அதே சினிமா வசனம், அதே ஆக்டிங்...முதல்வர் விஜய் பேச்சுக்கு பதிலடி கொடுத்த உதயநிதி!

சென்னை : தமிழக சட்டமன்றத்தில் இன்று காவல் துறை மீதான மானியக் கோரிக்கை விவாதத்தில் முதலமைச்சர் விஜய் ஆற்றிய பதிலுரையைத் தொடர்ந்து, பேரவை வளாகத்தில் அரசியல் புயல் வீசியுள்ளது. முதல்வரின் உரையில் திமுக மற்றும் மறைந்த முன்னாள் முதல்வர் கலைஞர் மீது சுமத்தப்பட்ட சர்க்காரியா கமிஷன் ஊழல் புகார்களுக்குப் பேரவையில் உடனடியாக விளக்கம் அளிக்க எதிர்க்கட்சியினருக்கு அனுமதி மறுக்கப்பட்டது. இதனைத் தொடர்ந்து, சபாநாயகரின் போக்கைக் கண்டித்து எதிர்க்கட்சித் தலைவர் உதயநிதி ஸ்டாலின் தலைமையில் திமுக சட்டமன்ற உறுப்பினர்கள் அனைவரும் அவையை விட்டு அதிரடியாக வெளிநடப்பு செய்தனர்.

பின்னர் சட்டப்பேரவைக்கு வெளியே செய்தியாளர்களைச் சந்தித்த உதயநிதி ஸ்டாலின், முதல்வர் விஜய்யின் பதிலுரையை மிகக் கடுமையாக விமர்சித்து, ஆளுங்கட்சியின் பின்னணியில் இருக்கும் மிகப்பெரிய தொழில் அதிபர்களின் கூட்டு ஊழல் விபரங்களை அம்பலப்படுத்திப் பேரதிர்ச்சியை ஏற்படுத்தியுள்ளார்.

செய்தியாளர்கள் சந்திப்பில் பேசிய எதிர்க்கட்சித் தலைவர் உதயநிதி ஸ்டாலின், கடந்த வாரம் சட்டமன்றத்தில் பந்தயக் குதிரை போல 'திங்கள்கிழமை பதில் சொல்கிறேன்' என்று சவால் விட்டு ஓடிய முதலமைச்சர் விஜய், இன்று பேரவைக்கு வந்து ஏதோ பள்ளிக்கூட ஒப்புவித்தல் போட்டியில் கலந்துகொள்வது போலத் தவறான, பொய்யான குற்றச்சாட்டுகளைத் தொடர்ச்சியாக ஒப்பித்துவிட்டுச் சென்றுள்ளார் என்று சாடினார். பேரவையில் முதல்வர் பேசியது முழுவதும் அதே பழைய சினிமா பஞ்ச் டயலாக்குகள், அதே தேய்ந்துபோன சினிமா வசனங்கள் மற்றும் அதே ஆக்டிங் மட்டும்தான் என்று விமர்சித்தார்.

இன்றைய முதலமைச்சரின் ஒட்டுமொத்த பதிலுரையும் தமிழ்நாட்டு மக்களுக்கானது அல்ல, அது முழுக்க முழுக்க சமூக வலைத்தளங்களில் 'ரீல்ஸ்' (Reels) போட்டு அரசியல் லாபம் தேடுவதற்காக மட்டுமே வழங்கப்பட்ட ஒரு டிராமா என்று உதயநிதி ஸ்டாலின் குறிப்பிட்டார்.

முன்னாள் முதல்வர் கலைஞர் மற்றும் திமுகவின் கடந்த கால வரலாறுகள் குறித்து முதல்வர் விஜய் பேசியதற்குப் பதிலடி கொடுத்த உதயநிதி, "முன்னாள் முதல்வர் ஜெயலலிதா ஆட்சிக் காலத்தில் கொடநாட்டில் தனது சொந்தத் திரைப்படங்களின் ரிலீஸுக்காகவும், வியாபாரத்திற்காகவும் ஜெயலலிதாவின் எஸ்டேட்டிற்கு வெளியே 'வாட்ச்மேன்' (Watchman) வேலை பார்த்தவர்தான் இந்த முதலமைச்சர் விஜய்" என்று மிக அதிரடியாகக் குற்றம் சாட்டினார்.

