நேபாளம் :அரசுக்கு எதிரான போராட்டங்கள் வன்முறையாக மாறியதில், உயிரிழந்தவர்களின் எண்ணிக்கை 25-ஆக உயர்ந்துள்ளது. செப்டம்பர் 10, 2025 அன்று தகவல் வெளியான இந்த சம்பவம், காத்மாண்டு மற்றும் பிற நகரங்களில் ‘ஜெனரேஷன் இசட்’ இளைஞர்கள் தலைமையில் நடைபெற்ற போராட்டங்களின் தீவிரத்தை பிரதிபலிக்கிறது. போராட்டக்காரர்கள் காவல்துறையுடன் மோதியதில், கண்ணீர்ப்புகை, ரப்பர் குண்டுகள், மற்றும் துப்பாக்கிச்சூடு பயன்படுத்தப்பட்டதால், 300-க்கும் மேற்பட்டோர் காயமடைந்தனர்.
போராட்டங்கள், சமூக வலைதளத் தடை, அரசு ஊழல், வேலைவாய்ப்பின்மை மற்றும் பொருளாதார நெருக்கடிகளுக்கு எதிராகவே தொடங்கியது. காத்மாண்டு விமான நிலையம், போராட்டங்களின் எதிரொலியால் செப்டம்பர் 9 பிற்பகல் முதல் விமான சேவைகள் நிறுத்தப்பட்டன. இன்று (செப்டம்பர் 10) முதல், மேலும் அறிவிப்பு வரும் வரை விமான நிலையம் முழுவதும் மூடப்பட்டுள்ளது.
போராட்டக்காரர்கள் நாடாளுமன்ற வளாகத்தை நோக்கி முன்னேறியதால், விமான நிலையத்திற்கு அருகில் உள்ள பகுதிகளில் பதற்றம் அதிகரித்தது. நேபாள இராணுவம் களமிறங்கியுள்ளது, மேலும் நாடு முழுவதும் ராணுவக் கட்டுப்பாட்டில் உள்ளது. போராட்டங்களை அடக்குவதற்காக, காத்மாண்டுவில் ஊரடங்கு உத்தரவு அமல்படுத்தப்பட்டுள்ளது.நேபாள உச்சநீதிமன்றம், வன்முறைகள் பரவாமல் தடுக்க காலவரையின்றி தனது விசாரணைகளை நிறுத்தியுள்ளது.
போராட்டக்காரர்களின் கோரிக்கைகளுக்கு அடிபணிந்து, பிரதமர் கே.பி. சர்மா ஒலி செப்டம்பர் 9 அன்று பதவியை ராஜினாமா செய்தார். அரசின் தலைமைச் செயலாளர், உள்துறை செயலாளர், ராணுவத் தளபதி ஆகியோர் கூட்டறிக்கை வெளியிட்டு, “போராட்டங்களை உடனடியாக நிறுத்த வேண்டும்” என்று வேண்டுகோள் விடுத்தனர். ராணுவத் தளபதி, மக்கள் அமைதியாக இருக்குமாறு அறிவுறுத்தினார்.2008-ல் மன்னராட்சி ஒழிக்கப்பட்ட பின்னர், நேபாளத்தில் 13 அரசாங்கங்கள் மாறியுள்ளன.