டெல்லி :இந்திய மகளிர் கிரிக்கெட் அணி, நவி மும்பை டாக்டர் டி.வை. பாட்டீல் விளையாட்டு அரங்கில் நடைபெற்ற இறுதிப் போட்டியில் தென்னாப்பிரிக்காவை 52 ரன்கள் வித்தியாசத்தில் வீழ்த்தி, முதல் முறையாக ஐசிசி மகளிர் உலகக் கோப்பையை வென்றது. இந்த வெற்றி இந்திய கிரிக்கெட்டில் புதிய வரலாற்றைப் படைத்தது. அணித்தலைவர் ஹர்மன்பிரீத் கவுர், இந்த வெற்றியை “உலக சாம்பியன்” என்று அழைக்கும் உணர்வு மிகவும் வித்தியாசமானது என்று உருக்கமாகத் தெரிவித்தார். “ஒருவரையொருவர் பார்க்கும்போதெல்லாம் ‘உலக சாம்பியன்’ என்று சொல்லிக்கொள்கிறோம். இதுபோன்ற உணர்வை எப்போது அனுபவிப்போம் என்று காத்திருந்தோம்” என்று அவர் கூறினார்.
மேலும், இறுதிப் போட்டிக்கு முந்தைய இரவு, சச்சின் டெண்டுல்கர் தொலைபேசியில் தொடர்பு கொண்டு அறிவுரைகள் வழங்கினார். “போட்டி வேகமாக செல்லும்போது சற்று மெதுவாக்குங்கள். அதிக வேகத்தில் சென்றால் தடுமாற வாய்ப்புள்ளது. அதைத் தவிர்க்க வேண்டும்” என்று சச்சின் அறிவுறுத்தினார். இதை நினைவுகூர்ந்த ஹர்மன்பிரீத், மூத்த வீரர்களின் அறிவுரைகளை நினைத்துக்கொண்டு பொறுமையாகவும், கட்டுப்பாட்டுடனும் விளையாடியதால்தான் வெற்றி கிடைத்தது என்று தெரிவித்தார். “நேரம் வரும்போது அதைப் பிடித்துக்கொள்ளுங்கள்” என்ற மூத்தவர்களின் வார்த்தைகள் உத்வேகமாக அமைந்தன.
வெற்றிக்குப் பிறகு கோப்பையை பெற்றோருடன் சேர்ந்து உயர்த்தியது ஹர்மன்பிரீத்துக்கு மறக்க முடியாத தருணம். “சிறுவயதில் இருந்தே இந்திய ஜெர்சி அணிய வேண்டும், நாட்டுக்காக விளையாட வேண்டும், அணியை வழிநடத்த வேண்டும், உலகக் கோப்பை வெல்ல வேண்டும் என்று சொல்லிக்கொண்டிருந்தேன். அதை பெற்றோர் கேட்டிருக்கிறார்கள். அவர்களுடன் கோப்பையை உயர்த்தியது மிகவும் சிறப்பான தருணம்” என்று உருக்கமாகப் பகிர்ந்தார். இது அவரது குழந்தைத்தனமான கனவு நிறைவேறிய தருணமாக அமைந்தது.
பிரதமர் நரேந்திர மோடி, வெற்றி பெற்ற இந்திய மகளிர் அணியை தனது இல்லத்தில் சந்தித்து பாராட்டினார். தொடக்கத்தில் மூன்று தோல்விகளை சந்தித்து சமூக வலைதளங்களில் ட்ரோல் செய்யப்பட்ட போதும், மனோதிடத்துடன் திரும்பி வந்து வரலாறு படைத்ததற்காக வீராங்கனைகளைப் புகழ்ந்தார். 2017 உலகக் கோப்பைக்குப் பிறகு கோப்பை இல்லாமல் சந்தித்ததை நினைவுகூர்ந்த ஹர்மன்பிரீத், “இனி வெற்றியுடன் அடிக்கடி சந்திப்போம்” என்று நம்பிக்கை தெரிவித்தார்.