அப்படிப்பட்ட ஒரு சுயநலப் பின்னணியில் இருந்து வந்த இவருக்கு, இந்திய ஜனநாயகத்தைக் காக்க எத்தனையோ தியாகங்களைச் செய்த எங்களது தலைவர்களைப் பற்றியோ அல்லது வரலாற்றுச் சிறப்புமிக்க 'மிசா' (MISA) சிறைவாசம் பற்றியோ பேசுவதற்கு ஒரு சதவீதம்கூட (1%) தகுதி கிடையாது என்று உதயநிதி பேரவைக்கு வெளியே மிக ஆக்ரோஷமாகச் சீறினார்.

மேலும் தொடர்ந்து பேசிய அவர் " முதலமைச்சர் விஜய்யின் நெருங்கிய நண்பரும் ஆலோசகருமான விஷ்ணு ரெட்டி, அவருடைய மச்சான் சுஜய் ரெட்டி மற்றும் அவருடைய முக்கிய பிசினஸ் பார்ட்னரான அனில் ரெட்டி ஆகிய மூவரின் பெயர்களை உதயநிதி பகிரங்கமாக வெளியிட்டார். இந்த 'ரெட்டி' கூட்டணிகள் எல்லாம் ஒன்றாகச் சேர்ந்துதான், தற்போதைய தவெக ஆட்சியில் தமிழக அரசு நடத்தக்கூடிய ஒட்டுமொத்த கனிம வளச் சுரங்கங்களையும் (Mines) தங்களது முழு கட்டுப்பாட்டில் (Control) வைத்துள்ளார்கள் என்று அதிரடிப் புகாரை முன்வைத்தார். கனிம வளக் கொள்ளை தொடர்பான அனைத்து ஆதாரங்களையும் தகுந்த ஆவணங்களுடன் தான் ஒவ்வொன்றாக மிக விரைவில் மக்கள் மத்தியில் வெளியிடப் போவதாக உதயநிதி ஸ்டாலின் சவால் விடுத்துள்ளார்.

தொடர்ந்து தவெக அரசின் கொள்கை முரண்பாடுகளை விமர்சித்த உதயநிதி, மத்தியில் ஆளும் பாஜகவை எதிர்க்கத் தற்போதைய முதலமைச்சருக்குத் துணிச்சல் இல்லை என்பதை அம்பலப்படுத்தினார். இந்த தவெக அரசின் வாயில் இருந்து பாரதிய ஜனதா கட்சியின் 'பா' என்ற வார்த்தை கூட வராது என்று அவர் கிண்டலடித்தார். இதற்கு உதாரணமாக இன்றைய பேரவை நிகழ்வைச் சுட்டிக்காட்டிய அவர், சட்டமன்ற அவைக்குள் ஆளுங்கட்சியைச் சேர்ந்த ஒரு அமைச்சர் பாஜக தலைவர்களைக் கண்டித்து வாதாடியபோது, அதற்குப் பயந்துபோன மற்றொரு அமைச்சர் உடனடியாக அவரைத் தடுத்து, அந்தப் பேச்சுகளை அவைக்குறிப்பில் இருந்தே நீக்கச் சொன்ன கூத்தை பேரவை இன்று பார்த்தது என்றார். இந்த அளவுக்கு மத்திய அரசுக்கு அடிபணிந்து போகக்கூடிய ஒரு வக்கற்ற அரசும், அதிகாரமில்லாத ஒரு 'டம்மி CM' (Dummy CM) மட்டுமே இன்று தமிழ்நாட்டை ஆண்டு கொண்டிருக்கிறார்கள் என்று கூறி உதயநிதி ஸ்டாலின் தவெக அரசுக்கு எதிரான தனது கண்டனப் பேட்டியை அதிரடியாக நிறைவு செய்தார்.