெரிய மாணவர் போராட்டத்தின் போது “ஆயிரக்கணக்கான போராட்டக்காரர்களை கொலை செய்ய உத்தரவிட்டார்” என்ற குற்றச்சாட்டுக்காக வழங்கப்பட்ட தண்டனை. ஹசீனா தற்போது இந்தியாவில் தஞ்சம் புகுந்துள்ளதால், நீதிமன்றத்தில் அவர் இல்லாமலேயே (in absentia) தீர்ப்பு சொல்லப்பட்டது.

போராட்டம் எதற்காக தொடங்கியது?

கடந்து 2024 ஜூலை மாதம் வங்கதேசத்தில் அரசு வேலைகளில் “ஒதுக்கீடு” (quota) கொடுப்பதற்கு எதிராக மாணவர்கள் போராட்டம் தொடங்கினர். அது பிறகு ஷேக் ஹசீனாவின் 15 ஆண்டு ஆட்சிக்கே எதிரான பெரிய கிளர்ச்சியாக மாறியது. போலீசும் ராணுவமும் துப்பாக்கிச்சூடு நடத்தியதில் 1,400-க்கும் மேற்பட்டோர் இறந்தனர், பல்லாயிரக்கணக்கானோர் காயமடைந்தனர். இந்த கொலைகளுக்கு ஹசீனா தான் உத்தரவிட்டார் என்று இப்போதைய இடைக்கால அரசு குற்றம் சாட்டியது.

ஹசீனா இப்போது எங்கே? என்ன செய்கிறார்?

2024 ஆகஸ்ட் 5 அன்று போராட்டம் தீவிரமடைந்ததும், ஹசீனா ஹெலிகாப்டரில் தப்பி இந்தியாவுக்கு வந்துவிட்டார். இப்போது டெல்லி அருகே தஞ்சம் அடைந்துள்ளார். அவர் “என்மீது போடப்பட்ட குற்றச்சாட்டு எல்லாம் அரசியல் பழிவாங்கல், உண்மை இல்லை” என்று சொல்லியுள்ளார். அவரது கட்சியான ஆவாமி லீக், இந்த நீதிமன்றத்தை “போலி நீதிமன்றம்” என்று சொல்லி கண்டிக்கிறது.

தண்டனை உறுதியாக நடக்குமா?

தற்போதைக்கு இது மரண தண்டனை என்று சொல்லப்பட்டாலும், ஹசீனா இந்தியாவில் இருப்பதால் உடனடியாக கைது செய்து தூக்கிலிட முடியாது. வங்கதேச அரசு இந்தியாவிடம் “ஹசீனாவை திருப்பி அனுப்பு” என்று கேட்கலாம், ஆனால் இந்தியா இதுவரை அதை செய்யவில்லை. ஹசீனாவின் வழக்கறிஞர்கள் உச்ச நீதிமன்றத்தில் மேல்முறையீடு செய்யலாம். எனவே இந்த தண்டனை உடனே நிறைவேற்றப்பட வாய்ப்பு இல்லை.

மேலும், வங்கதேசத்தில் இப்போது நோபல் பரிசு பெற்ற முஹம்மது யூனுஸ் தலைமையில் இடைக்கால அரசு நடக்கிறது. இந்த தீர்ப்பு “போராட்டத்தில் இறந்தவர்களுக்கு நீதி கிடைத்தது” என்று அந்நாட்டு மக்கள் கொண்டாடுகிறார்கள். ஆனால் ஹசீனாவின் ஆதரவாளர்கள் இதை “பழிவாங்கல்” என்று சொல்கிறார்கள். இந்தியாவுக்கும் வங்கதேசத்துக்கும் இடையிலான உறவில் சற்று பதற்றம் ஏற்படலாம். இறுதியாக, ஷேக் ஹசீனா மீது “மக்களை கொலை செய்ய உத்தரவிட்டார்” என்ற குற்றம் நிரூபிக்கப்பட்டதாக வங்கதேச நீதிமன்றம் மரண தண்டனை விதித்துள்ளது என்பது குறிப்பிடத்தக்கது.