உங்களுக்கு பக்கத்துல தான் எங்களோட நீர்மூழ்கிக் கப்பல் நிக்குது – புதினை எச்சரித்த ட்ரம்ப்!

வாஷிங்டன் :ரஷ்யா அதிபர் விளாடிமிர் புடின், அணுசக்தி மூலம் இயங்கும் புரேவெஸ்ட்னிக் (Burevestnik) ஏவுகணையின் சோதனை வெற்றிகரமாக நடைபெற்றதாக அஅறிவித்தார். இந்த ஏவுகணை, அணு ஆயுதங்களை சுமந்து சென்று தாக்கும் திறன் கொண்டது. அக்டோபர் 21 அன்று நடத்தப்பட்ட சோதனையில், இந்த ஏவுகணை 14,000 கி.மீ தொலைவை 15 மணி நேரம் பறந்து, இலக்கை துல்லியமாக அழித்தது. ரஷ்ய ராணுவ தலைவர் வலேரி கெராசிமோவ், இதை உலகின் தனித்துவமான ஆயுதமாக விவரித்தார். புதின், இந்த ஏவுகணையை ராணுவத்தில் இணைக்க உள்கட்டமைப்பை உருவாக்குமாறு உத்தரவிட்டுள்ளார்.

இந்த அறிவிப்பு, ரஷ்யாவின் அணுசக்தி தொழில்நுட்பத்தில் பெற்ற முன்னேற்றத்தை வெளிப்படுத்துகிறது.அமெரிக்க அதிபர் டொனால்ட் ட்ரம்ப், இந்த சோதனைக்கு மறைமுகமாக எதிர்வினை காட்டினார். ஜப்பான் சுற்றுப்பயணத்தின் போது, ஏர் ஃபோர்ஸ் ஒன் விமானத்தில் செய்தியாளர்களிடம் பேசிய அவர், அமெரிக்காவின் உலகின் சக்திவாய்ந்த அணுசக்தி நீர்மூழ்கிக் கப்பல் ரஷ்ய கடல் எல்லைக்கு அருகில் நிலை கொண்டுள்ளதாகக் கூறினார்.

“அது 8,000 மைல் தொலைவுக்கு பறக்க வேண்டியதில்லை, அவர்களின் கரையில் நாம் உள்ளோம்” என்று அவர் சொன்னது, ரஷ்யாவுக்கு ஒரு தெளிவான எச்சரிக்கையாக அமைந்தது. ட்ரம்ப், “அவர்கள் எங்களுடன் விளையாடவில்லை, நாங்களும் அவர்களுடன் விளையாடவில்லை” என்றும், அமெரிக்கா தொடர்ந்து ஏவுகணை சோதனைகள் செய்கிறது என்றும் சேர்த்தார். இது, இரு நாடுகளுக்கும் இடையேயான அணுசக்தி போட்டியை மீண்டும் வெளிப்படுத்தியது. ட்ரம்ப், புதினுக்கு நேரடியாக அறிவுரை அளித்தார். “புதின் சொல்வது பொருத்தமானதல்ல, அவர் போரை முடிவுக்கு கொண்டுவர வேண்டும்” என்று அவர் கூறினார்.

மேலும், உக்ரைன் போர், ஒரு வாரத்தில் முடிய வேண்டியது நான்காவது ஆண்டை அடைந்துள்ளதாக சுட்டிக்காட்டி, ஏவுகணை சோதனைக்குப் பதிலாக அமைதி முயற்சிகளில் கவனம் செலுத்துமாறு புதினை அறிவுறுத்தினார். இந்த அறிவுரை, அமெரிக்காவின் உக்ரைன் ஆதரவையும், ரஷ்யாவின் நடவடிக்கைகளுக்கு எதிரான அழுத்தத்தையும் வலியுறுத்துகிறது. ட்ரம்பின் இந்தப் பேச்சு, உக்ரைன் போரில் அமெரிக்காவின் நிலைப்பாட்டை மீண்டும் உறுதிப்படுத்தியது.

ரஷ்யாவின் இந்த ஏவுகணை சோதனை மற்றும் ட்ரம்பின் எச்சரிக்கை, உலக அணுசக்தி போட்டியை மீண்டும் தீவிரப்படுத்தியுள்ளது. உக்ரைன் போரின் பின்னணியில், இது இரு நாடுகளுக்கும் இடையேயான பதற்றத்தை அதிகரிக்கலாம். புதினின் அறிவிப்பு ரஷ்யாவின் தேசிய பாதுகாப்பை வலுப்படுத்துவதாகக் கூறினாலும், ட்ரம்பின் பதில் போரை முடிவுக்கு கொண்டுவர அழுத்தம் தருவதாக உள்ளது என்பதும் குறிப்பிடத்தக்கது.